ಎಟಿಎಂ ಕಾರ್ಡ್ ಬಳಕೆ ವೇಳೆ ಯಾವುದೇ ಕಾರಣಕ್ಕೂ ಈ 10 ಸಾಮಾನ್ಯ ತಪ್ಪುಗಳನ್ನು ಮಾಡಬೇಡಿ

ಎಟಿಎಂ ಮೂಲಕ ಹಣ ತೆಗೆಯುವುದು ಇಂದು ಸಾಮಾನ್ಯ ಪ್ರಕ್ರಿಯೆಯಾಗಿದ್ದರೂ, ಅದನ್ನೇ ದುರುಪಯೋಗಪಡಿಸಿಕೊಂಡು ಸೈಬರ್ ವಂಚಕರು ಹೊಸ ಹೊಸ ತಂತ್ರಗಳನ್ನು ಬಳಸುತ್ತಿದ್ದಾರೆ. ಎಚ್ಚರಿಕೆಯ ಕೊರತೆಯಿಂದ ಕೆಲವೇ ನಿಮಿಷಗಳಲ್ಲಿ ಬ್ಯಾಂಕ್ ಖಾತೆಯಿಂದ ಹಣ ಕಣ್ಮರೆಯಾಗುವ ಪ್ರಕರಣಗಳು ಹೆಚ್ಚುತ್ತಿವೆ. ಆದ್ದರಿಂದ ಎಟಿಎಂ ಬಳಸುವಾಗ ಕೆಲವು ಮುನ್ನೆಚ್ಚರಿಕೆಗಳನ್ನು ಪಾಲಿಸುವುದು ಅತ್ಯಗತ್ಯ.

ಕಾರ್ಡ್ ಸ್ಲಾಟ್ ಮತ್ತು ಕೀಪ್ಯಾಡ್ ಮೊದಲು ಪರಿಶೀಲಿಸಿ

ವಂಚಕರು ಎಟಿಎಂನ ಕಾರ್ಡ್ ಸ್ಲಾಟ್ ಮೇಲೆ ನಕಲಿ ಕವರ್ ಅಳವಡಿಸಿ ಕಾರ್ಡ್‌ನ ಮಾಹಿತಿಯನ್ನು ಕಳವು ಮಾಡುವ ಪ್ರಕರಣಗಳು ಹೆಚ್ಚುತ್ತಿವೆ. ಕೆಲವೊಮ್ಮೆ ಕೀಪ್ಯಾಡ್ ಮೇಲೂ ನಕಲಿ ಪದರ ಅಳವಡಿಸಿ ಪಿನ್ ಸಂಖ್ಯೆ ದಾಖಲಿಸಿಕೊಳ್ಳುತ್ತಾರೆ. ಕಾರ್ಡ್ ಹಾಕುವ ಮೊದಲು ಸ್ಲಾಟ್ ಮತ್ತು ಕೀಪ್ಯಾಡ್‌ನಲ್ಲಿ ಯಾವುದೇ ಅನುಮಾನಾಸ್ಪದ ಬದಲಾವಣೆ ಇದೆಯೇ ಎಂದು ಪರಿಶೀಲಿಸಿ.

ಪಿನ್ ನಮೂದಿಸುವಾಗ ಕೀಪ್ಯಾಡ್ ಮುಚ್ಚಿ

ಪಿನ್ ಟೈಪ್ ಮಾಡುವಾಗ ಕೈಯಿಂದ ಅಥವಾ ದೇಹದ ನೆರವಿನಿಂದ ಕೀಪ್ಯಾಡ್ ಅನ್ನು ಮುಚ್ಚಿ. ಎಟಿಎಂ ಸುತ್ತಮುತ್ತ ರಹಸ್ಯ ಕ್ಯಾಮೆರಾ ಅಥವಾ ಅನುಮಾನಾಸ್ಪದ ವ್ಯಕ್ತಿಗಳಿರುವ ಸಾಧ್ಯತೆ ಇರುವುದರಿಂದ ನಿಮ್ಮ ಪಿನ್ ಇತರರಿಗೆ ಕಾಣದಂತೆ ನೋಡಿಕೊಳ್ಳಿ.

