CBSE 10ನೇ ತರಗತಿ ವಿದ್ಯಾರ್ಥಿಗಳಿಗೆ ಮುಖ್ಯ ಮಾಹಿತಿ: ಮೊದಲ ಬೋರ್ಡ್ ಪರೀಕ್ಷೆ ಇನ್ನು ಕಡ್ಡಾಯ!

CBSE Class 10 students | Board Exams: ನವದೆಹಲಿ: 2026ರಿಂದ ಜಾರಿಗೆ ಬರಲಿರುವ 10ನೇ ತರಗತಿಯ ಹೊಸ ಪರೀಕ್ಷಾ ಪದ್ಧತಿಯ ಕುರಿತು ಕೇಂದ್ರ ಪ್ರೌಢ ಶಿಕ್ಷಣ ಮಂಡಳಿ (CBSE) ಮಹತ್ವದ ಸ್ಪಷ್ಟನೆಯನ್ನು ನೀಡಿದೆ. ಹೊಸ ನಿಯಮದ ಪ್ರಕಾರ, ವಿದ್ಯಾರ್ಥಿಗಳು ಮೊದಲ ಬೋರ್ಡ್ ಪರೀಕ್ಷೆಗೆ ಹಾಜರಾಗುವುದು ಇನ್ನು ಮುಂದೆ ಕಡ್ಡಾಯವಾಗಿದ್ದು, ಇದನ್ನು ತಪ್ಪಿಸಿಕೊಂಡರೆ ಎರಡನೇ ಪರೀಕ್ಷೆಗೆ ಅವಕಾಶವಿರುವುದಿಲ್ಲ ಎಂದು ಮಂಡಳಿ ತಿಳಿಸಿದೆ.

ಪೋಷಕರು ಮತ್ತು ವಿದ್ಯಾರ್ಥಿಗಳಲ್ಲಿ ಉಂಟಾಗಿದ್ದ ಗೊಂದಲವನ್ನು ನಿವಾರಿಸಲು ಮಂಡಳಿಯು ಈ ಕೆಳಗಿನ ನಿಯಮಗಳನ್ನು ಬಿಡುಗಡೆ ಮಾಡಿದೆ:

ಮೊದಲ ಪರೀಕ್ಷೆ ಕಡ್ಡಾಯ: ವೈಯಕ್ತಿಕ ಅಥವಾ ವೈದ್ಯಕೀಯ ಕಾರಣ ನೀಡಿ ನೇರವಾಗಿ ಎರಡನೇ ಪರೀಕ್ಷೆ ಬರೆಯಲು ಅವಕಾಶವಿಲ್ಲ. ಪ್ರತಿಯೊಬ್ಬ ವಿದ್ಯಾರ್ಥಿಯೂ ಮೊದಲ ಬೋರ್ಡ್ ಪರೀಕ್ಷೆಗೆ ಹಾಜರಾಗಲೇಬೇಕು.

ಅರ್ಹತೆಯ ಮಾನದಂಡ: ಮೊದಲ ಪರೀಕ್ಷೆಯಲ್ಲಿ ಮೂರು ಅಥವಾ ಅದಕ್ಕಿಂತ ಹೆಚ್ಚು ವಿಷಯಗಳಿಗೆ ಗೈರುಹಾಜರಾದ ವಿದ್ಯಾರ್ಥಿಗಳು ಎರಡನೇ ಪರೀಕ್ಷೆ ಬರೆಯಲು ಅನರ್ಹರಾಗುತ್ತಾರೆ. ಅಂತಹ ವಿದ್ಯಾರ್ಥಿಗಳನ್ನು ‘ಎಸೆನ್ಷಿಯಲ್ ರಿಪೀಟ್’ (Essential Repeat) ವರ್ಗಕ್ಕೆ ಸೇರಿಸಲಾಗುವುದು ಮತ್ತು ಅವರು ಮುಂದಿನ ವರ್ಷವೇ ಪರೀಕ್ಷೆ ಬರೆಯಬೇಕಾಗುತ್ತದೆ.

