ಉಡುಪಿಯ ಶಂತನು ಶೆಟ್ಟಿಗಾರ್ಗೆ ಒಲಿದ 45 ಕೋಟಿ! ಅಬುಧಾಬಿ ಬಿಗ್ ಟಿಕೆಟ್ ಲಾಟರಿಯಲ್ಲಿ ಜಾಕ್ಪಾಟ್
Udupi Shantanu Shettigar | Abu Dhabi lottery: ಅಬುಧಾಬಿ: ಗಲ್ಫ್ ರಾಷ್ಟ್ರಗಳಲ್ಲಿ ಭಾರತೀಯರ ಪಾಲಿಗೆ ‘ಅದೃಷ್ಟದ ದೇವತೆ’ ಎಂದೇ ಕರೆಯಲ್ಪಡುವ ಅಬುಧಾಬಿ ಬಿಗ್ ಟಿಕೆಟ್ ಲಾಟರಿಯಲ್ಲಿ ಈ ಬಾರಿ ಕರಾವಳಿಯ ವ್ಯಕ್ತಿಯೊಬ್ಬರು ಬೃಹತ್ ಮೊತ್ತದ ಬಹುಮಾನ ಗೆದ್ದಿದ್ದಾರೆ. ಉಡುಪಿ ಜಿಲ್ಲೆಯ ಉದ್ಯಾವರ ಮೂಲದ ಶಂತನು ಶೆಟ್ಟಿಗಾರ್ ಅವರು ಬಿಗ್ ಟಿಕೆಟ್ ಸರಣಿ 283ರ ಡ್ರಾನಲ್ಲಿ 20 ಮಿಲಿಯನ್ ದಿರ್ಹಮ್ (ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಸುಮಾರು 45 ಕೋಟಿಗೂ ಅಧಿಕ) ಮೊತ್ತದ ಬಂಪರ್ ಜಾಕ್ಪಾಟ್ ತಮ್ಮದಾಗಿಸಿಕೊಂಡಿದ್ದಾರೆ.
ಶಂತನು ಶೆಟ್ಟಿಗಾರ್ ಅವರು ಕಳೆದ ಕೆಲವು ವರ್ಷಗಳಿಂದ ಒಮಾನ್ ದೇಶದಲ್ಲಿ ರಿಟೇಲ್ ವಲಯದಲ್ಲಿ (ಚಿಲ್ಲರೆ ವ್ಯಾಪಾರ ಮಳಿಗೆ) ಕೆಲಸ ಮಾಡುತ್ತಿದ್ದಾರೆ. ಅವರು ಜನವರಿ ತಿಂಗಳ ಕೊನೆಯಲ್ಲಿ 305810 ಸಂಖ್ಯೆಯ ಟಿಕೆಟ್ ಅನ್ನು ಖರೀದಿಸಿದ್ದರು. ಫೆಬ್ರವರಿ 4 ರಂದು ನಡೆದ ಲೈವ್ ಡ್ರಾನಲ್ಲಿ ಈ ಸಂಖ್ಯೆಯು ವಿಜೇತ ಟಿಕೆಟ್ ಆಗಿ ಹೊರಹೊಮ್ಮಿತು. ಈ ಸುದ್ದಿಯನ್ನು ಕಾರ್ಯಕ್ರಮದ ಆಯೋಜಕರು ದೂರವಾಣಿ ಕರೆ ಮೂಲಕ ತಿಳಿಸಿದಾಗ ಶಂತನು ಅವರಿಗೆ ಒಂದು ಕ್ಷಣ ನಂಬಲಾಗಲಿಲ್ಲ.
