ಹಾಸನದಲ್ಲಿ ಹನಿಟ್ರ್ಯಾಪ್ ಜಾಲ ಭೇದಿಸಿದ ಪೊಲೀಸರು; ಉಪನ್ಯಾಸಕಿಯೇ ದಂಧೆಯ ಕಿಂಗ್‌ಪಿನ್!

Honeytrap ring in Hassan: ಹಾಸನ: ಬಡ ಮಹಿಳೆಯರನ್ನು ದಾಳವಾಗಿ ಬಳಸಿಕೊಂಡು ಶ್ರೀಮಂತರು ಹಾಗೂ ಪರಿಚಯಸ್ಥರನ್ನು ಬಲೆಗೆ ಬೀಳಿಸಿ ಹಣ ವಸೂಲಿ ಮಾಡುತ್ತಿದ್ದ ಖತರ್ನಾಕ್ ಹನಿಟ್ರ್ಯಾಪ್ ಗ್ಯಾಂಗ್ ಅನ್ನು ಹೊಳೆನರಸೀಪುರ ಪೊಲೀಸರು ಬಂಧಿಸಿದ್ದಾರೆ. ಅಚ್ಚರಿಯ ವಿಷಯವೆಂದರೆ, ಈ ದಂಧೆಯ ನೇತೃತ್ವವನ್ನು ಅರೆಕಾಲಿಕ ಉಪನ್ಯಾಸಕಿಯೊಬ್ಬಳು ವಹಿಸಿಕೊಂಡಿದ್ದಳು ಎಂಬುದು ಬೆಳಕಿಗೆ ಬಂದಿದೆ.

ಈ ಹನಿಟ್ರ್ಯಾಪ್ ದಂಧೆಗೆ ಸಂಬಂಧಿಸಿದಂತೆ ಪೊಲೀಸರು ಒಟ್ಟು ನಾಲ್ವರು ಆರೋಪಿಗಳನ್ನು ಬಂಧಿಸಿದ್ದಾರೆ. ಈ ಜಾಲದ ಸೂತ್ರಧಾರಿ ಎನ್ನಲಾದ ಸರ್ಕಾರಿ ಕಾನೂನು ಕಾಲೇಜಿನ ಅರೆಕಾಲಿಕ ಉಪನ್ಯಾಸಕಿ ನಾಗಲಕ್ಷ್ಮೀ, ಆಕೆಯ ಪತಿ ಸಿದ್ಧೀಕ್, ಖಾಸಗಿ ಲ್ಯಾಬ್ ಟೆಕ್ನಿಷಿಯನ್ ಆಗಿ ಕೆಲಸ ಮಾಡುತ್ತಿದ್ದ ಧರ್ಮರಾಜು ಅಲಿಯಾಸ್ ಫಣಿ ಹಾಗೂ ಇವರಿಗೆ ಸಾಥ್ ನೀಡಿದ್ದ ಮತ್ತೊಬ್ಬ ಸಹಚರನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಈ ತಂಡವು ಅಸಹಾಯಕ ಮಹಿಳೆಯರನ್ನು ಬಳಸಿಕೊಂಡು ಗಣ್ಯರನ್ನು ಮತ್ತು ಪರಿಚಯಸ್ಥರನ್ನು ಬಲೆಗೆ ಬೀಳಿಸಿ ಹಣ ಸುಲಿಗೆ ಮಾಡುತ್ತಿತ್ತು ಎಂಬುದು ತನಿಖೆಯಿಂದ ತಿಳಿದುಬಂದಿದೆ.

ದಂಧೆಯ ವಿಧಾನ (Modus Operandi):

ಈ ಗ್ಯಾಂಗ್ ಅತ್ಯಂತ ವ್ಯವಸ್ಥಿತವಾಗಿ ಸಂಚು ರೂಪಿಸುತ್ತಿತ್ತು. ಬಡ ಮಹಿಳೆಯರ ಮನೆಗೆ ಯಾರಾದರೂ ಪರಿಚಯಸ್ಥರು ಬಂದಾಗ, ಅವರ ಫೋಟೋಗಳನ್ನು ಹೊಂಚು ಹಾಕಿ ತೆಗೆಯಲಾಗುತ್ತಿತ್ತು. ನಂತರ ಆ ಫೋಟೋಗಳನ್ನು ತೋರಿಸಿ, “ನೀನು ಈತನ ವಿರುದ್ಧ ಅತ್ಯಾಚಾರದ ದೂರು ನೀಡಬೇಕು, ಇಲ್ಲದಿದ್ದರೆ ನಿನ್ನ ಚಾರಿತ್ರ್ಯದ ಬಗ್ಗೆ ಗಂಡನಿಗೆ ತಿಳಿಸುತ್ತೇವೆ” ಎಂದು ಮಹಿಳೆಯರನ್ನು ಬೆದರಿಸುತ್ತಿದ್ದರು.

