ನಿಮ್ಮ ಸಂಬಳಕ್ಕೆ ತಕ್ಕ ಬೈಕ್ ಆಯ್ಕೆ ಮಾಡಿ! ಇಲ್ಲಿದೆ ಬೈಕ್ ಫಾರ್ಮುಲಾ ಬಜೆಟ್

ಇಂದಿನ ಯುವಕರಲ್ಲಿ ಬೈಕ್ ಖರೀದಿಸುವ ಆಸೆ ಸಾಮಾನ್ಯ. ಉದ್ಯೋಗ ಸಿಕ್ಕ ಬಳಿಕ ತಮ್ಮ ನೆಚ್ಚಿನ ಬೈಕ್ ಖರೀದಿಸಬೇಕು ಎನ್ನುವುದು ಅನೇಕರ ಕನಸು. ಆದರೆ ಹಲವರು ಆದಾಯಕ್ಕಿಂತ ಹೆಚ್ಚು ಬೆಲೆಯ ಬೈಕ್ ಖರೀದಿಸಿ ನಂತರ ಮಾಸಿಕ ಕಂತು (EMI) ಕಟ್ಟಲು ಸಂಕಷ್ಟ ಅನುಭವಿಸುತ್ತಾರೆ.

ಹಣಕಾಸು ತಜ್ಞರ ಪ್ರಕಾರ, ಬೈಕ್ ಖರೀದಿಸುವಾಗ ಆದಾಯಕ್ಕೆ ತಕ್ಕ ಬಜೆಟ್ ನಿಗದಿಪಡಿಸುವುದು ಅತ್ಯಂತ ಮುಖ್ಯ. ಇದಕ್ಕಾಗಿ 10-3-15 ನಿಯಮವನ್ನು ಅನುಸರಿಸಿದರೆ ಖರೀದಿ ನಿರ್ಧಾರ ಸುಲಭವಾಗುತ್ತದೆ.

ಈ ನಿಯಮದ ಪ್ರಕಾರ, ಬೈಕ್ ಬೆಲೆಯ ಕನಿಷ್ಠ 10 ಶೇಕಡಾ ಮೊತ್ತವನ್ನು ಮುಂಗಡ ಪಾವತಿಯಾಗಿ ನೀಡಬೇಕು. ಉಳಿದ ಮೊತ್ತವನ್ನು ಸಾಲದ ಮೂಲಕ ಪಡೆದು ಮೂರು ವರ್ಷಗಳೊಳಗೆ ಮರುಪಾವತಿಸಬೇಕು. ಸಾಲದ ಅವಧಿ ಮೂರು ವರ್ಷ ಮೀರದಿರುವುದು ಉತ್ತಮ ಎಂದು ಸಲಹೆ ನೀಡಲಾಗುತ್ತದೆ.

ಇದರ ಜೊತೆಗೆ ಮಾಸಿಕ EMI ನಿಮ್ಮ ಕೈಗೆ ಬರುವ ಸಂಬಳದ 15 ಶೇಕಡಾವನ್ನು ಮೀರಬಾರದು. ಈ ಮಿತಿಯನ್ನು ಪಾಲಿಸಿದರೆ ಕುಟುಂಬದ ಇತರ ಖರ್ಚುಗಳ ಮೇಲೆ ಹೆಚ್ಚಿನ ಒತ್ತಡ ಉಂಟಾಗುವುದಿಲ್ಲ.

ಉದಾಹರಣೆಗೆ, ತಿಂಗಳಿಗೆ 20 ಸಾವಿರ ರೂಪಾಯಿ ಸಂಬಳ ಪಡೆಯುವ ವ್ಯಕ್ತಿಯ EMI ಸುಮಾರು 3 ಸಾವಿರ ರೂಪಾಯಿಗಳ ಒಳಗೇ ಇರಬೇಕು. ಈ ಲೆಕ್ಕಾಚಾರದಲ್ಲಿ ಸುಮಾರು 1 ಲಕ್ಷ ರೂಪಾಯಿವರೆಗಿನ ಬೈಕ್ ಖರೀದಿಸುವುದು ಸೂಕ್ತ ಎನ್ನಲಾಗುತ್ತದೆ.

ತಿಂಗಳಿಗೆ 30 ಸಾವಿರ ರೂಪಾಯಿ ಆದಾಯ ಹೊಂದಿರುವವರು ಸುಮಾರು 4,500 ರೂಪಾಯಿವರೆಗಿನ EMI ಪಾವತಿಸಬಹುದು. ಇಂತಹ ಸಂದರ್ಭದಲ್ಲಿ ಸುಮಾರು 1.6 ಲಕ್ಷ ರೂಪಾಯಿವರೆಗಿನ ಬೈಕ್ ಆಯ್ಕೆ ಮಾಡುವುದು ಹಣಕಾಸಿನ ದೃಷ್ಟಿಯಿಂದ ಸುರಕ್ಷಿತವಾಗಿರುತ್ತದೆ.

ಅದೇ ರೀತಿ, 50 ಸಾವಿರ ರೂಪಾಯಿ ಮಾಸಿಕ ಸಂಬಳ ಹೊಂದಿರುವವರಿಗೆ ಸುಮಾರು 7,500 ರೂಪಾಯಿ EMI ಅನುಕೂಲಕರ. ಈ ಆದಾಯದಲ್ಲಿ ಸುಮಾರು 2.7 ಲಕ್ಷ ರೂಪಾಯಿವರೆಗಿನ ಬೈಕ್ ಖರೀದಿಸಬಹುದು ಎಂದು ಹಣಕಾಸು ತಜ್ಞರು ಅಭಿಪ್ರಾಯಪಡುತ್ತಾರೆ.

ಯಾವುದೇ ವಾಹನ ಖರೀದಿಸುವಾಗ ಕೇವಲ ಆಸೆಯನ್ನು ನೋಡದೆ, ಆದಾಯ ಮತ್ತು ಭವಿಷ್ಯದ ಖರ್ಚುಗಳನ್ನು ಪರಿಗಣಿಸುವುದು ಮುಖ್ಯ. ಸರಿಯಾದ ಯೋಜನೆಯೊಂದಿಗೆ ಖರೀದಿ ಮಾಡಿದರೆ ಕನಸಿನ ಬೈಕ್ ಕೂಡ ನಿಮ್ಮ ಆರ್ಥಿಕ ಸ್ಥಿತಿಗೆ ಹೊರೆ ಆಗುವುದಿಲ್ಲ.