ಅಪಘಾತ ಆದವರಿಗೆ ಸಹಾಯ ಮಾಡಿ ಸೂಪರ್‌ ಹೀರೋ ಆಗಿ; ರಸ್ತೆ ವೀರ ಯೋಜನೆ ಜಾರಿ

Rashtriya veer yojana online registration: ರಸ್ತೆ ಅಪಘಾತದ ಸಮಯದಲ್ಲಿ ಸಂತ್ರಸ್ತರಿಗೆ ತಕ್ಷಣದ ನೆರವು ನೀಡಿ ಅವರ ಪ್ರಾಣ ಉಳಿಸುವ ಸಾಮಾನ್ಯ ನಾಗರಿಕರನ್ನು ಪ್ರೋತ್ಸಾಹಿಸಲು ಕೇಂದ್ರ ಸರ್ಕಾರವು ‘ರಸ್ತೆಯ ವೀರ’ (Rah-Veer) ಎಂಬ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಜಾರಿಗೆ ತಂದಿದೆ. ಅಪಘಾತಕ್ಕೀಡಾದವರನ್ನು ಸಮಯಕ್ಕೆ ಸರಿಯಾಗಿ ಆಸ್ಪತ್ರೆಗೆ ಸೇರಿಸುವ ‘ಉತ್ತಮ ನೆರೆಹೊರೆಯವರಿಗೆ’ (Good Samaritans) ಈ ಯೋಜನೆಯಡಿ ಭರ್ಜರಿ ನಗದು ಬಹುಮಾನ ಮತ್ತು ಗೌರವವನ್ನು ನೀಡಲಾಗುತ್ತಿದೆ.

ಯೋಜನೆಯ ಮುಖ್ಯ ಉದ್ದೇಶಗಳು: ರಸ್ತೆ ಅಪಘಾತ ಸಂಭವಿಸಿದ ಮೊದಲ ಒಂದು ಗಂಟೆ (Golden Hour) ಅತ್ಯಂತ ನಿರ್ಣಾಯಕವಾಗಿರುತ್ತದೆ. ಈ ಸಮಯದಲ್ಲಿ ಚಿಕಿತ್ಸೆ ದೊರೆತರೆ ಶೇ. 80ರಷ್ಟು ಜೀವಗಳನ್ನು ಉಳಿಸಬಹುದು. ಜನರು ಪೋಲೀಸ್ ವಿಚಾರಣೆ ಅಥವಾ ಕಾನೂನು ಕಿರಿಕಿರಿಗಳಿಗೆ ಹೆದರಿ ಸಹಾಯಕ್ಕೆ ಬರುವುದಿಲ್ಲ ಎಂಬ ಕಾರಣಕ್ಕೆ ಈ ಯೋಜನೆಯನ್ನು ರೂಪಿಸಲಾಗಿದೆ.

ಸಹಾಯ ಮಾಡುವವರಿಗೆ ಸಿಗುವ ಸೌಲಭ್ಯಗಳು:

ನಗದು ಬಹುಮಾನ: ಅಪಘಾತಕ್ಕೀಡಾದವರನ್ನು ಆಸ್ಪತ್ರೆಗೆ ದಾಖಲಿಸಿ ಅವರ ಪ್ರಾಣ ಉಳಿಸಲು ಸಹಕರಿಸಿದ ‘ರಸ್ತೆಯ ವೀರ’ನಿಗೆ 25,000 ರೂ. ನಗದು ಬಹುಮಾನ ನೀಡಲಾಗುತ್ತದೆ.

ಪ್ರಶಸ್ತಿ ಪತ್ರ: ಹಣದ ಜೊತೆಗೆ ಸರ್ಕಾರದ ವತಿಯಿಂದ ಅಧಿಕೃತ ‘ಪ್ರಶಂಸಾ ಪತ್ರ’ವನ್ನು ನೀಡಿ ಗೌರವಿಸಲಾಗುತ್ತದೆ.

ರಾಷ್ಟ್ರೀಯ ಮನ್ನಣೆ: ಪ್ರತಿ ವರ್ಷ ದೇಶಾದ್ಯಂತ ಆಯ್ದ 10 ಅತ್ಯುತ್ತಮ ‘ರಸ್ತೆಯ ವೀರ’ರಿಗೆ ರಾಷ್ಟ್ರ ಮಟ್ಟದಲ್ಲಿ 1 ಲಕ್ಷ ರೂ. ಬಹುಮಾನ ಮತ್ತು ಟ್ರೋಫಿ ನೀಡಲಾಗುತ್ತದೆ.

ಕಾನೂನು ರಕ್ಷಣೆ: ಸಹಾಯ ಮಾಡಿದ ವ್ಯಕ್ತಿಯನ್ನು ಪೊಲೀಸರು ಅಥವಾ ಆಸ್ಪತ್ರೆಯವರು ಬಲವಂತವಾಗಿ ನಿಲ್ಲಿಸುವಂತಿಲ್ಲ. ಸಾಕ್ಷ್ಯ ಹೇಳುವುದು ಆ ವ್ಯಕ್ತಿಯ ಇಚ್ಛೆಗೆ ಬಿಟ್ಟ ವಿಚಾರವಾಗಿದ್ದು, ಸಂಪೂರ್ಣ ಗೌಪ್ಯತೆಯನ್ನು ಕಾಪಾಡಲಾಗುತ್ತದೆ.

ದುಬೈ vs ಭಾರತ: ಚಿನ್ನ, ಬೆಳ್ಳಿ ಎಲ್ಲಿ ಖರೀದಿ ಲಾಭ? ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್

ಯಾರು ಅರ್ಹರು?

ಭಾರತದ ಯಾವುದೇ ನಾಗರಿಕ ಈ ಯೋಜನೆಯ ಲಾಭ ಪಡೆಯಬಹುದು.

ಗಂಭೀರ ರಸ್ತೆ ಅಪಘಾತದಲ್ಲಿ ಗಾಯಗೊಂಡವರನ್ನು ಗೋಲ್ಡನ್ ಅವರ್ ಒಳಗೆ ಆಸ್ಪತ್ರೆಗೆ ಅಥವಾ ಟ್ರಾಮಾ ಕೇರ್ ಸೆಂಟರ್‌ಗೆ ತಲುಪಿಸಿರಬೇಕು.

ವೈದ್ಯರು ಸಂತ್ರಸ್ತನ ಸ್ಥಿತಿಯನ್ನು ಪರಿಶೀಲಿಸಿ, ಸಹಾಯ ಮಾಡಿದ ವ್ಯಕ್ತಿಯ ವಿವರಗಳನ್ನು ಜಿಲ್ಲಾ ಸಮಿತಿಗೆ ಶಿಫಾರಸು ಮಾಡುತ್ತಾರೆ.

ಈ ಯೋಜನೆಯ ಮೂಲಕ ರಸ್ತೆಯಲ್ಲಿ ಪ್ರತಿಯೊಬ್ಬರೂ ಒಬ್ಬರನ್ನೊಬ್ಬರು ರಕ್ಷಿಸುವ ‘ಸೂಪರ್ ಹೀರೊ’ಗಳಾಗಬೇಕು ಎಂಬುದು ಸರ್ಕಾರದ ಆಶಯವಾಗಿದೆ.