ಎಚ್ಚರ: ಬಾಯಿ ಮೂಲಕ ಉಸಿರಾಡುವ ಅಭ್ಯಾಸ ಮಾರಕವಾಗಬಹುದು!

Mouth Breathing Health Issues: ಸಾಮಾನ್ಯವಾಗಿ ನೆಗಡಿಯಾದಾಗ ಅಥವಾ ಮೂಗು ಕಟ್ಟಿದಾಗ ನಾವು ಬಾಯಿ ಮೂಲಕ ಉಸಿರಾಡುತ್ತೇವೆ. ಆದರೆ, ಇದು ಅಭ್ಯಾಸವಾಗಿ ಬದಲಾದರೆ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ವೈದ್ಯರು ಎಚ್ಚರಿಸಿದ್ದಾರೆ. ಆಧುನಿಕ ಜೀವನಶೈಲಿಯಲ್ಲಿ ‘ಬಾಯಿ ಮೂಲಕ ಉಸಿರಾಟ’ (Mouth-breathing) ಒಂದು ನಿಶಬ್ದ ಸಾಂಕ್ರಾಮಿಕ ರೋಗದಂತೆ ಹರಡುತ್ತಿದ್ದು, ವಿಶೇಷವಾಗಿ ಮಕ್ಕಳು ಮತ್ತು ಯುವಜನರಲ್ಲಿ ಹೆಚ್ಚಾಗಿ ಕಂಡುಬರುತ್ತಿದೆ.

ಮೂಗಿನ ಬದಲು ಬಾಯಿ ಮೂಲಕ ಯಾಕೆ ಉಸಿರಾಡುತ್ತಾರೆ?
ಪರಿಣಿತ ವೈದ್ಯರ ಪ್ರಕಾರ, ಅತಿಯಾದ ಸ್ಕ್ರೀನ್ ಟೈಮ್, ಕೆಟ್ಟ ಭಂಗಿ (Poor Posture), ಮಾಲಿನ್ಯ, ಅಲರ್ಜಿಗಳು ಮತ್ತು ಸದಾ ಹವಾನಿಯಂತ್ರಿತ (AC) ವಾತಾವರಣದಲ್ಲಿ ಇರುವುದು ಮೂಗಿನ ಹೊಳ್ಳೆಗಳು ಒಣಗಲು ಅಥವಾ ಕಟ್ಟಿಕೊಳ್ಳಲು ಕಾರಣವಾಗುತ್ತವೆ. ಇದರ ಜೊತೆಗೆ ಮಾನಸಿಕ ಒತ್ತಡ ಮತ್ತು ಆತಂಕವು ಉಸಿರಾಟದ ಕ್ರಮವನ್ನು ಬದಲಿಸಿ, ಜನರು ಅರಿವಿಲ್ಲದೆಯೇ ಬಾಯಿಯ ಮೂಲಕ ಗಾಳಿಯನ್ನು ಎಳೆದುಕೊಳ್ಳುವಂತೆ ಮಾಡುತ್ತದೆ.

ಇದರಿಂದಾಗುವ ತೊಂದರೆಗಳು
ಮೂಗು ನೈಸರ್ಗಿಕವಾಗಿ ಗಾಳಿಯನ್ನು ಸೋಸಿ, ಹಸಿಯಾಗಿಸಿ ಶ್ವಾಸಕೋಶಕ್ಕೆ ಕಳುಹಿಸುತ್ತದೆ. ಆದರೆ ಬಾಯಿ ಮೂಲಕ ನೇರವಾಗಿ ಶ್ವಾಸನಾಳಕ್ಕೆ ಹೋಗುವ ತಣ್ಣನೆಯ ಮತ್ತು ಅಶುದ್ಧ ಗಾಳಿಯು ಗಂಟಲು ಸೋಂಕು, ಬಾಯಿ ಒಣಗುವಿಕೆ ಮತ್ತು ದುರ್ವಾಸನೆಗೆ ಕಾರಣವಾಗುತ್ತದೆ. ಅಷ್ಟೇ ಅಲ್ಲದೆ, ಇದು ಹಲ್ಲಿನ ಕುಳಿಗಳು (Cavities) ಮತ್ತು ಒಸಡಿನ ಕಾಯಿಲೆಗಳನ್ನು ತಂದೊಡ್ಡುತ್ತದೆ. ಮಕ್ಕಳಲ್ಲಿ ಇದು ಮುಖದ ಆಕಾರ ಬದಲಾಗಲು ಮತ್ತು ಹಲ್ಲುಗಳ ಜೋಡಣೆ ಅಸ್ತವ್ಯಸ್ತಗೊಳ್ಳಲು ಕಾರಣವಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಬರೋಬ್ಬರಿ 61,000 ಅಭ್ಯರ್ಥಿಗಳಿಗೆ ಉದ್ಯೋಗ ನೇಮಕಾತಿ ಪತ್ರ ವಿತರಿಸಿದ ಪ್ರಧಾನಿ ಮೋದಿ

ನಿದ್ರೆಯ ಮೇಲೆ ಪರಿಣಾಮ
ಬಾಯಿ ಮೂಲಕ ಉಸಿರಾಡುವವರು ಹೆಚ್ಚಾಗಿ ಗೊರಕೆ ಹೊಡೆಯುತ್ತಾರೆ ಮತ್ತು ಅವರ ನಿದ್ರೆಯು ಅರ್ಧಕ್ಕೇ ವ್ಯತ್ಯಯಗೊಳ್ಳುತ್ತದೆ. ಇದರಿಂದ ಮರುದಿನ ಬೆಳಗ್ಗೆ ತಲೆನೋವು, ಆಯಾಸ ಮತ್ತು ಕೆಲಸದಲ್ಲಿ ಏಕಾಗ್ರತೆಯ ಕೊರತೆ ಉಂಟಾಗುತ್ತದೆ. ದೀರ್ಘಕಾಲದವರೆಗೆ ಈ ಅಭ್ಯಾಸ ಮುಂದುವರಿದರೆ ರಕ್ತದೊತ್ತಡ ಮತ್ತು ಹೃದಯದ ಆರೋಗ್ಯದ ಮೇಲೂ ಪರಿಣಾಮ ಬೀರಬಹುದು.

ಪರಿಹಾರವೇನು?
ಈ ಸಮಸ್ಯೆಯನ್ನು ಆರಂಭಿಕ ಹಂತದಲ್ಲೇ ಗುರುತಿಸಿ ಸರಿಪಡಿಸಬಹುದು. ಅಲರ್ಜಿ ಅಥವಾ ಮೂಗಿನ ಹೊಳ್ಳೆಗಳ ಸಮಸ್ಯೆಯಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ. ಇದರೊಂದಿಗೆ ಉತ್ತಮ ದೈಹಿಕ ಭಂಗಿ ಕಾಪಾಡಿಕೊಳ್ಳುವುದು, ಪ್ರಾಣಾಯಾಮ ಅಥವಾ ಉಸಿರಾಟದ ವ್ಯಾಯಾಮಗಳನ್ನು ಮಾಡುವುದು ಮತ್ತು ಮಲಗುವ ಮುನ್ನ ಸ್ಕ್ರೀನ್ ಸಮಯವನ್ನು ಕಡಿಮೆ ಮಾಡುವುದರಿಂದ ಈ ಸಮಸ್ಯೆಯಿಂದ ಮುಕ್ತಿ ಪಡೆಯಬಹುದು.