ಸ್ನೇಹಿತರೊಂದಿಗೆ ಹಂಚಿಕೆ:
ವಿಶೇಷವೆಂದರೆ, ಈ ಅದೃಷ್ಟದ ಟಿಕೆಟ್ ಅನ್ನು ಶಂತನು ಅವರು ಒಬ್ಬರೇ ಖರೀದಿಸಿರಲಿಲ್ಲ. ಹಣದ ಹೊರೆ ಕಡಿಮೆ ಮಾಡಲು ಮತ್ತು ಗೆಲುವಿನ ಸಾಧ್ಯತೆ ಹಂಚಿಕೊಳ್ಳಲು ಅವರು ತಮ್ಮ ಓರ್ವ ಸ್ನೇಹಿತನೊಂದಿಗೆ ಜಂಟಿಯಾಗಿ ಈ ಟಿಕೆಟ್ ಪಡೆದಿದ್ದರು. ಈಗ ಬಂದಿರುವ ಬೃಹತ್ ಮೊತ್ತವನ್ನು ಇಬ್ಬರೂ ಸಮನಾಗಿ ಹಂಚಿಕೊಳ್ಳಲಿದ್ದಾರೆ. ಅಂದರೆ ತಲಾ ಸುಮಾರು 22.5 ಕೋಟಿ ರೂಪಾಯಿಗಳು ಇಬ್ಬರ ಪಾಲಾಗಲಿವೆ.
ಬಹುಮಾನ ಗೆದ್ದ ನಂತರ ಮಾಧ್ಯಮಗಳೊಂದಿಗೆ ಮಾತನಾಡಿದ ಶಂತನು, “ಈ ಗೆಲುವು ನನಗೆ ಅಚ್ಚರಿ ತಂದಿದೆ. ಸದ್ಯಕ್ಕೆ ಈ ಹಣವನ್ನು ಏನು ಮಾಡಬೇಕೆಂದು ನಾನು ಇನ್ನೂ ನಿರ್ಧರಿಸಿಲ್ಲ. ಕೆಲಸದಲ್ಲಿ ನಿರತನಾಗಿದ್ದಾಗಲೇ ಈ ಸುದ್ದಿ ತಿಳಿದು ಬಂದಿದ್ದು, ನನ್ನ ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಚರ್ಚಿಸಿ ಮುಂದಿನ ನಿರ್ಧಾರ ತೆಗೆದುಕೊಳ್ಳುತ್ತೇನೆ” ಎಂದು ಸಂಭ್ರಮದಿಂದ ಹೇಳಿದ್ದಾರೆ.
‘ಸಂಪಾಯಿತಲೇ ಪರಾಕ್’ : ಸುಕ್ಷೇತ್ರ ಮೈಲಾರದಲ್ಲಿ ಹೊರಬಿತ್ತು ವಾರ್ಷಿಕ ಕಾರಣಿಕ
ಯುಎಇಯ ಅತ್ಯಂತ ಹಳೆಯ ಮತ್ತು ದೊಡ್ಡ ಮೊತ್ತದ ಲಾಟರಿ ಎಂದೇ ಹೆಸರಾಗಿರುವ ಬಿಗ್ ಟಿಕೆಟ್ನಲ್ಲಿ ಈ ಹಿಂದೆಯೂ ಕನ್ನಡಿಗರು ಹಲವು ಬಾರಿ ಕೋಟ್ಯಂತರ ರೂಪಾಯಿ ಬಹುಮಾನ ಗೆದ್ದ ಉದಾಹರಣೆಗಳಿವೆ. ಶಂತನು ಅವರ ಈ ಗೆಲುವು ಉಡುಪಿ ಮತ್ತು ಅವರ ಮೂಲ ಊರಾದ ಉದ್ಯಾವರದಲ್ಲಿ ಸಂತಸದ ವಾತಾವರಣ ನಿರ್ಮಿಸಿದೆ. ಸಾಮಾನ್ಯ ಕುಟುಂಬದ ವ್ಯಕ್ತಿಯೊಬ್ಬರು ರಾತ್ರೋರಾತ್ರಿ ಕೋಟ್ಯಧಿಪತಿಯಾಗಿರುವುದು ಸದ್ಯ ಕರಾವಳಿ ಭಾಗದಲ್ಲಿ ದೊಡ್ಡ ಸುದ್ದಿಯಾಗಿದೆ.
