ಭಾರತದ ‘ಜೇಮ್ಸ್ ಬಾಂಡ್’ ಅಜಿತ್ ದೋವಲ್ ಅಸಲಿ ಸೀಕ್ರೆಟ್ ಬಹಿರಂಗ; ಮೊಬೈಲ್ ಇಲ್ಲ, ಇಂಟರ್ನೆಟ್ ಬಳಸಲ್ಲ!

Ajit Doval real secret: ಇಡೀ ಜಗತ್ತು ಇಂಟರ್ನೆಟ್ ಮತ್ತು ಸ್ಮಾರ್ಟ್‌ಫೋನ್ ಕಪಿಮುಷ್ಠಿಯಲ್ಲಿರುವಾಗ, ಭಾರತದ ಅತ್ಯಂತ ಶಕ್ತಿಶಾಲಿ ವ್ಯಕ್ತಿಗಳಲ್ಲಿ ಒಬ್ಬರಾದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಮಾತ್ರ ಇವುಗಳಿಂದ ಹತ್ತಾರು ಅಡಿ ದೂರವಿದ್ದಾರೆ! ಹೌದು, ತಾವು ದೈನಂದಿನ ಕೆಲಸಗಳಿಗಾಗಿ ಮೊಬೈಲ್ ಫೋನ್ ಆಗಲಿ ಅಥವಾ ಇಂಟರ್ನೆಟ್ ಆಗಲಿ ಬಳಸುವುದಿಲ್ಲ ಎಂಬ ಅಚ್ಚರಿಯ ವಿಷಯವನ್ನು ಸ್ವತಃ ದೋವಲ್ ಅವರೇ ಬಹಿರಂಗಪಡಿಸಿದ್ದಾರೆ.

ಯುವ ನಾಯಕರ ಸಂವಾದದಲ್ಲಿ ಬಿಚ್ಚಿಟ್ಟ ಸತ್ಯ:
ದೆಹಲಿಯ ಭಾರತ್ ಮಂಟಪದಲ್ಲಿ ನಡೆದ ‘ವಿಕಸಿತ್ ಭಾರತ್ ಯಂಗ್ ಲೀಡರ್ಸ್ ಡೈಲಾಗ್ 2026’ ಉದ್ಘಾಟನಾ ಸಮಾರಂಭದಲ್ಲಿ ಭಾಗವಹಿಸಿದ್ದ ದೋವಲ್ ಅವರಿಗೆ ಯುವಜನತೆಯಿಂದ ಒಂದು ಕುತೂಹಲಕಾರಿ ಪ್ರಶ್ನೆ ಎದುರಾಯಿತು. “ನೀವು ಫೋನ್ ಮತ್ತು ಇಂಟರ್ನೆಟ್ ಬಳಸುವುದಿಲ್ಲ ಎಂಬುದು ನಿಜವೇ?” ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, “ಹೌದು, ನಾನು ಇಂಟರ್ನೆಟ್ ಬಳಸುವುದಿಲ್ಲ ಎನ್ನುವುದು ಸತ್ಯ. ಕೇವಲ ಕುಟುಂಬದ ಸದಸ್ಯರೊಂದಿಗೆ ಮಾತನಾಡಲು ಅಥವಾ ವಿದೇಶದ ಗಣ್ಯರೊಂದಿಗೆ ತುರ್ತು ಮಾತುಕತೆ ನಡೆಸಲು ಮಾತ್ರ ಅನಿವಾರ್ಯವಾಗಿ ಫೋನ್ ಬಳಸುತ್ತೇನೆ” ಎಂದರು.