ಅಂಕ ಸುಧಾರಣೆಗೆ ಅವಕಾಶ (Improvement): ಮೊದಲ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ವಿದ್ಯಾರ್ಥಿಗಳು ತಮ್ಮ ಅಂಕಗಳನ್ನು ಹೆಚ್ಚಿಸಿಕೊಳ್ಳಲು ವಿಜ್ಞಾನ, ಗಣಿತ, ಸಮಾಜ ವಿಜ್ಞಾನ ಮತ್ತು ಭಾಷೆ ಸೇರಿದಂತೆ ಗರಿಷ್ಠ ಮೂರು ವಿಷಯಗಳಲ್ಲಿ ಎರಡನೇ ಪರೀಕ್ಷೆಯನ್ನು ಬರೆಯಬಹುದು.

ಕಂಪಾರ್ಟ್‌ಮೆಂಟ್ ವಿದ್ಯಾರ್ಥಿಗಳು: ಮೊದಲ ಪರೀಕ್ಷೆಯಲ್ಲಿ ‘ಕಂಪಾರ್ಟ್‌ಮೆಂಟ್’ ರಿಸಲ್ಟ್ ಬಂದ ವಿದ್ಯಾರ್ಥಿಗಳು ಎರಡನೇ ಪರೀಕ್ಷೆಯಲ್ಲಿ ಹಾಜರಾಗಲು ಅರ್ಹರಾಗಿರುತ್ತಾರೆ.

ಕರಾವಳಿಯತ್ತ ಬೆರಳು ಮಾಡುವ ಮುನ್ನ ಕಲಬುರ್ಗಿಯ ದಯನೀಯ ಸ್ಥಿತಿ ನೋಡಿ: ಸಚಿವ ಪ್ರಿಯಾಂಕ್ ಖರ್ಗೆಗೆ ಸುನೀಲ್ ಕುಮಾರ್ ತಪರಾಕಿ

ಎರಡನೇ ಪರೀಕ್ಷೆ ಯಾರಿಗೆ?

ಎರಡನೇ ಬೋರ್ಡ್ ಪರೀಕ್ಷೆಯನ್ನು ಕೇವಲ ಈ ಕೆಳಗಿನವರಿಗಾಗಿ ನಡೆಸಲಾಗುತ್ತದೆ:

1. ಅಂಕ ಸುಧಾರಣೆ ಮಾಡಿಕೊಳ್ಳಬಯಸುವವರು (ಗರಿಷ್ಠ 3 ವಿಷಯಗಳು).
2. ಮೊದಲ ಪರೀಕ್ಷೆಯಲ್ಲಿ ಕಂಪಾರ್ಟ್‌ಮೆಂಟ್ ಪಡೆದವರು.
3. ಉತ್ತೀರ್ಣರಾಗಿದ್ದರೂ ಒಂದು ವಿಷಯವನ್ನು ಬದಲಾಯಿಸಲು ಇಚ್ಛಿಸುವವರು.

ಎಚ್ಚರಿಕೆ:

ಮೊದಲ ಪರೀಕ್ಷೆಯಲ್ಲಿ ಗೈರುಹಾಜರಾಗುವುದು ವಿದ್ಯಾರ್ಥಿಯ ಒಂದು ವರ್ಷದ ಶೈಕ್ಷಣಿಕ ಪ್ರಗತಿಯ ಮೇಲೆ ಪರಿಣಾಮ ಬೀರಬಹುದು. ಈ ನಿಯಮದಲ್ಲಿ ಯಾವುದೇ ವಿನಾಯಿತಿ ನೀಡುವುದಿಲ್ಲ ಎಂದು CBSE ಕಡಾಖಂಡಿತವಾಗಿ ಹೇಳಿದೆ.