Trekking New Rules: ಕರ್ನಾಟಕದ ಅರಣ್ಯ ಹಾದಿಗಳಲ್ಲಿ ಚಾರಣಕ್ಕೆ ಹೊಸ ಮಾರ್ಗಸೂಚಿ ಪ್ರಕಟ: ಸುರಕ್ಷತೆಗಾಗಿ ಅರಣ್ಯ ಇಲಾಖೆಯಿಂದ ಕಟ್ಟುನಿಟ್ಟಿನ ಕ್ರಮ

ಬೆಂಗಳೂರು: ರಾಜ್ಯದ ಅರಣ್ಯ ಪ್ರದೇಶಗಳಲ್ಲಿ ಚಾರಣಿಗರು (Trekkers) ನಾಪತ್ತೆಯಾಗುತ್ತಿರುವ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಕರ್ನಾಟಕ ಅರಣ್ಯ ಇಲಾಖೆಯು ಚಾರಣಿಗರ ಸುರಕ್ಷತೆಗಾಗಿ ಹೊಸ ಪ್ರಮಾಣಿತ ಕಾರ್ಯಾಚರಣೆ ವಿಧಾನವನ್ನು (SOP) ಜಾರಿಗೆ ತಂದಿದೆ. ಈ ಹೊಸ ನಿಯಮಗಳು  (Karnataka Trekking New Rules) ಪಶ್ಚಿಮ ಘಟ್ಟಗಳು ಸೇರಿದಂತೆ ರಾಜ್ಯದ ಎಲ್ಲಾ ಅರಣ್ಯ ಚಾರಣ ಹಾದಿಗಳಿಗೆ ಅನ್ವಯವಾಗಲಿವೆ.

ಹೊಸ ಮಾರ್ಗಸೂಚಿಯ ಪ್ರಮುಖ ಅಂಶಗಳು ಇಲ್ಲಿವೆ:

ಮಾರ್ಗದರ್ಶಕರಿಲ್ಲದೆ ಚಾರಣಕ್ಕೆ ನಿಷೇಧ

• ಇನ್ನು ಮುಂದೆ ಅರಣ್ಯ ಇಲಾಖೆಯ ನೋಂದಾಯಿತ ಪ್ರಕೃತಿ ಮಾರ್ಗದರ್ಶಕರಿಲ್ಲದೆ (Certified Nature Guide) ಚಾರಣ ಮಾಡುವಂತಿಲ್ಲ.

• ಏಕಾಂಗಿ ಚಾರಣವನ್ನು (Solo Trekking) ಸಂಪೂರ್ಣವಾಗಿ ನಿಷೇಧಿಸಲಾಗಿದ್ದು, ಒಬ್ಬರೇ ಚಾರಣಕ್ಕೆ ಬಂದರೂ ಅವರಿಗೆ ಕಡ್ಡಾಯವಾಗಿ ಮಾರ್ಗದರ್ಶಕರನ್ನು ನಿಯೋಜಿಸಲಾಗುತ್ತದೆ.

• ಪ್ರತಿ ಹತ್ತು ಚಾರಣಿಗರ ತಂಡಕ್ಕೆ ಒಬ್ಬ ತರಬೇತಿ ಪಡೆದ ಮಾರ್ಗದರ್ಶಕರಿರಬೇಕು.

ತಂತ್ರಜ್ಞಾನದ ಬಳಕೆ ಮತ್ತು ಮೇಲ್ವಿಚಾರಣೆ

• ಟ್ರ್ಯಾಕಿಂಗ್ ಆ್ಯಪ್: ಪ್ರತಿಯೊಬ್ಬ ಚಾರಣಿಗರು ತಮ್ಮ ಮೊಬೈಲ್‌ನಲ್ಲಿ ತಾತ್ಕಾಲಿಕ ಟ್ರ್ಯಾಕಿಂಗ್ ಅಪ್ಲಿಕೇಶನ್ ಅನ್ನು ಅಳವಡಿಸಿಕೊಳ್ಳುವುದು ಕಡ್ಡಾಯವಾಗಿದೆ. ಇದರಿಂದ ಅರಣ್ಯ ಅಧಿಕಾರಿಗಳು ಚಾರಣಿಗರ ಚಲನವಲನವನ್ನು ಗಮನಿಸಲು ಸಾಧ್ಯವಾಗುತ್ತದೆ.

• ಸಂವಹನ: ಮಾರ್ಗದರ್ಶಕರು ಜಿಪಿಎಸ್ (GPS) ಸೌಲಭ್ಯವಿರುವ ವಾಕಿ-ಟಾಕಿಗಳನ್ನು ಹೊಂದಿರಬೇಕು ಮತ್ತು ನಿಯತಕಾಲಿಕವಾಗಿ ಬೇಸ್ ಕ್ಯಾಂಪ್‌ನೊಂದಿಗೆ ಸಂಪರ್ಕದಲ್ಲಿರಬೇಕು.

• ಹೆಡ್‌ಕೌಂಟ್: ಚಾರಣದ ಆರಂಭದಲ್ಲಿ, ವಿಶ್ರಾಂತಿ ಸ್ಥಳಗಳಲ್ಲಿ ಮತ್ತು ಕೊನೆಯಲ್ಲಿ ಚಾರಣಿಗರ ಸಂಖ್ಯೆಯನ್ನು ಮರುಪರಿಶೀಲಿಸಲಾಗುತ್ತದೆ.

ನೋಂದಣಿ ಮತ್ತು ಮೂಲಸೌಕರ್ಯ

• ದೈನಂದಿನ ಮಿತಿ: ಪ್ರತಿಯೊಂದು ಚಾರಣ ಹಾದಿಯಲ್ಲಿ ದಿನಕ್ಕೆ ಗರಿಷ್ಠ 150 ಚಾರಣಿಗರಿಗೆ ಮಾತ್ರ ಅವಕಾಶ ನೀಡಲಾಗುತ್ತದೆ.

• ಆನ್‌ಲೈನ್ ಬುಕಿಂಗ್: ಚಾರಣಕ್ಕೆ ಹೋಗುವ ಮೊದಲು ಆನ್‌ಲೈನ್ ಮೂಲಕ ಮುಂಗಡವಾಗಿ ನೋಂದಣಿ ಮಾಡಿಕೊಂಡು ಅಧಿಕೃತ ಅನುಮತಿ ಪತ್ರ ಪಡೆಯುವುದು ಅವಶ್ಯಕ.

• ಹಾದಿ ಗುರುತಿಸುವಿಕೆ: ಚಾರಣದ ಹಾದಿಗಳಲ್ಲಿ ಸ್ಪಷ್ಟವಾದ ಗುರುತುಗಳನ್ನು ಹಾಕಲಾಗುವುದು ಮತ್ತು ಕಡಿದಾದ ಇಳಿಜಾರು ಅಥವಾ ಅಪಾಯಕಾರಿ ಪ್ರದೇಶಗಳ ಬಗ್ಗೆ ಮುನ್ನೆಚ್ಚರಿಕೆ ಫಲಕಗಳನ್ನು ಅಳವಡಿಸಲಾಗುತ್ತದೆ.

  ತುರ್ತು ಪರಿಸ್ಥಿತಿ ನಿರ್ವಹಣೆ

ಒಂದು ವೇಳೆ ಚಾರಣಿಗರು ನಾಪತ್ತೆಯಾದಲ್ಲಿ ಅಥವಾ ಗಾಯಗೊಂಡಲ್ಲಿ, ತಕ್ಷಣವೇ ರಕ್ಷಣಾ ಕಾರ್ಯಾಚರಣೆ ನಡೆಸಲು ಅರಣ್ಯ ಇಲಾಖೆ, ಪೊಲೀಸ್ ಮತ್ತು ಜಿಲ್ಲಾಡಳಿತದೊಂದಿಗೆ ಸಮನ್ವಯ ಸಾಧಿಸಲಾಗುತ್ತದೆ. ದಟ್ಟಾರಣ್ಯಗಳಲ್ಲಿ ರಕ್ಷಣೆಗಾಗಿ ಡ್ರೋನ್ ಮತ್ತು ಥರ್ಮಲ್ ಕ್ಯಾಮೆರಾಗಳನ್ನು ಬಳಸುವ ಅವಕಾಶವನ್ನೂ ಕಲ್ಪಿಸಲಾಗಿದೆ.

ಕೊಡಗಿನ ತಡಿಯಂಡಮೋಲ್‌ನಂತಹ ಪ್ರಸಿದ್ಧ ಪ್ರವಾಸಿ ತಾಣಗಳಲ್ಲಿ ಚಾರಣಿಗರು ದಾರಿ ತಪ್ಪಿ ಸಂಕಷ್ಟಕ್ಕೆ ಸಿಲುಕಿದ ಇತ್ತೀಚಿನ ಘಟನೆಗಳ ನಂತರ ಅರಣ್ಯ ಇಲಾಖೆ ಈ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದೆ. ಇದರಿಂದ ಪ್ರವಾಸೋದ್ಯಮಕ್ಕೆ ಯಾವುದೇ ಅಡ್ಡಿಯಾಗುವುದಿಲ್ಲ, ಬದಲಾಗಿ ಚಾರಣವು ಹೆಚ್ಚು ಸಂಘಟಿತ ಮತ್ತು ಸುರಕ್ಷಿತವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.