ತಂಬಾಕು ಮುಕ್ತ ದೇಶ ನಿರ್ಮಾಣಕ್ಕೆ ಬ್ರಿಟನ್​ ಪಣ ..! 2008ರ ನಂತರ ಜನಿಸಿದವರಿಗೆ ಸಿಗರೇಟ್ ನಿಷೇಧ..!

ವಿಶ್ವದಲ್ಲೇ ಮೊಟ್ಟ ಮೊದಲ ಬಾರಿಗೆ ತಂಬಾಕು ಮುಕ್ತ ತಲೆಮಾರನ್ನು ನಿರ್ಮಿಸುವ ಗುರಿಯೊಂದಿಗೆ ಬ್ರಿಟನ್ ಸರ್ಕಾರ ಅತ್ಯಂತ ಕಠಿಣ ಮತ್ತು ವಿಶಿಷ್ಟವಾದ ಕಾನೂನೊಂದನ್ನು ಜಾರಿಗೆ ತರಲು ಮುಂದಾಗಿದೆ. ಬ್ರಿಟನ್ ಸಂಸತ್ತಿನಲ್ಲಿ ಮಂಡನೆಯಾಗಿರುವ ಈ ನೂತನ ಮಸೂದೆಯು, ಮುಂದಿನ ದಿನಗಳಲ್ಲಿ ದೇಶದಲ್ಲಿ ಧೂಮಪಾನವನ್ನು ಸಂಪೂರ್ಣವಾಗಿ ಹಂತಹಂತವಾಗಿ ಇಲ್ಲವಾಗಿಸುವ ಗುರಿ ಹೊಂದಿದೆ.

ಹೊಸ ನಿಯಮದ ಅನ್ವಯ, 2008ರ ನಂತರ ಜನಿಸಿದ ಯಾವುದೇ ವ್ಯಕ್ತಿ ಬ್ರಿಟನ್‌ನಲ್ಲಿ ಕಾನೂನುಬದ್ಧವಾಗಿ ಸಿಗರೇಟ್ ಖರೀದಿಸಲು ಸಾಧ್ಯವೇ ಇಲ್ಲ. ಪ್ರಸ್ತುತ ಸಿಗರೇಟ್ ಖರೀದಿಸಲು ಇರುವ ಕನಿಷ್ಠ ವಯಸ್ಸು 18 ವರ್ಷ. ಆದರೆ, ಇನ್ನು ಮುಂದೆ ಈ ವಯೋಮಿತಿಯನ್ನು ಪ್ರತಿ ವರ್ಷ ಒಂದೊಂದು ವರ್ಷದಂತೆ ಹೆಚ್ಚಿಸಲಾಗುತ್ತದೆ. ಇದರಿಂದಾಗಿ 2008ರ ನಂತರ ಜನಿಸಿದವರು ಪ್ರತಿ ವರ್ಷ ತಮ್ಮ ವಯಸ್ಸು ಹೆಚ್ಚಿಸಿಕೊಳ್ಳುತ್ತಿದ್ದರೂ, ಕಾನೂನುಬದ್ಧವಾಗಿ ನಿಗದಿಪಡಿಸಿದ ವಯೋಮಿತಿಯನ್ನು ಅವರು ಎಂದಿಗೂ ತಲುಪಲು ಸಾಧ್ಯವಾಗದಂತೆ ಈ ವ್ಯವಸ್ಥೆ ರೂಪಿಸಲಾಗಿದೆ.

ಇದನ್ನೂ ಓದಿ: ಬೆಂಗಳೂರು ಟ್ರಾಫಿಕ್​ಗೆ ಬ್ರೇಕ್​ ಹಾಕಲು ಮಾಸ್ಟರ್​ ಪ್ಲಾನ್​ – ಮೆಟ್ರೋ ಬಳಸುವ ಬಯೋಕಾನ್​ ಸಿಬ್ಬಂದಿಗೆ ಬೋನಸ್​

ಈ ನಿಯಮವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲು ಬ್ರಿಟನ್ ಸರ್ಕಾರ ಸನ್ನದ್ಧವಾಗಿದೆ. ಒಂದು ವೇಳೆ ಯಾವುದೇ ಅಂಗಡಿಕಾರರು ನಿಯಮ ಉಲ್ಲಂಘಿಸಿ ನಿಗದಿತ ವಯೋಮಿತಿಗಿಂತ ಕೆಳಗಿನವರಿಗೆ ಅಥವಾ 2008ರ ನಂತರ ಜನಿಸಿದವರಿಗೆ ಸಿಗರೇಟ್ ಮಾರಾಟ ಮಾಡುವುದು ಕಂಡುಬಂದರೆ, ಅಂತಹವರಿಗೆ ಸ್ಥಳದಲ್ಲೇ 100 ಪೌಂಡ್ ಅಂದರೆ ಸುಮಾರು 10,000 ರೂಪಾಯಿ ದಂಡ ವಿಧಿಸಲಾಗುತ್ತದೆ.

ತಂಬಾಕು ಸೇವನೆಯಿಂದ ಉಂಟಾಗುವ ಕ್ಯಾನ್ಸರ್ ಮತ್ತು ಶ್ವಾಸಕೋಶದ ಕಾಯಿಲೆಗಳನ್ನು ತಡೆಗಟ್ಟುವುದು ಈ ಕಾನೂನಿನ ಮುಖ್ಯ ಉದ್ದೇಶವಾಗಿದೆ. ಬ್ರಿಟನ್ ಮಾಜಿ ಪ್ರಧಾನಿ ರಿಷಿ ಸುನಕ್ ಅವರ ಈ ಮಹತ್ವಾಕಾಂಕ್ಷಿ ನಿರ್ಧಾರವು ಜಾಗತಿಕವಾಗಿ ಗಮನ ಸೆಳೆದಿದ್ದು, ನ್ಯೂಜಿಲೆಂಡ್ ಮಾದರಿಯ ಈ ಕಠಿಣ ಕ್ರಮವು ತಂಬಾಕು ಮುಕ್ತ ವಿಶ್ವದತ್ತ ಹೊಸ ದಾರಿ ತೋರಿಸುತ್ತಿದೆ.