ಮೈಸೂರು ಪಾಲಿಕೆಯ ‘ಕನ್ನಡಿ’ ತಂತ್ರ: ಬಹಿರಂಗ ಮೂತ್ರ ವಿಸರ್ಜಿಸುವವರಿಗೆ ಇನ್ನು ‘ಮುಖದರ್ಶನ’ ಭಾಗ್ಯ!

ಮೈಸೂರು ಸ್ವಚ್ಛತೆ ಕಾಯ್ದುಕೊಳ್ಳುವಲ್ಲಿ ಎತ್ತಿದ ಕೈ. ಸಾರ್ವಜನಿಕ ಸ್ಥಳಗಳನ್ನು ಅತ್ಯಂತ ಶುಚಿಯಾಗಿಟ್ಟುಕೊಂಡಿರುವ ಮೈಸೂರು ಮಹಾನಗರ ಪಾಲಿಕೆಗೆ ಈ ಸಾರ್ವಜನಿಕವಾಗಿ ಮೂತ್ರ ವಿಸರ್ಜನೆ ಮಾಡುವವರದ್ದೇ ದೊಡ್ಡ ತಲೆನೋವಾಗಿತ್ತು. ಬಹಿರ್ದೆಸೆ ಮಾಡದಂತೆ ಎಷ್ಟೇ ಸೂಚನಾ ಫಲಕಗಳನ್ನು ಅಳವಡಿಸಿದರೂ, ಗೋಡೆ ಬರಹಗಳನ್ನು ಬರೆದರೂ ಅದರ ಮೇಲೆಯೇ ಮೂತ್ರ ವಿಸರ್ಜನೆ ಮಾಡುವ ಹಾಗೂ ತಂಬಾಕು ಉಗುಳುವ ಅಭ್ಯಾಸ ನಡೆಯುತ್ತಲೇ ಇತ್ತು. ಆದರೆ ಇದೀಗ ಹೊಸ ಪ್ಲಾನ್​ ಒಂದನ್ನು ಮೈಸೂರು ಪಾಲಿಕೆ ಜಾರಿಗೆ ತಂದಿದ್ದು, ಕನ್ನಡಿ ತಂತ್ರಕ್ಕೆ ಮೊರೆ ಹೋಗಿದೆ.

ಗ್ರಾಮಾಂತರ ಬಸ್​ ನಿಲ್ದಾಣದ ಬಳಿಯಲ್ಲಿ ಗೋಡೆಗೆ ಮೂತ್ರ ವಿಸರ್ಜನೆ ಮಾಡದಂತೆ 85 ಮೀಟರ್​ ಉದ್ದದಲ್ಲಿ ಕನ್ನಡಿಯನ್ನು ಅಳವಡಿಸಲಾಗಿದೆ. ಮೋರಿಗೆ ಅಡ್ಡಲಾಗಿ ಕಟ್ಟಿದ್ದ ಕಾಂಪೌಂಡ್‌ಗೆ ಸಾರ್ವಜನಿಕರು ಮೂತ್ರ ವಿಸರ್ಜಿಸಿ, ದುರ್ವಾಸನೆ ಮೂಡುವಂತೆ ಮಾಡಿದ್ದರು. ಹೀಗಾಗಿ ಈ ಸ್ಟೀಲ್​ ಕನ್ನಡಿ ಅಳವಡಿಸಲಾಗಿದ್ದು, ರಸ್ತೆಯ ಇನ್ನೊಂದು ಭಾಗದಲ್ಲಿ ನಡೆದು ಹೋಗುತ್ತಿರುವವರಿಗೂ ಮೂತ್ರ ಮಾಡುವವರ ಮುಖ ಸ್ಪಷ್ಟವಾಗಿ ಗೋಚರಿಸಲಿದೆ.

ಇದನ್ನೂ ಓದಿ : ತಮಿಳುನಾಡು ರಾಜಕೀಯದಲ್ಲಿ ಹೈಡ್ರಾಮಾ: ವಿಜಯ್ ಪ್ರಮಾಣವಚನಕ್ಕೆ ರಾಜ್ಯಪಾಲರ ಬ್ರೇಕ್; ಸಂಕಷ್ಟದಲ್ಲಿ ದಳಪತಿ!

ಮೂತ್ರ ವಿಸರ್ಜಿಸುವವರು, ಪಾನ್‌ ಮಸಾಲ ಉಗಿಯುವವರು ಅಲ್ಲಿ ನಿಂತಾಗ ತಮ್ಮ ಮುಖವನ್ನೇ ಕಂಡು, ಇತರರಿಗೂ ಕಾಣಿಸುತ್ತದೆ ಎಂಬ ನಾಚಿಕೆಯಿಂದ ವಾಪಸು ತೆರಳುತ್ತಿದ್ದಾರೆ. ಪಾಲಿಕೆಯ ಈ ಮಾಸ್ಟರ್​ ಪ್ಲಾನ್​ಗೆ ಸಾರ್ವಜನಿಕರು ಮೆಚ್ಚುಗೆ ಸೂಚಿಸಿದ್ದಾರೆ. ಸ್ಟೀಲ್​ ಕನ್ನಡಿಯ ಸುತ್ತ ಎಲ್​ಇಡಿ ದೀಪಗಳನ್ನು ಅಳವಡಿಸಲಾಗಿದೆ. ಹೀಗಾಗಿ ರಾತ್ರಿ ವೇಳೆ ಕೂಡ ಕನ್ನಡಿಯಲ್ಲಿ ಸ್ಪಷ್ಟ ಚಿತ್ರಣ ಕಾಣಲಿದೆ. ಬಸ್​ಗೆ ಕಾಯುತ್ತಿದ್ದ ಪ್ರಯಾಣಿಕರಿಗೆ ಮೂಗು ಬಿಡಲು ಆಗದಂತಾ ವಾಸನೆ ಇರುತ್ತಿತ್ತು. ಪಾಲಿಕೆಯ ಈ ಮಿರರ್​ ತಂತ್ರದಿಂದಾಗಿ ಕೊಂಚ ನಿರಾಳವಾಗಿದೆ ಎಂದು ಸಾರ್ವಜನಿಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ..