ಆಧಾರ್ ಕಾರ್ಡ್ನ ಹಳೆಯ ಫೋಟೋಗೆ ಗುಡ್ಬೈ! ಹೊಸ ಫೋಟೋ ಹಾಕುವುದು ತುಂಬಾ ಸುಲಭ
ಆಧಾರ್ ಕಾರ್ಡ್ನಲ್ಲಿರುವ ಹಳೆಯ ಅಥವಾ ಸ್ಪಷ್ಟವಲ್ಲದ ಫೋಟೋದಿಂದ ತೊಂದರೆ ಅನುಭವಿಸುತ್ತಿದ್ದರೆ, ಸಮೀಪದ ಆಧಾರ್ ಕೇಂದ್ರಕ್ಕೆ ಭೇಟಿ ನೀಡಿ ಸುಲಭವಾಗಿ ಹೊಸ ಫೋಟೋ ಅಪ್ಡೇಟ್ ಮಾಡಿಸಿಕೊಳ್ಳಬಹುದು.
ನವದೆಹಲಿ: ಆಧಾರ್ ಕಾರ್ಡ್ ಇಂದು ದೇಶದ ಅತ್ಯಂತ ಪ್ರಮುಖ ಗುರುತಿನ ದಾಖಲೆಗಳಲ್ಲಿ ಒಂದಾಗಿದೆ. ಬ್ಯಾಂಕ್ ಖಾತೆ ತೆರೆಯುವುದರಿಂದ ಹಿಡಿದು ಸರ್ಕಾರಿ ಯೋಜನೆಗಳ ಲಾಭ ಪಡೆಯುವವರೆಗೂ ಬಹುತೇಕ ಎಲ್ಲ ಸೇವೆಗಳಿಗೂ ಆಧಾರ್ ಅಗತ್ಯವಾಗಿದೆ. ಇಂತಹ ಮಹತ್ವದ ದಾಖಲೆಯಲ್ಲಿರುವ ಮಾಹಿತಿ ಮತ್ತು ಫೋಟೋ ಸ್ಪಷ್ಟವಾಗಿರುವುದು ಬಹಳ ಮುಖ್ಯ.
ಅನೇಕರು ಹಲವು ವರ್ಷಗಳ ಹಿಂದೆ ತೆಗೆಸಿದ ಫೋಟೋವನ್ನೇ ಆಧಾರ್ ಕಾರ್ಡ್ನಲ್ಲಿ ಹೊಂದಿದ್ದಾರೆ. ಕೆಲವೊಮ್ಮೆ ಫೋಟೋ ಅಸ್ಪಷ್ಟವಾಗಿರಬಹುದು ಅಥವಾ ವ್ಯಕ್ತಿಯ ಇತ್ತೀಚಿನ ರೂಪಕ್ಕೆ ಹೊಂದಿಕೆಯಾಗದಿರಬಹುದು. ಇಂತಹ ಸಂದರ್ಭಗಳಲ್ಲಿ ಗುರುತಿನ ಪರಿಶೀಲನೆ ವೇಳೆ ಅನಗತ್ಯ ಸಮಸ್ಯೆಗಳು ಎದುರಾಗುವ ಸಾಧ್ಯತೆ ಇರುತ್ತದೆ.
ಇದನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಆಧಾರ್ ಕಾರ್ಡ್ನಲ್ಲಿರುವ ಫೋಟೋ ಬದಲಾಯಿಸಲು ಅವಕಾಶ ನೀಡಿದೆ. ಆದರೆ ಈ ಪ್ರಕ್ರಿಯೆಯನ್ನು ಆನ್ಲೈನ್ ಮೂಲಕ ಪೂರ್ಣಗೊಳಿಸಲು ಸಾಧ್ಯವಿಲ್ಲ. ಫಲಾನುಭವಿಗಳು ಕಡ್ಡಾಯವಾಗಿ ಅಧಿಕೃತ ಆಧಾರ್ ಸೇವಾ ಕೇಂದ್ರಕ್ಕೆ ಭೇಟಿ ನೀಡಬೇಕು.
