ನೋಕಿಯಾದಿಂದ ಹೊಸ 4G ಫೋನ್‌ಗಳು; AI ಫೀಚರ್‌ಗಳೊಂದಿಗೆ ಎಂಟ್ರಿ

ಸ್ಮಾರ್ಟ್‌ಫೋನ್ ಯುಗದಲ್ಲಿಯೂ ಫೀಚರ್ ಫೋನ್‌ಗಳಿಗೆ ಬೇಡಿಕೆ ಕಡಿಮೆಯಾಗಿಲ್ಲ. ಇದನ್ನು ಗಮನದಲ್ಲಿಟ್ಟುಕೊಂಡು ಎಚ್‌ಎಂಡಿ ಗ್ಲೋಬಲ್, ಹೊಸ ನೋಕಿಯಾ 4G ಫೀಚರ್ ಫೋನ್‌ಗಳ ಸರಣಿಯನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ಕಡಿಮೆ ಬೆಲೆಯಲ್ಲಿ ಆಧುನಿಕ ಸೌಲಭ್ಯಗಳನ್ನು ಬಯಸುವ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ಈ ಮಾದರಿಗಳನ್ನು ಅಭಿವೃದ್ಧಿಪಡಿಸಲಾಗಿದೆ.

ಕಂಪನಿಯು Nokia 210 4G, Nokia 215 4G, Nokia 235 4G ಮತ್ತು Nokia 200 4G ಮಾದರಿಗಳನ್ನು ಬಿಡುಗಡೆ ಮಾಡಿದೆ. ಸಾಂಪ್ರದಾಯಿಕ ಕೀಪ್ಯಾಡ್ ವಿನ್ಯಾಸವನ್ನು ಉಳಿಸಿಕೊಂಡಿದ್ದರೂ, ಹಲವು ಹೊಸ ತಂತ್ರಜ್ಞಾನಗಳನ್ನು ಸೇರಿಸಿರುವುದು ಈ ಫೋನ್‌ಗಳ ವಿಶೇಷತೆಯಾಗಿದೆ.

ಈ ಹೊಸ ಸರಣಿಯಲ್ಲಿ AI ಅಸಿಸ್ಟೆಂಟ್ ಬಟನ್ ಪ್ರಮುಖ ಆಕರ್ಷಣೆಯಾಗಿದೆ. ಧ್ವನಿ ಆದೇಶದ ಮೂಲಕ ಟಾರ್ಚ್ ಆನ್ ಮಾಡುವುದು, ಕ್ಯಾಮೆರಾ ತೆರೆಯುವುದು, ಅಲಾರಂ ಹೊಂದಿಸುವುದು ಹಾಗೂ ಕರೆ ಮಾಡುವಂತಹ ಕೆಲಸಗಳನ್ನು ಸುಲಭವಾಗಿ ನಿರ್ವಹಿಸಬಹುದು. ಈ AI ಸೇವೆ ಆರಂಭಿಕ 180 ದಿನಗಳವರೆಗೆ ಉಚಿತವಾಗಿ ಲಭ್ಯವಾಗಲಿದೆ.

ಇದರ ಜೊತೆಗೆ ಕ್ಲೌಡ್ ಸೇವೆಯನ್ನೂ ನೀಡಲಾಗಿದ್ದು, ಫೋನ್‌ನಲ್ಲಿ ಹೆಚ್ಚಿನ ಸ್ಟೋರೇಜ್ ಅಗತ್ಯವಿಲ್ಲದೆ ಇಂಟರ್ನೆಟ್ ಮೂಲಕ ಹವಾಮಾನ ಮಾಹಿತಿ, ಕ್ರೀಡಾ ಅಪ್‌ಡೇಟ್‌ಗಳು ಹಾಗೂ ವಿಡಿಯೊಗಳನ್ನು ವೀಕ್ಷಿಸಬಹುದಾಗಿದೆ.

ವಿನ್ಯಾಸದ ವಿಷಯಕ್ಕೆ ಬಂದರೆ, ನೋಕಿಯಾದ ಸಾಂಪ್ರದಾಯಿಕ ಲುಕ್‌ಗೆ ಮೆಟಾಲಿಕ್ ಫಿನಿಷ್ ನೀಡಿ ಮತ್ತಷ್ಟು ಆಕರ್ಷಕವಾಗಿ ರೂಪಿಸಲಾಗಿದೆ. Nokia 215 4G ಮತ್ತು Nokia 235 4G ಮಾದರಿಗಳು 2.8 ಇಂಚಿನ ಡಿಸ್‌ಪ್ಲೇ ಹೊಂದಿದ್ದರೆ, ಉಳಿದ ಮಾದರಿಗಳಲ್ಲಿ 2.4 ಇಂಚಿನ ಪರದೆ ನೀಡಲಾಗಿದೆ.

ಎಲ್ಲಾ ಫೋನ್‌ಗಳಲ್ಲೂ 1,450mAh ಬ್ಯಾಟರಿ ಅಳವಡಿಸಲಾಗಿದ್ದು, ದೀರ್ಘ ಬ್ಯಾಟರಿ ಬ್ಯಾಕಪ್ ಒದಗಿಸುತ್ತದೆ. ಜೊತೆಗೆ USB Type-C ಚಾರ್ಜಿಂಗ್, FM ರೇಡಿಯೋ, 3.5mm ಹೆಡ್‌ಫೋನ್ ಜ್ಯಾಕ್ ಹಾಗೂ ಎಕ್ಸ್‌ಪ್ರೆಸ್ ಚಾಟ್‌ ಸೇರಿದಂತೆ ಹಲವು ಉಪಯುಕ್ತ ಸೌಲಭ್ಯಗಳಿವೆ.

ಸರಳ ಬಳಕೆ, ದೀರ್ಘ ಬ್ಯಾಟರಿ, AI ಬೆಂಬಲ ಮತ್ತು ಕಡಿಮೆ ಬೆಲೆ ಬಯಸುವವರಿಗೆ ಈ ಹೊಸ ನೋಕಿಯಾ 4G ಫೋನ್‌ಗಳು ಉತ್ತಮ ಆಯ್ಕೆಯಾಗಲಿವೆ. ಮುಖ್ಯ ಫೋನ್‌ಗೆ ಜೊತೆಯಾಗಿ ಸೆಕೆಂಡರಿ ಡಿವೈಸ್ ಬೇಕಿರುವವರಿಗೂ ಇದು ಸೂಕ್ತವಾಗಿದೆ.