ಯೋಗಿ ಆದಿತ್ಯನಾಥ್ vs ಶಂಕರಾಚಾರ್ಯ: ಸಿಎಂ ಪರ ನಿಂತ ಅಯೋಧ್ಯೆ ಅಧಿಕಾರಿ ರಾಜೀನಾಮೆ!

Shankaracharya vs Yogi Adityanath: ಅಯೋಧ್ಯೆ: ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಮತ್ತು ಶಂಕರಾಚಾರ್ಯ ಸ್ವಾಮಿ ಅವಿಮುಕ್ತೇಶ್ವರಾನಂದ ಸರಸ್ವತಿ ಅವರ ನಡುವಿನ ವಾಗ್ವಾದ ಈಗ ತಾರಕಕ್ಕೇರಿದೆ. ಮುಖ್ಯಮಂತ್ರಿಗಳಿಗೆ ಶಂಕರಾಚಾರ್ಯರು ಅವಮಾನ ಮಾಡಿದ್ದಾರೆ ಎಂದು ಆರೋಪಿಸಿ, ಅಯೋಧ್ಯೆಯ ಹಿರಿಯ ಅಧಿಕಾರಿಯೊಬ್ಬರು ತಮ್ಮ ಹುದ್ದೆಗೆ ರಾಜೀನಾಮೆ ನೀಡುವ ಮೂಲಕ ಪ್ರತಿಭಟಿಸಿದ್ದಾರೆ.

ವಿವಾದದ ಹಿನ್ನೆಲೆ ಏನು?
ಪ್ರಯಾಗ್‌ರಾಜ್‌ನಲ್ಲಿ ನಡೆಯುತ್ತಿದ್ದ ಮಾಘ ಮೇಳದ ಸಂದರ್ಭದಲ್ಲಿ ಶಂಕರಾಚಾರ್ಯರು ಗಂಗಾ ಸ್ನಾನಕ್ಕೆ ತೆರಳುತ್ತಿದ್ದಾಗ, ಆಡಳಿತ ಮಂಡಳಿಯು ಅವರ ರಥದ ಮೆರವಣಿಗೆಯನ್ನು ತಡೆದಿತ್ತು. ಕಾಲ್ತುಳಿತ ತಪ್ಪಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದರೂ, ಶಂಕರಾಚಾರ್ಯರು ಇದನ್ನು ತಮ್ಮ ಪೀಠಕ್ಕೆ ಆದ ಅಪಮಾನ ಎಂದು ಭಾವಿಸಿ ಪ್ರತಿಭಟನೆ ಆರಂಭಿಸಿದ್ದರು.

‘ಕಾಲನೇಮಿ’ ಮತ್ತು ರಾಜಕೀಯ ಸಮರ
ಈ ಘಟನೆಯ ಬೆನ್ನಲ್ಲೇ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಹೆಸರು ಹೇಳದೆ, ಸಂತರ ವೇಷದಲ್ಲಿ ಬರುವ ‘ಕಾಲನೇಮಿ’ (ರಾಮಾಯಣದಲ್ಲಿ ಹನುಮಂತನನ್ನು ವಂಚಿಸಲು ಸನ್ಯಾಸಿ ವೇಷ ತೊಟ್ಟ ರಕ್ಕಸ) ಅಂತಹವರ ಬಗ್ಗೆ ಎಚ್ಚರದಿಂದಿರಬೇಕು ಎಂದು ಮಾರ್ಮಿಕವಾಗಿ ನುಡಿದಿದ್ದರು. ಇದಕ್ಕೆ ತಿರುಗೇಟು ನೀಡಿದ ಶಂಕರಾಚಾರ್ಯರು, “ಯೋಗಿ ಒಬ್ಬ ರಾಜಕಾರಣಿ, ಅವರು ಶಿಕ್ಷಣ, ಆರೋಗ್ಯ ಮತ್ತು ಅಭಿವೃದ್ಧಿಯ ಬಗ್ಗೆ ಮಾತನಾಡಲಿ. ಧರ್ಮದ ವಿಚಾರವನ್ನು ನಮಗೆ ಬಿಡಲಿ,” ಎಂದು ಕಿಡಿಹಾಕಿದ್ದರು.

ಆನೆಗುಡ್ಡೆಯಲ್ಲಿ ನಟ ರಿಷಬ್ ಶೆಟ್ಟಿ ಮೂಡುಗಣಪತಿ ಸೇವೆ…

ಅಧಿಕಾರಿಯ ದಿಢೀರ್ ರಾಜೀನಾಮೆ
ಈ ಬೆಳವಣಿಗೆಯಿಂದ ಬೇಸತ್ತ ಅಯೋಧ್ಯೆಯ ಡೆಪ್ಯುಟಿ ಜಿಎಸ್‌ಟಿ ಕಮಿಷನರ್ ಪ್ರಶಾಂತ್ ಕುಮಾರ್ ಸಿಂಗ್ ಅವರು ಮಂಗಳವಾರ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. “ಮುಖ್ಯಮಂತ್ರಿಗಳು, ಪ್ರಧಾನ ಮಂತ್ರಿಗಳು ಮತ್ತು ಸಂವಿಧಾನಕ್ಕೆ ಅಪಮಾನವಾಗುವುದನ್ನು ನಾನು ಸಹಿಸುವುದಿಲ್ಲ. ಶಂಕರಾಚಾರ್ಯರ ಹೇಳಿಕೆಗಳು ಸಮಾಜವನ್ನು ಒಡೆಯುವಂತಿವೆ. ನಾನು ಸರ್ಕಾರದ ಅನ್ನ ತಿಂದಿದ್ದೇನೆ, ಯೋಗಿ ಆದಿತ್ಯನಾಥ್ ಅವರು ಪ್ರಜಾಪ್ರಭುತ್ವದ ಮೂಲಕ ಆಯ್ಕೆಯಾದವರು, ಅವರ ಪರವಾಗಿ ನಾನು ನಿಲ್ಲುತ್ತೇನೆ,” ಎಂದು ಸಿಂಗ್ ಹೇಳಿದ್ದಾರೆ.

ಜಾತಿ ರಾಜಕಾರಣದ ಬಗ್ಗೆಯೂ ಕಿಡಿ
ಇದೇ ವೇಳೆ ಶಂಕರಾಚಾರ್ಯರು ಯುಜಿಸಿ (UGC) ತಂದಿರುವ ಹೊಸ ನಿಯಮಗಳ ಬಗ್ಗೆಯೂ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಒಂದು ಜಾತಿಯನ್ನು ಮತ್ತೊಂದು ಜಾತಿಯ ವಿರುದ್ಧ ಎತ್ತಿಕಟ್ಟುವುದು ಹಿಂದೂ ಧರ್ಮಕ್ಕೆ ಹಾನಿಕಾರಕ ಎಂದು ಅವರು ಎಚ್ಚರಿಸಿದ್ದಾರೆ. ಸದ್ಯ ಅಧಿಕಾರಿಯ ರಾಜೀನಾಮೆ ಮತ್ತು ಈ ಧಾರ್ಮಿಕ-ರಾಜಕೀಯ ಸಂಘರ್ಷ ಉತ್ತರ ಪ್ರದೇಶದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.