ನಕಲಿ ಮೆಡಿಕಲ್ ಚೆಕಪ್ ನಾಟಕ!

ಸಂತ್ರಸ್ತ ಮಹಿಳೆ ದೂರು ನೀಡಲು ಒಪ್ಪದಿದ್ದಾಗ, ಆರೋಪಿಗಳು ಲ್ಯಾಬ್ ಟೆಕ್ನಿಷಿಯನ್ ಫಣಿಯನ್ನು ಕರೆಸಿ ಆಕೆಯ ಮೇಲೆ ಬಲವಂತದ ‘ವೈದ್ಯಕೀಯ ತಪಾಸಣೆ’ ನಡೆಸುವ ನಾಟಕವಾಡಿದ್ದಾರೆ. ಆಕೆಯ ಖಾಸಗಿ ಅಂಗಾಂಗಗಳನ್ನು ಮುಟ್ಟಿ ಕಿರುಕುಳ ನೀಡಿ, “ನಿನ್ನ ವಿರುದ್ಧ ಸಾಕ್ಷ್ಯಗಳಿವೆ” ಎಂದು ಹೆದರಿಸಿ ಹಣಕ್ಕಾಗಿ ಪೀಡಿಸಿದ್ದಾರೆ.

ಚಿನ್ನಕ್ಕೆ ಸಿಗುವ ಸಾಲ ಬೆಳ್ಳಿಗೇಕಿಲ್ಲ? ಬ್ಯಾಂಕ್‌ಗಳ ಈ ನಡೆಯ ಹಿಂದಿನ ಅಸಲಿ ಸತ್ಯ ತಿಳಿಯಿರಿ

ಗುಟ್ಟು ರಟ್ಟಾದದ್ದು ಹೇಗೆ?

ಫೆಬ್ರವರಿ 15ರಂದು ಆರೋಪಿಗಳು ಸಂತ್ರಸ್ತೆಯನ್ನು ಬಲವಂತವಾಗಿ ದೂರು ನೀಡಲು ಪೊಲೀಸ್ ಠಾಣೆಗೆ ಕಳುಹಿಸಿದ್ದರು. ಆದರೆ ಠಾಣೆಯಲ್ಲಿ ಮಹಿಳೆ ಗಾಬರಿಗೊಂಡು ಕಣ್ಣೀರಿಡುತ್ತಿರುವುದನ್ನು ಗಮನಿಸಿದ ಪೊಲೀಸರು, ಆಕೆಯನ್ನು ಸಾಂತ್ವನ ಕೇಂದ್ರಕ್ಕೆ ಕಳುಹಿಸಿ ಆಪ್ತ ಸಮಾಲೋಚನೆ ನಡೆಸಿದ್ದಾರೆ. ಈ ವೇಳೆ ಮಹಿಳೆ ತನಗೆ ನೀಡಲಾದ ಕಿರುಕುಳ ಮತ್ತು ಹನಿಟ್ರ್ಯಾಪ್ ಜಾಲದ ಸಂಪೂರ್ಣ ವಿವರವನ್ನು ಬಿಚ್ಚಿಟ್ಟಿದ್ದಾಳೆ.

ಮುಂದುವರಿದ ತನಿಖೆ:

ಪ್ರಮುಖ ಆರೋಪಿ ನಾಗಲಕ್ಷ್ಮೀ ಈ ಹಿಂದೆ ಕೂಡ ಇಂತಹ ಹಲವು ಕೃತ್ಯಗಳಲ್ಲಿ ಭಾಗಿಯಾಗಿರುವ ಶಂಕೆಯಿದೆ. ಹೊಳೆನರಸೀಪುರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ತೀವ್ರಗೊಳಿಸಿದ್ದು, ಈ ಜಾಲದ ಮೂಲಕ ಇನ್ನೆಷ್ಟು ಜನರಿಗೆ ವಂಚಿಸಲಾಗಿದೆ ಎಂಬ ಮಾಹಿತಿ ಕಲೆಹಾಕುತ್ತಿದ್ದಾರೆ.