ಸ್ವಂತ ತಂದೆಯ ವಿರುದ್ಧವೇ ದಂಗೆ ನಡೆಸಿ ಅಧಿಕಾರ ಹಿಡಿದಿದ್ದ ಕತಾರ್‌ನ ಅಮೀರ್ ಶೇಖ್ ಅಮದ್ ನಿಧನ

ಜಾಗತಿಕ ರಾಜಕೀಯದಲ್ಲಿ ಮತ್ತು ಮಧ್ಯಪ್ರಾಚ್ಯದ ಇತಿಹಾಸದಲ್ಲಿ ಅತ್ಯಂತ ಪ್ರಭಾವಶಾಲಿ ನಾಯಕರಾಗಿ ಗುರುತಿಸಿಕೊಂಡಿದ್ದ ಕತಾರ್‌ನ ಮಾಜಿ ಅಮೀರ್ ಶೇಖ್ ಹಮದ್ ಬಿನ್ ಖಲೀಫಾ ಅಲ್-ಥಾನಿ ಅವರು (Former Qatar Emir Sheikh Hamad passed away) ಭಾನುವಾರ (ಜುಲೈ 12, 2026) ಮುಂಜಾನೆ ನಿಧನರಾಗಿದ್ದಾರೆ. ಅವರಿಗೆ 74 ವರ್ಷ ವಯಸ್ಸಾಗಿತ್ತು. ಕತಾರ್‌ನ ಸರ್ವೋಚ್ಚ ಸರ್ಕಾರಿ ಸಂಸ್ಥೆಯಾದ ‘ಅಮಿರಿ ದಿವಾನ್’ ಈ ದುಃಖದ ಸುದ್ದಿಯನ್ನು ಅಧಿಕೃತವಾಗಿ ಪ್ರಕಟಿಸಿದೆ.

ಕೇವಲ ಮರಳುಗಾಡಿನಂತಿದ್ದ ಪುಟ್ಟ ದೇಶವನ್ನು ಜಗತ್ತಿನ ಅತ್ಯಂತ ಶ್ರೀಮಂತ ಮತ್ತು ರಾಜತಾಂತ್ರಿಕವಾಗಿ ಪ್ರಭಾವಶಾಲಿ ರಾಷ್ಟ್ರವನ್ನಾಗಿ ಪರಿವರ್ತಿಸಿದ ಕೀರ್ತಿ ಶೇಖ್ ಹಮದ್ ಅವರಿಗೆ ಸಲ್ಲುತ್ತದೆ.

ರಕ್ತಪಾತವಿಲ್ಲದ ದಂಗೆಯ ಮೂಲಕ ಅಧಿಕಾರಕ್ಕೆ!

ಶೇಖ್ ಹಮದ್ ಅವರ ಅಧಿಕಾರ ಸ್ವೀಕಾರದ ಕಥೆಯೇ ಒಂದು ರೋಚಕ ಇತಿಹಾಸ. 1995ರಲ್ಲಿ ತಮ್ಮದೇ ತಂದೆಯ ವಿರುದ್ಧ ರಕ್ತಪಾತವಿಲ್ಲದ ಅರಮನೆ ದಂಗೆಯನ್ನು (Coup) ನಡೆಸಿ ಅವರು ಕತಾರ್‌ನ ಅಧಿಕಾರ ಚುಕ್ಕಾಣಿ ಹಿಡಿದರು. ಆಗ ಕೇವಲ 44 ವರ್ಷ ವಯಸ್ಸಿನವರಾಗಿದ್ದ ಹಮದ್, ಆ ಕಾಲಕ್ಕೆ ಮಧ್ಯಪ್ರಾಚ್ಯದ ಅತ್ಯಂತ ಕಿರಿಯ ನಾಯಕರಾಗಿದ್ದರು. ಅರಬ್ಬರ ಸಾಂಪ್ರದಾಯಿಕ ಗಾಂಭೀರ್ಯಕ್ಕಿಂತ ಭಿನ್ನವಾಗಿ, ದೋಹಾದ ಸ್ಥಳೀಯ ಕೆಫೆಗಳಲ್ಲಿ ಕುಳಿತು ಸಾಮಾನ್ಯ ಜನರೊಂದಿಗೆ ಚರ್ಚಿಸುವಷ್ಟು ಅವರು ಜನಸ್ನೇಹಿಯಾಗಿದ್ದರು. ನಂತರ 2013 ರಲ್ಲಿ, ಹೊಸ ತಲೆಮಾರಿನ ನಾಯಕತ್ವಕ್ಕೆ ದಾರಿ ಮಾಡಿಕೊಡುವ ಸಲುವಾಗಿ ತಮ್ಮ ಮಗ ಹಾಗೂ ಪ್ರಸ್ತುತ ಅಮೀರ್ ಆಗಿರುವ ಶೇಖ್ ತಮೀಮ್ ಅವರಿಗೆ ಅಧಿಕಾರ ಹಸ್ತಾಂತರಿಸಿ ಇತಿಹಾಸ ಸೃಷ್ಟಿಸಿದ್ದರು.

