11 ತಿಂಗಳ ಬಾಡಿಗೆ ಒಪ್ಪಂದದಿಂದ ಏನು ಲಾಭ? ಇಲ್ಲಿದೆ ಸಂಪೂರ್ಣ ಮಾಹಿತಿ

ಬಹುತೇಕ ಮನೆ ಮಾಲೀಕರು ಮತ್ತು ಬಾಡಿಗೆದಾರರು 11 ತಿಂಗಳ ಅವಧಿಯ ಬಾಡಿಗೆ ಒಪ್ಪಂದ (Rental Agreement) ಮಾಡಿಕೊಳ್ಳುವುದನ್ನು ನೀವು ಗಮನಿಸಿರಬಹುದು. ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಅವಧಿಗೆ ಒಪ್ಪಂದ ಮಾಡಿಕೊಳ್ಳಬಹುದಾದರೂ, 11 ತಿಂಗಳನ್ನೇ ಆಯ್ಕೆ ಮಾಡುವುದಕ್ಕೆ ಪ್ರಮುಖ ಕಾನೂನುಬದ್ಧ ಕಾರಣವಿದೆ.

ನೋಂದಣಿ ಕಾಯ್ದೆ, 1908 (Registration Act, 1908) ಪ್ರಕಾರ, ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಅವಧಿಗೆ ಆಸ್ತಿಯನ್ನು ಬಾಡಿಗೆಗೆ ನೀಡುವ ಒಪ್ಪಂದವನ್ನು ಕಡ್ಡಾಯವಾಗಿ ಉಪ ನೋಂದಣಾಧಿಕಾರಿ (Sub-Registrar) ಕಚೇರಿಯಲ್ಲಿ ನೋಂದಾಯಿಸಬೇಕು. ಈ ವೇಳೆ ಸ್ಟಾಂಪ್ ಡ್ಯೂಟಿ ಹಾಗೂ ನೋಂದಣಿ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.

ಈ ವೆಚ್ಚದ ಪ್ರಮಾಣ ದೇಶದಾದ್ಯಂತ ಒಂದೇ ರೀತಿಯಲ್ಲಿರುವುದಿಲ್ಲ. ಸಂಬಂಧಿತ ರಾಜ್ಯ ಸರ್ಕಾರದ ನಿಯಮಗಳು, ಬಾಡಿಗೆ ಮೊತ್ತ, ಭದ್ರತಾ ಠೇವಣಿ (Security Deposit) ಹಾಗೂ ಲೀಸ್ ಅವಧಿಯನ್ನು ಆಧರಿಸಿ ಸ್ಟಾಂಪ್ ಡ್ಯೂಟಿ ಮತ್ತು ನೋಂದಣಿ ಶುಲ್ಕದಲ್ಲಿ ವ್ಯತ್ಯಾಸ ಕಂಡುಬರುತ್ತದೆ.

ಇದೇ ಕಾರಣದಿಂದ ಹೆಚ್ಚುವರಿ ವೆಚ್ಚವನ್ನು ತಪ್ಪಿಸಲು ಹೆಚ್ಚಿನವರು 11 ತಿಂಗಳ ಬಾಡಿಗೆ ಒಪ್ಪಂದವನ್ನೇ ಆಯ್ಕೆ ಮಾಡುತ್ತಾರೆ. ಸಾಮಾನ್ಯವಾಗಿ ಇಂತಹ ಅವಧಿಯ ಒಪ್ಪಂದಗಳಿಗೆ ಕಡ್ಡಾಯ ನೋಂದಣಿಯ ಅಗತ್ಯ ಇರುವುದಿಲ್ಲ. ಅವಧಿ ಮುಗಿದ ಬಳಿಕ ಉಭಯಪಕ್ಷಗಳ ಒಪ್ಪಿಗೆಯೊಂದಿಗೆ ಹೊಸ ಒಪ್ಪಂದ ಮಾಡಿಕೊಳ್ಳಬಹುದು. ಇದರಿಂದ ಮಾಲೀಕರಿಗೂ, ಬಾಡಿಗೆದಾರರಿಗೂ ಇದು ಹೆಚ್ಚು ಅನುಕೂಲಕರ ಮತ್ತು ಆರ್ಥಿಕವಾಗಿ ಲಾಭದಾಯಕ ಆಯ್ಕೆಯಾಗಿದೆ.

ಬಾಡಿಗೆ ಒಪ್ಪಂದ ಎಂದರೇನು?

ಬಾಡಿಗೆ ಒಪ್ಪಂದ (Rental Agreement) ಎಂದರೆ ಮನೆ, ಅಂಗಡಿ ಅಥವಾ ಯಾವುದೇ ಆಸ್ತಿಯನ್ನು ಬಾಡಿಗೆಗೆ ನೀಡುವ ಮಾಲೀಕ ಮತ್ತು ಅದನ್ನು ಬಾಡಿಗೆಗೆ ಪಡೆಯುವ ವ್ಯಕ್ತಿ ನಡುವೆ ನಡೆಯುವ ಕಾನೂನುಬದ್ಧ ಒಪ್ಪಂದ. ಇದರಲ್ಲಿ ಮಾಸಿಕ ಬಾಡಿಗೆ, ಮುಂಗಡ ಹಣ, ಬಾಡಿಗೆ ಅವಧಿ, ಇಬ್ಬರ ಹಕ್ಕುಗಳು, ಜವಾಬ್ದಾರಿಗಳು ಹಾಗೂ ಇತರ ಷರತ್ತುಗಳನ್ನು ಸ್ಪಷ್ಟವಾಗಿ ದಾಖಲಿಸಲಾಗುತ್ತದೆ. ಭವಿಷ್ಯದಲ್ಲಿ ಉಂಟಾಗಬಹುದಾದ ವಿವಾದಗಳನ್ನು ತಪ್ಪಿಸಲು ಈ ದಾಖಲೆ ಪ್ರಮುಖ ಪಾತ್ರ ವಹಿಸುತ್ತದೆ.