ಡಬಲ್ ಗ್ಯಾಸ್ ಸಂಪರ್ಕ ಇದ್ದರೆ ಎಚ್ಚರ, ಗ್ಯಾಸ್ ಸಂಪರ್ಕವೇ ರದ್ದು! ಸರ್ಕಾರ ಖಡಕ್ ಸೂಚನೆ
ಪಿಎನ್ಜಿ ಹಾಗೂ ಎಲ್ಪಿಜಿ ಎರಡನ್ನೂ ಹೊಂದಿರುವ ಕುಟುಂಬಗಳಿಗೆ ಸರ್ಕಾರ ಹೊಸ ಸೂಚನೆ ನೀಡಿದೆ. 30 ದಿನಗಳೊಳಗೆ ಹೆಚ್ಚುವರಿ ಸಂಪರ್ಕ ಕೈಬಿಡದಿದ್ದರೆ ಸೇವೆ ಸ್ಥಗಿತಗೊಳ್ಳಬಹುದು ಎಂದು ಎಚ್ಚರಿಕೆ ನೀಡಲಾಗಿದೆ.
ದೇಶಾದ್ಯಂತ ಪಿಎನ್ಜಿ ಸಂಪರ್ಕಗಳ ಸಂಖ್ಯೆ ವೇಗವಾಗಿ ಹೆಚ್ಚುತ್ತಿದ್ದರೂ, ಎಲ್ಪಿಜಿ ಬಳಕೆಯಲ್ಲಿ ನಿರೀಕ್ಷಿತ ಇಳಿಕೆ ಕಂಡುಬಂದಿಲ್ಲ. ಈ ಹಿನ್ನೆಲೆಯಲ್ಲಿ ಸರ್ಕಾರ ಡ್ಯುಯಲ್ ಗ್ಯಾಸ್ ಸಂಪರ್ಕಗಳ ಪರಿಶೀಲನೆ ಆರಂಭಿಸಿದ್ದು, ಹೆಚ್ಚುವರಿ ಸಂಪರ್ಕಗಳ ವಿರುದ್ಧ ಕ್ರಮಕ್ಕೆ ಮುಂದಾಗಿದೆ.
ಅಧಿಕಾರಿಗಳ ಪ್ರಕಾರ, ಒಂದೇ ಕುಟುಂಬದಲ್ಲಿ ಪಿಎನ್ಜಿ ಸೌಲಭ್ಯ ಲಭ್ಯವಿದ್ದರೂ ಹಳೆಯ ಎಲ್ಪಿಜಿ ಸಂಪರ್ಕವನ್ನು ಅನೇಕರು ಮುಂದುವರಿಸಿದ್ದಾರೆ. ಇದರಿಂದ ಅನಿಲ ವಿತರಣಾ ವ್ಯವಸ್ಥೆಯ ಮೇಲಿನ ಒತ್ತಡ ಹೆಚ್ಚಾಗುತ್ತಿದೆ ಎನ್ನಲಾಗಿದೆ.
ಈ ಕಾರಣಕ್ಕಾಗಿ ಪಿಎನ್ಜಿ ಮತ್ತು ಎಲ್ಪಿಜಿ ಎರಡನ್ನೂ ಹೊಂದಿರುವ ಗ್ರಾಹಕರಿಗೆ 30 ದಿನಗಳ ಗಡುವು ನೀಡಲಾಗಿದೆ. ಈ ಅವಧಿಯಲ್ಲಿ ಅನಗತ್ಯ ಎಲ್ಪಿಜಿ ಸಂಪರ್ಕವನ್ನು ಹಿಂತಿರುಗಿಸದಿದ್ದರೆ, ಸಂಬಂಧಿತ ಸಂಪರ್ಕವನ್ನು ರದ್ದುಪಡಿಸುವ ಸಾಧ್ಯತೆ ಇದೆ.
ಒಂದಕ್ಕಿಂತ ಹೆಚ್ಚು ಗ್ಯಾಸ್ ಸಂಪರ್ಕ ಹೊಂದಿರುವುದು ಪತ್ತೆಯಾದರೆ ಮೊದಲು ಪೂರೈಕೆಯನ್ನು ಸ್ಥಗಿತಗೊಳಿಸಲಾಗುತ್ತದೆ. ಬಳಿಕ ಹೆಚ್ಚುವರಿ ಸಂಪರ್ಕಗಳನ್ನು ಕೈಬಿಟ್ಟ ನಂತರವೇ ಸೇವೆ ಮರುಸ್ಥಾಪನೆ ಆಗುವ ಸಾಧ್ಯತೆ ಇದೆ.
ಕುಟುಂಬದ ಎಲ್ಲ ಸದಸ್ಯರು ಒಂದೇ ಅಡುಗೆಮನೆ ಬಳಸುತ್ತಿದ್ದರೆ, ಒಂದು ಕುಟುಂಬಕ್ಕೆ ಒಂದು ಎಲ್ಪಿಜಿ ಸಂಪರ್ಕ ಎಂಬ ನಿಯಮ ಅನ್ವಯವಾಗಲಿದೆ. ಇದರಿಂದ ಸಬ್ಸಿಡಿ ವ್ಯವಸ್ಥೆಯನ್ನು ಸಮರ್ಪಕವಾಗಿ ನಿರ್ವಹಿಸಲು ಸಹಾಯವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಸರ್ಕಾರ ಪಿಎನ್ಜಿ ಬಳಕೆಯನ್ನು ಉತ್ತೇಜಿಸಲು ಹೆಚ್ಚಿನ ಒತ್ತು ನೀಡುತ್ತಿದ್ದು, ಇತ್ತೀಚಿನ ತಿಂಗಳುಗಳಲ್ಲಿ ಲಕ್ಷಾಂತರ ಹೊಸ ಸಂಪರ್ಕಗಳನ್ನು ಒದಗಿಸಿದೆ. ಆದರೂ ಎಲ್ಪಿಜಿ ಬೇಡಿಕೆ ಹೆಚ್ಚಾಗಿಯೇ ಉಳಿದಿರುವುದರಿಂದ ಹೊಸ ನಿಯಮಗಳಿಗೆ ಮಹತ್ವ ಬಂದಿದೆ.
