ಪೆಟ್ರೋಲ್-ಡೀಸೆಲ್ ಬೆಲೆ ಏರಿಕೆ ಎಫೆಕ್ಟ್: ಲೆದರ್ ಶೂ, ಬೆಲ್ಟ್-ಬ್ಯಾಗ್ ದರ ಏರಿಕೆ – ಮಧ್ಯಮ ವರ್ಗಕ್ಕೆ ಮತ್ತೊಂದು ಬೆಲೆಬಾಧೆ

ಪೆಟ್ರೋಲ್​ ಹಾಗೂ ಡೀಸೆಲ್​ ದರ ನಿರಂತರವಾಗಿ ಏರಿಕೆಯಾಗುತ್ತಲೇ ಇರುವುದರಿಂದ ಎಲ್ಲಾ ಉತ್ಪನ್ನಗಳ ಸಾಗಣಿಕೆ ವೆಚ್ಚದಲ್ಲಿ ಏರಿಕೆ ಕಂಡುಬರುತ್ತಿದೆ. ಹೀಗಾಗಿ ಶ್ರೀ ಸಾಮಾನ್ಯರು ದಿನಕ್ಕೊಂದು ವಸ್ತುಗಳ ದರ ಏರಿಕೆ ಸುದ್ದಿ ಕೇಳುತ್ತಲೇ ಇದ್ದಾರೆ.

ಇದೀಗ ಈ ಸಾಲಿಗೆ ಲೆದರ್​ ಶೂ, ಬೆಲ್ಟ್​ ಹಾಗೂ ಬ್ಯಾಗ್​ಗಳೂ ಸೇರ್ಪಡೆಯಾಗಿದೆ. ಸಾಗಣಿಕೆಯ ವೆಚ್ಚ ಹೆಚ್ಚಾದ ಹಿನ್ನೆಲೆಯಲ್ಲಿ ಹಳೆಯ ದರದಲ್ಲಿ ಲೆದರ್​ ಉತ್ಪನ್ನಗಳು ಮಾರಲು ಸಾಧ್ಯವಿಲ್ಲ ಎಂದು ವ್ಯಾಪಾರಿಗಳು ಅಭಿಪ್ರಾಯ ಹೊರಹಾಕುತ್ತಿದ್ದು , ಮಧ್ಯಮ ವರ್ಗದ ಜನತೆಗೆ ಮತ್ತೊಂದು ಬೆಲೆ ಏರಿಕೆಯ ಬಿಸಿ ತಟ್ಟಿದಂತಾಗಿದೆ.

ಶಾಲೆಗಳು ಆರಂಭವಾಗುವ ಈ ಸಂದರ್ಭದಲ್ಲಿ ಶೂ, ಬೆಲ್ಟ್​ ಹಾಗೂ ಶಾಲಾ ಬ್ಯಾಗ್​ಗಳ ಖರೀದಿ ಪ್ರಕ್ರಿಯೆ ಕೂಡ ಹೆಚ್ಚಿರುತ್ತದೆ. ಈ ಸಮಯದಲ್ಲಿ ಲೆದರ್​ ಉತ್ಪನ್ನಗಳ ಬೆಲೆ ಏರಿಕೆ ಕಂಡಿದ್ದು ಪೋಷಕರಿಗೆ ಶಾಕ್​ ಆಗಿದೆ. ಲೆದರ್​ ಉತ್ಪನ್ನಗಳು ಬಹುತೇಕ ಹೊರ ರಾಜ್ಯದ ಕಾರ್ಖಾನೆಗಳಲ್ಲಿಯೇ ತಯಾರಾಗುತ್ತಿರುವುದರಿಂದ ಸಾಗಣೆ ವೆಚ್ಚ ಮಿತಿಮೀರಿದ್ದು ಲೆದರ್ ಉತ್ಪನ್ನಗಳ ಬೆಲೆ ಮೇಲೆ ಶೇಕಡಾ 16ರಷ್ಟು ಏರಿಕೆ ನಿರೀಕ್ಷಿಸಬಹುದಾಗಿದೆ.

Also Read: ಜಾತಿಗಣತಿಯ ಅಂತಿಮ ವರದಿ ಸಿಎಂಗೆ ಸಲ್ಲಿಕೆ: ರಾಜ್ಯದ ಜನಸಂಖ್ಯೆಯಲ್ಲಿ ಮುಸ್ಲಿಮರು ಅಗ್ರಸ್ಥಾನ, ವೀರಶೈವ-ಲಿಂಗಾಯತರಿಗೆ 2ನೇ ಸ್ಥಾನ

ಹೀಗೆ ದಿನಕ್ಕೊಂದು ವಸ್ತುಗಳ ಬೆಲೆ ಏರಿಕೆ ಕಾಣುತ್ತಿರುವುದು ಜನಸಾಮಾನ್ಯರ ನಿದ್ದೆಗೆಡಿಸಿದೆ. ಇದೇ ರೀತಿ ವಸ್ತುಗಳ ಬೆಲೆ ಏರಿಕೆಯಾಗುತ್ತಲೇ ಹೋದರೆ,ಜೀವನ ನಡೆಸುವುದು ಹೇಗೆ ? ಎಂದು ಸಾರ್ವಜನಿಕರು ತಲೆಕೆಡಿಸಿಕೊಳ್ಳುವಂತೆ ಆಗಿದೆ. ಮೊದಲೇ ಮುಟ್ಟಿದ್ದೆಲ್ಲ ದುಬಾರಿ ಎನ್ನುವಂತಹ ಈ ಕಾಲದಲ್ಲಿ ಇದೀಗ ಚಿಕ್ಕ ಪುಟ್ಟ ವಸ್ತುಗಳು ಬೆಲೆ ಏರಿಕೆಯ ಶಾಕ್​ ನೀಡುತ್ತಿರುವುದು ಜನಸಾಮಾನ್ಯರ ತಲೆನೋವಿಗೆ ಕಾರಣವಾಗಿದೆ.

Effect of petrol-diesel price hike Leather shoes belts-bags prices rise – another price hit for the middle class