ಫೋಟೋ ಬದಲಾಯಿಸಲು ಮೊದಲು ಸಮೀಪದ ಆಧಾರ್ ಸೇವಾ ಕೇಂದ್ರಕ್ಕೆ ತೆರಳಿ ಆಧಾರ್ ಅಪ್ಡೇಟ್ ಅರ್ಜಿಯನ್ನು ಪಡೆದುಕೊಳ್ಳಬೇಕು. ಅರ್ಜಿಯಲ್ಲಿ ಅಗತ್ಯ ಮಾಹಿತಿಯನ್ನು ಸರಿಯಾಗಿ ಭರ್ತಿ ಮಾಡಿ ಅಧಿಕಾರಿಗಳಿಗೆ ಸಲ್ಲಿಸಬೇಕು.
ಅರ್ಜಿ ಸಲ್ಲಿಸಿದ ನಂತರ ಬಯೋಮೆಟ್ರಿಕ್ ಪರಿಶೀಲನೆ ನಡೆಸಲಾಗುತ್ತದೆ. ಬೆರಳಚ್ಚು ಮತ್ತು ಕಣ್ಣಿನ ಸ್ಕ್ಯಾನ್ ಸೇರಿದಂತೆ ಅಗತ್ಯ ಮಾಹಿತಿಯನ್ನು ಪರಿಶೀಲಿಸಿದ ಬಳಿಕ ಕೇಂದ್ರದಲ್ಲೇ ಹೊಸ ಫೋಟೋ ತೆಗೆದುಕೊಳ್ಳಲಾಗುತ್ತದೆ. ಇದೇ ಫೋಟೋ ನಂತರ ನಿಮ್ಮ ಆಧಾರ್ ದಾಖಲೆಯಲ್ಲಿ ಅಪ್ಡೇಟ್ ಆಗುತ್ತದೆ.
ಈ ಸೇವೆಗೆ ನಿಗದಿತ ಶುಲ್ಕ ಪಾವತಿಸಬೇಕಾಗುತ್ತದೆ. ಶುಲ್ಕ ಪಾವತಿಸಿದ ಬಳಿಕ ಅಪ್ಡೇಟ್ ವಿನಂತಿಯ ಸಂಖ್ಯೆಯಿರುವ ಸ್ವೀಕೃತಿ ಪತ್ರವನ್ನು ನೀಡಲಾಗುತ್ತದೆ. ಅದರ ಸಹಾಯದಿಂದ ಅಪ್ಡೇಟ್ ಪ್ರಕ್ರಿಯೆಯ ಸ್ಥಿತಿಯನ್ನು ಆನ್ಲೈನ್ನಲ್ಲಿ ಪರಿಶೀಲಿಸಬಹುದು.
UIDAI ದಾಖಲೆಗಳಲ್ಲಿ ಹೊಸ ಫೋಟೋ ಅಪ್ಡೇಟ್ ಆದ ನಂತರ, ಅಧಿಕೃತ ವೆಬ್ಸೈಟ್ನಿಂದ ಇ-ಆಧಾರ್ ಡೌನ್ಲೋಡ್ ಮಾಡಬಹುದು. ಹೊಸದಾಗಿ ಡೌನ್ಲೋಡ್ ಮಾಡಿದ ಆಧಾರ್ನಲ್ಲಿ ನವೀಕರಿಸಿದ ಫೋಟೋ ಕಾಣಿಸಿಕೊಳ್ಳುತ್ತದೆ.
ಆಧಾರ್ ಕಾರ್ಡ್ನಲ್ಲಿ ಸ್ಪಷ್ಟ ಮತ್ತು ಇತ್ತೀಚಿನ ಫೋಟೋ ಇರುವುದು ಹಲವು ಸಂದರ್ಭಗಳಲ್ಲಿ ಗುರುತಿನ ಪರಿಶೀಲನೆಯನ್ನು ಸುಲಭಗೊಳಿಸುತ್ತದೆ. ಹೀಗಾಗಿ ಹಳೆಯ ಅಥವಾ ಅಸ್ಪಷ್ಟ ಫೋಟೋ ಹೊಂದಿರುವವರು ಈ ಸೌಲಭ್ಯದ ಪ್ರಯೋಜನ ಪಡೆಯಬಹುದು.