ಕತಾರ್ ಅನ್ನು ಜಾಗತಿಕ ಶಕ್ತಿಯನ್ನಾಗಿ ಬದಲಿಸಿದ 3 ಪ್ರಮುಖ ನಿರ್ಧಾರಗಳು

ಶೇಖ್ ಹಮದ್ ಅವರ 18 ವರ್ಷಗಳ ಆಡಳಿತಾವಧಿಯಲ್ಲಿ ಕತಾರ್ ಮೂರು ಪ್ರಮುಖ ರಂಗಗಳಲ್ಲಿ ಜಾಗತಿಕವಾಗಿ ಮಿನುಗಿತು:

• ದ್ರವೀಕೃತ ನೈಸರ್ಗಿಕ ಅನಿಲ (LNG) ಕ್ರಾಂತಿ: ಕತಾರ್‌ನ ಬೃಹತ್ ಅನಿಲ ನಿಕ್ಷೇಪಗಳನ್ನು ಜಾಗತಿಕ ಮಾರುಕಟ್ಟೆಗೆ ತಲುಪಿಸಲು ಅಗತ್ಯವಾದ ಅತ್ಯಾಧುನಿಕ ಮೂಲಸೌಕರ್ಯಗಳನ್ನು ನಿರ್ಮಿಸಿದ ಮುಖ್ಯ ಶಿಲ್ಪಿ ಇವರೇ. ಇದು ಕತಾರ್ ಅನ್ನು ವಿಶ್ವದ ಅತಿ ದೊಡ್ಡ ಎಲ್‌ಎನ್‌ಜಿ ರಫ್ತುದಾರ ರಾಷ್ಟ್ರವನ್ನಾಗಿ ಮಾಡಿದ್ದಲ್ಲದೆ, ಜಗತ್ತಿನ ಅತ್ಯಂತ ಶ್ರೀಮಂತ ದೇಶಗಳ ಸಾಲಿನಲ್ಲಿ ತಂದು ನಿಲ್ಲಿಸಿತು.

• ಅಲ್ ಜಜೀರಾ (Al Jazeera) ಮಾಧ್ಯಮದ ಸ್ಥಾಪನೆ: ಅರಬ್ ರಾಜಕೀಯದಲ್ಲಿ ಕತಾರ್‌ಗೆ ಒಂದು ಬಲವಾದ ಧ್ವನಿ ನೀಡಲು ಅವರು ‘ಅಲ್ ಜಜೀರಾ’ ಸುದ್ದಿ ಸಂಸ್ಥೆಯನ್ನು ಸ್ಥಾಪಿಸಿದರು. ಇದು ಜಾಗತಿಕ ಮಟ್ಟದಲ್ಲಿ ಮಧ್ಯಪ್ರಾಚ್ಯದ ಪ್ರಭಾವವನ್ನು ಹೆಚ್ಚಿಸಿತು.

• 2022 ರ ಫಿಫಾ ವಿಶ್ವಕಪ್ ಆತಿಥ್ಯ: ಜಗತ್ತಿನ ಅತಿ ದೊಡ್ಡ ಕ್ರೀಡಾಕೂಟವಾದ ಫಿಫಾ ಫುಟ್‌ಬಾಲ್ ವಿಶ್ವಕಪ್ ಆತಿಥ್ಯದ ಹಕ್ಕನ್ನು ಕತಾರ್ ಪಡೆಯುವಂತೆ ಮಾಡುವಲ್ಲಿ ಇವರ ಪಾತ್ರ ದೊಡ್ಡದಾಗಿತ್ತು. ಇದು ಕತಾರ್‌ನ ರಾಜಧಾನಿ ದೋಹಾದ ಇಡೀ ಮುಖಪುಟವನ್ನೇ ಬದಲಾಯಿಸಿತು.