ಕಾರ್ಡ್ ಅಥವಾ ಹಣ ಸಿಲುಕಿದರೆ ಅಲ್ಲೇ ನಿಲ್ಲಿ

ಕೆಲವು ವಂಚಕರು ಕಾರ್ಡ್ ಅಥವಾ ಹಣ ಎಟಿಎಂ ಒಳಗೆ ಸಿಲುಕುವಂತೆ ವ್ಯವಸ್ಥೆ ಮಾಡುತ್ತಾರೆ. ಗ್ರಾಹಕರು ಅಲ್ಲಿಂದ ತೆರಳಿದ ಬಳಿಕ ಅದನ್ನು ಪಡೆದು ದುರ್ಬಳಕೆ ಮಾಡುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಸ್ಥಳವನ್ನು ಬಿಟ್ಟು ಹೋಗದೆ ತಕ್ಷಣ ಬ್ಯಾಂಕ್ ಅಥವಾ ಸಂಬಂಧಿತ ಅಧಿಕಾರಿಗಳಿಗೆ ಮಾಹಿತಿ ನೀಡಿ.

ಎಟಿಎಂ ಪರದೆಯಲ್ಲಿರುವ ಅಪರಿಚಿತ ಸಂಖ್ಯೆಗೆ ಕರೆ ಮಾಡಬೇಡಿ

ಕೆಲವೊಮ್ಮೆ ಎಟಿಎಂ ಪರದೆಯಲ್ಲಿ ದೋಷ ಸಂದೇಶದೊಂದಿಗೆ ಮೊಬೈಲ್ ಸಂಖ್ಯೆ ಕಾಣಿಸಬಹುದು. ಆ ಸಂಖ್ಯೆಗೆ ಕರೆ ಮಾಡಿದರೆ ಬ್ಯಾಂಕ್ ಅಧಿಕಾರಿಯಂತೆ ನಟಿಸುವ ವಂಚಕರು ಕಾರ್ಡ್ ಸಂಖ್ಯೆ, ಪಿನ್, ಓಟಿಪಿ ಅಥವಾ ಸಿವಿವಿ ಕೇಳಬಹುದು. ಬ್ಯಾಂಕ್ ಯಾವುದೇ ಸಂದರ್ಭದಲ್ಲೂ ಈ ಮಾಹಿತಿಯನ್ನು ದೂರವಾಣಿಯಲ್ಲಿ ಕೇಳುವುದಿಲ್ಲ. ಅಗತ್ಯವಿದ್ದರೆ ಕಾರ್ಡ್ ಹಿಂಭಾಗದಲ್ಲಿರುವ ಅಧಿಕೃತ ಸಹಾಯವಾಣಿ ಸಂಖ್ಯೆಗೆ ಮಾತ್ರ ಸಂಪರ್ಕಿಸಿ.

ಎಟಿಎಂ ಬಳಸುವಾಗ ನೆನಪಿಡಬೇಕಾದ ಪ್ರಮುಖ ಸಲಹೆಗಳು

• ಕಾರ್ಡ್ ಸ್ಲಾಟ್ ಮತ್ತು ಕೀಪ್ಯಾಡ್ ಅನ್ನು ಪರಿಶೀಲಿಸಿ.
• ಪಿನ್ ನಮೂದಿಸುವಾಗ ಕೈಯಿಂದ ಕೀಪ್ಯಾಡ್ ಮುಚ್ಚಿ.
• ಅಪರಿಚಿತರ ಸಹಾಯ ಪಡೆಯಬೇಡಿ.
• ಓಟಿಪಿ, ಪಿನ್, ಸಿವಿವಿ ಯಾರೊಂದಿಗೂ ಹಂಚಿಕೊಳ್ಳಬೇಡಿ.
• ಎಟಿಎಂ ವ್ಯವಹಾರದ ಎಸ್‌ಎಂಎಸ್‌ಗಳನ್ನು ಪರಿಶೀಲಿಸಿ.
• ಅನುಮಾನಾಸ್ಪದ ಎಟಿಎಂ ಬಳಸುವುದನ್ನು ತಪ್ಪಿಸಿ.

ಸ್ವಲ್ಪ ಎಚ್ಚರಿಕೆ ಮತ್ತು ಸರಿಯಾದ ಸುರಕ್ಷತಾ ಕ್ರಮಗಳನ್ನು ಪಾಲಿಸಿದರೆ ಎಟಿಎಂ ವಂಚನೆಗಳಿಂದ ನಿಮ್ಮ ಬ್ಯಾಂಕ್ ಖಾತೆ ಮತ್ತು ಹಣವನ್ನು ಸುರಕ್ಷಿತವಾಗಿರಿಸಬಹುದು.