ಭದ್ರತೆಯೇ ಮೊದಲ ಆದ್ಯತೆ:
ಗುಪ್ತಚರ ಇಲಾಖೆಯಲ್ಲಿ ದಶಕಗಳ ಕಾಲ ಸೇವೆ ಸಲ್ಲಿಸಿರುವ ದೋವಲ್ ಅವರಿಗೆ ಮಾಹಿತಿ ಸೋರಿಕೆಯ ಅಪಾಯಗಳ ಬಗ್ಗೆ ಚೆನ್ನಾಗಿ ತಿಳಿದಿದೆ. “ನನ್ನ ಕೆಲಸಗಳನ್ನು ನಾನು ಫೋನ್ ಇಲ್ಲದೆಯೇ ನಿರ್ವಹಿಸುತ್ತೇನೆ. ಇವುಗಳಲ್ಲದೆ ಸಂವಹನ ನಡೆಸಲು ಇನ್ನೂ ಅನೇಕ ಮಾರ್ಗಗಳಿವೆ. ಜನಸಾಮಾನ್ಯರಿಗೆ ತಿಳಿಯದ ಅದೆಷ್ಟೋ ರಹಸ್ಯ ಸಂವಹನ ವ್ಯವಸ್ಥೆಗಳನ್ನು ನಾವು ಮಾಡಿಕೊಂಡಿರುತ್ತೇವೆ” ಎಂದು ಹೇಳುವ ಮೂಲಕ ತಮ್ಮ ವೃತ್ತಿಪರ ಜಾಗರೂಕತೆಯನ್ನು ಅವರು ಸಾಬೀತುಪಡಿಸಿದ್ದಾರೆ.

ಸುಕನ್ಯಾ ಸಮೃದ್ಧಿ ಯೋಜನೆ: ಹೆಣ್ಣುಮಕ್ಕಳ ಬಾಳು ಬಂಗಾರವಾಗಲು ಹೀಗೆ ಮಾಡಿ

ಯಾರು ಈ ಅಜಿತ್ ದೋವಲ್?

1945 ರಲ್ಲಿ ಉತ್ತರಾಖಂಡದಲ್ಲಿ ಜನಿಸಿದ ದೋವಲ್, 1968 ರ ಬ್ಯಾಚ್‌ನ ಕೇರಳ ಕೆಡರ್‌ನ ಐಪಿಎಸ್ ಅಧಿಕಾರಿ. ಪೊಲೀಸ್ ಸೇವೆಯಲ್ಲಿದ್ದಾಗಲೇ ಶೌರ್ಯಕ್ಕಾಗಿ ‘ಕೀರ್ತಿ ಚಕ್ರ’ ಪ್ರಶಸ್ತಿ ಪಡೆದ ಅತ್ಯಂತ ಕಿರಿಯ ಅಧಿಕಾರಿ ಇವರು. ಮಿಜೋರಾಂ, ಪಂಜಾಬ್ ಮತ್ತು ಈಶಾನ್ಯ ರಾಜ್ಯಗಳ ಉಗ್ರಗಾಮಿ ಚಟುವಟಿಕೆಗಳನ್ನು ಹತ್ತಿಕ್ಕುವಲ್ಲಿ ಇವರ ಪಾತ್ರ ದೊಡ್ಡದು.

ಮಾಸ್ಟರ್ ಮೈಂಡ್: 2016 ರ ಸರ್ಜಿಕಲ್ ಸ್ಟ್ರೈಕ್ ಮತ್ತು 2019 ರ ಬಾಲಕೋಟ್ ವೈಮಾನಿಕ ದಾಳಿಯ ಹಿಂದೆ ಇದ್ದ ಮಾಸ್ಟರ್ ಮೈಂಡ್ ಇವರೇ. ಡೋಕ್ಲಾಮ್ ಬಿಕ್ಕಟ್ಟನ್ನು ನಿಭಾಯಿಸುವಲ್ಲಿಯೂ ಇವರ ಪಾತ್ರ ಪ್ರಮುಖವಾಗಿತ್ತು. ಭಾರತದ ಐದನೇ ರಾಷ್ಟ್ರೀಯ ಭದ್ರತಾ ಸಲಹೆಗಾರರಾಗಿರುವ ಅಜಿತ್ ದೋವಲ್ ಅವರ ಈ ವಿಶಿಷ್ಟ ಜೀವನಶೈಲಿಯು ಡಿಜಿಟಲ್ ಜಗತ್ತಿನಲ್ಲಿ ಸುರಕ್ಷಿತವಾಗಿರುವುದು ಹೇಗೆ ಎಂಬ ಪಾಠವನ್ನು ಯುವಜನತೆಗೆ ನೀಡಿದಂತಿದೆ.