ಎಸ್‌ಬಿಐನಲ್ಲಿ 3 ಲಕ್ಷ ರೂಪಾಯಿ ಠೇವಣಿ ಇಟ್ಟರೆ ಎಷ್ಟು ಬಡ್ಡಿ ಸಿಗುತ್ತದೆ ಗೊತ್ತ?

ಸುರಕ್ಷಿತ ಹೂಡಿಕೆ ಮತ್ತು ಖಚಿತ ಆದಾಯ ಬಯಸುವವರ ಗಮನ ಸೆಳೆಯುತ್ತಿರುವ ಯೋಜನೆಗಳಲ್ಲಿ ಎಸ್‌ಬಿಐ ಫಿಕ್ಸ್ಡ್ ಡಿಪಾಸಿಟ್ (FD) ಪ್ರಮುಖವಾಗಿದೆ. ದೇಶದ ಅತಿದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಆಗಿರುವ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ತನ್ನ ಗ್ರಾಹಕರಿಗೆ ವಿವಿಧ ಅವಧಿಯ ಠೇವಣಿ ಯೋಜನೆಗಳನ್ನು ಒದಗಿಸುತ್ತಿದೆ.

ಎಸ್‌ಬಿಐನಲ್ಲಿ ಕೇವಲ 7 ದಿನಗಳಿಂದ 10 ವರ್ಷಗಳವರೆಗೆ ಎಫ್‌ಡಿ ಖಾತೆ ತೆರೆಯುವ ಅವಕಾಶವಿದೆ. ಹೂಡಿಕೆದಾರರ ಅಗತ್ಯಕ್ಕೆ ತಕ್ಕಂತೆ ಅಲ್ಪಾವಧಿ ಮತ್ತು ದೀರ್ಘಾವಧಿ ಯೋಜನೆಗಳನ್ನು ಆಯ್ಕೆ ಮಾಡಬಹುದು. ಪ್ರಸ್ತುತ ಬ್ಯಾಂಕ್ ವಿವಿಧ ಎಫ್‌ಡಿ ಯೋಜನೆಗಳ ಮೇಲೆ ಸುಮಾರು 3.05% ರಿಂದ 7.15% ವರೆಗೆ ಬಡ್ಡಿದರ ನೀಡುತ್ತಿದೆ.

ದೀರ್ಘಾವಧಿ ಹೂಡಿಕೆಗೆ ಆಸಕ್ತಿ ಇರುವವರಿಗೆ 5 ರಿಂದ 10 ವರ್ಷದ ಎಫ್‌ಡಿಗಳು ಹೆಚ್ಚು ಆಕರ್ಷಕವಾಗಿವೆ. ಈ ಅವಧಿಯ ಯೋಜನೆಗಳಲ್ಲಿ ಹೂಡಿಕೆ ಮಾಡಿದರೆ ಉತ್ತಮ ಆದಾಯ ಗಳಿಸುವ ಅವಕಾಶ ಸಿಗುತ್ತದೆ. ವಿಶೇಷವಾಗಿ ಹಿರಿಯ ನಾಗರಿಕರಿಗೆ ಸಾಮಾನ್ಯ ಗ್ರಾಹಕರಿಗಿಂತ ಹೆಚ್ಚಿನ ಬಡ್ಡಿದರ ಸೌಲಭ್ಯ ಲಭ್ಯವಿದೆ.

ಉದಾಹರಣೆಗೆ, ಒಬ್ಬ ಸಾಮಾನ್ಯ ಹೂಡಿಕೆದಾರರು ಎಸ್‌ಬಿಐನ 6 ವರ್ಷದ ಎಫ್‌ಡಿ ಯೋಜನೆಯಲ್ಲಿ ₹3 ಲಕ್ಷ ಹೂಡಿಕೆ ಮಾಡಿದರೆ, ಅವಧಿ ಪೂರ್ಣಗೊಂಡ ಬಳಿಕ ಒಟ್ಟು ಸುಮಾರು ₹4,30,120 ಪಡೆಯಬಹುದು. ಇದರಲ್ಲಿ ಸುಮಾರು ₹1,30,120 ಬಡ್ಡಿ ರೂಪದಲ್ಲಿ ದೊರೆಯುತ್ತದೆ.

ಅದೇ ಯೋಜನೆಯಲ್ಲಿ ಹಿರಿಯ ನಾಗರಿಕರು ₹3 ಲಕ್ಷ ಹೂಡಿಕೆ ಮಾಡಿದರೆ, ಮೆಚ್ಯೂರಿಟಿ ವೇಳೆ ಸುಮಾರು ₹4,56,276 ಮೊತ್ತ ಪಡೆಯುವ ಸಾಧ್ಯತೆ ಇದೆ. ಅಂದರೆ ಸುಮಾರು ₹1,56,276 ಬಡ್ಡಿ ಆದಾಯ ಸಿಗುತ್ತದೆ.

ಅತ್ಯಂತ ಹಿರಿಯ ನಾಗರಿಕರಿಗೆ ಇನ್ನಷ್ಟು ಲಾಭ ದೊರೆಯಬಹುದು. ₹3 ಲಕ್ಷ ಹೂಡಿಕೆಯ ಮೇಲೆ 6 ವರ್ಷಗಳ ನಂತರ ಸುಮಾರು ₹4,58,974 ಮೊತ್ತ ಸಿಗುವ ಸಾಧ್ಯತೆ ಇದ್ದು, ಅದರಲ್ಲಿ ಸುಮಾರು ₹1,58,974 ಬಡ್ಡಿ ಆದಾಯವಾಗಿರುತ್ತದೆ.

ಇನ್ನೊಂದೆಡೆ, 46 ರಿಂದ 179 ದಿನಗಳ ಎಫ್‌ಡಿಗಳಿಗೆ ಸುಮಾರು 4.90% ರಿಂದ 5.50% ವರೆಗೆ ಬಡ್ಡಿದರ ದೊರೆಯುತ್ತದೆ. 180 ರಿಂದ 210 ದಿನಗಳ ಅವಧಿಯ ಯೋಜನೆಗಳಿಗೆ 5.65% ರಿಂದ 6.25% ವರೆಗೆ ಬಡ್ಡಿ ಸಿಗುತ್ತದೆ. ಹೀಗಾಗಿ ಹೂಡಿಕೆದಾರರು ತಮ್ಮ ಆರ್ಥಿಕ ಗುರಿಗೆ ತಕ್ಕಂತೆ ಸೂಕ್ತ ಅವಧಿಯ ಯೋಜನೆಯನ್ನು ಆಯ್ಕೆ ಮಾಡಬಹುದು.

ಖಚಿತ ಆದಾಯ, ಬಂಡವಾಳದ ಭದ್ರತೆ ಹಾಗೂ ಸರ್ಕಾರಿ ಬ್ಯಾಂಕ್ ಮೇಲಿನ ವಿಶ್ವಾಸದ ಕಾರಣದಿಂದ ಎಸ್‌ಬಿಐ ಎಫ್‌ಡಿಗಳು ಇಂದಿಗೂ ಲಕ್ಷಾಂತರ ಹೂಡಿಕೆದಾರರ ಮೊದಲ ಆಯ್ಕೆಯಾಗಿವೆ.