ರಾಜತಾಂತ್ರಿಕತೆಯ ಚತುರ ಹಾಗೂ ವಿವಾದಗಳ ನಾಯಕ

ಅಮೆರಿಕದ ಸೆಂಟ್ರಲ್ ಕಮಾಂಡ್ ಮಿಲಿಟರಿ ನೆಲೆಯನ್ನೂ ಹೊಂದುವ ಜೊತೆಗೆ ಇರಾನ್ ದೇಶದೊಂದಿಗೂ ಉತ್ತಮ ಸಂಬಂಧ ಕಾಯ್ದುಕೊಳ್ಳುವ ಅಪರೂಪದ ಸಮತೋಲನ ರಾಜತಾಂತ್ರಿಕತೆಯನ್ನು ಶೇಖ್ ಹಮದ್ ರೂಢಿಸಿಕೊಂಡಿದ್ದರು. ಲೆಬನಾನ್, ಯೆಮೆನ್ ಮತ್ತು ಇತ್ತೀಚಿನ ಗಾಜಾ ಸಂಘರ್ಷದವರೆಗೂ ಕತಾರ್ ಒಂದು ಪ್ರಮುಖ ಸಂಧಾನಕಾರ ದೇಶವಾಗಿ ಬೆಳೆಯಲು ಇವರೇ ಅಡಿಪಾಯ ಹಾಕಿದ್ದರು.

35 ವರ್ಷಗಳ ಹಿಂದೆ ಪಡೆದ 1,000 ಸಾಲಕ್ಕೆ 25,000 ಮರಳಿಸಿದ ವ್ಯಕ್ತಿ!

ಆದರೆ, 2011ರ ‘ಅರಬ್ ಸ್ಪ್ರಿಂಗ್’ ಕ್ರಾಂತಿಯ ಸಮಯದಲ್ಲಿ ಇಸ್ಲಾಮಿಕ್ ಸಂಘಟನೆಗಳಿಗೆ ಬೆಂಬಲ ನೀಡಿದ ಕಾರಣಕ್ಕಾಗಿ ಇವರು ಸೌದಿ ಅರೇಬಿಯಾ ಮತ್ತು ಯುಎಇ ನಂತಹ ನೆರೆಹೊರೆಯ ಗಲ್ಫ್ ರಾಷ್ಟ್ರಗಳ ಕೆಂಗಣ್ಣಿಗೂ ಗುರಿಯಾಗಿದ್ದರು.

ಒಂದು ಯುಗದ ಅಂತ್ಯ:
ಶೇಖ್ ಹಮದ್ ಅವರ ಪತ್ನಿ ಶೇಖಾ ಮೋಝಾ ಬಿಂದ್ ನಾಸಿರ್ ಅವರು ಕೂಡ ಶಿಕ್ಷಣ ಮತ್ತು ಸಾಮಾಜಿಕ ಬದಲಾವಣೆಯ ಮೂಲಕ ಇವರ ಆಧುನೀಕರಣದ ಹಾದಿಗೆ ಪ್ರಬಲ ಶಕ್ತಿಯಾಗಿ ನಿಂತಿದ್ದರು. ಕತಾರ್ ಅನ್ನು ಕೇವಲ ಮರುಭೂಮಿಯ ತೈಲ ದೇಶ ಎಂಬ ಹಣೆಪಟ್ಟಿಯಿಂದ ಮುಕ್ತಗೊಳಿಸಿ, ಜಾಗತಿಕ ಆರ್ಥಿಕ ಮತ್ತು ರಾಜಕೀಯ ನಕ್ಷೆಯಲ್ಲಿ ಮಿನುಗುವಂತೆ ಮಾಡಿದ ಧೀಮಂತ ನಾಯಕರೊಬ್ಬರ ಪಯಣ ಈಗ ಕೊನೆಗೊಂಡಿದೆ.