ಹದಿಹರೆಯದ ಹೆಣ್ಣುಮಕ್ಕಳಲ್ಲಿ ಖಿನ್ನತೆ: ಪೋಷಕರು ನಿರ್ಲಕ್ಷಿಸಬಾರದ 6 ಪ್ರಮುಖ ಲಕ್ಷಣಗಳು

Depression in teen girls: ಇಂದಿನ ಸ್ಪರ್ಧಾತ್ಮಕ ಜಗತ್ತು, ಸಾಮಾಜಿಕ ಜಾಲತಾಣಗಳ ಒತ್ತಡ ಮತ್ತು ಹಾರ್ಮೋನುಗಳ ಬದಲಾವಣೆಯಿಂದಾಗಿ ಹದಿಹರೆಯದ ಹೆಣ್ಣುಮಕ್ಕಳು ಮಾನಸಿಕ ಒತ್ತಡಕ್ಕೆ ಒಳಗಾಗುವುದು ಹೆಚ್ಚುತ್ತಿದೆ. ಸಾಮಾನ್ಯವಾಗಿ ಪೋಷಕರು ಇದನ್ನು ‘ಮೂಡ್ ಸ್ವಿಂಗ್ಸ್’ ಅಥವಾ ವಯಸ್ಸಿನ ಸಹಜ ಚೇಷ್ಟೆ ಎಂದು ನಿರ್ಲಕ್ಷಿಸುತ್ತಾರೆ. ಆದರೆ, ಇದು ಗಂಭೀರ ಖಿನ್ನತೆಯ (Depression) ಲಕ್ಷಣವಾಗಿರಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಖಿನ್ನತೆಯು ಯಾವಾಗಲೂ ಕಣ್ಣೀರು ಅಥವಾ ಅಳುಕಿನ ರೂಪದಲ್ಲಿ ಇರುವುದಿಲ್ಲ. ಬದಲಾಗಿ ದೈನಂದಿನ ವರ್ತನೆಯಲ್ಲಿನ ಈ ಕೆಳಗಿನ 6 ಬದಲಾವಣೆಗಳ ಮೂಲಕ ವ್ಯಕ್ತವಾಗಬಹುದು:

ಅತಿಯಾದ ಸಿಟ್ಟು ಮತ್ತು ಕಿರಿಕಿರಿ

ದೊಡ್ಡವರಲ್ಲಿ ಖಿನ್ನತೆಯು ಬೇಸರದ ರೂಪದಲ್ಲಿ ಕಂಡುಬಂದರೆ, ಹದಿಹರೆಯದವರಲ್ಲಿ ಅದು ಸಿಟ್ಟಿನ ರೂಪದಲ್ಲಿ ಕಾಣಿಸಿಕೊಳ್ಳುತ್ತದೆ. ಸಣ್ಣ ವಿಷಯಗಳಿಗೂ ಅತಿಯಾಗಿ ವಾದ ಮಾಡುವುದು ಅಥವಾ ಸದಾ ಕಿರಿಕಿರಿ ಮಾಡಿಕೊಳ್ಳುವುದು ಖಿನ್ನತೆಯ ಮೊದಲ ಲಕ್ಷಣವಾಗಿರಬಹುದು.

ಸಾಮಾಜಿಕ ಒಂಟಿತನ

ಹಿಂದೆ ಲವಲವಿಕೆಯಿಂದ ಇರುತ್ತಿದ್ದ ಹುಡುಗಿ ಇದ್ದಕ್ಕಿದ್ದಂತೆ ತನ್ನ ರೂಮಿನೊಳಗೆ ಬಂಧಿಯಾಗುವುದು, ಸ್ನೇಹಿತರ ಜೊತೆ ಹೊರಹೋಗಲು ನಿರಾಕರಿಸುವುದು ಅಥವಾ ಪ್ರೀತಿಪಾತ್ರ ಹವ್ಯಾಸಗಳಲ್ಲಿ ಆಸಕ್ತಿ ಕಳೆದುಕೊಳ್ಳುವುದು ಆಕೆಯ ಮನಸ್ಸಿನ ಮೇಲಿನ ಒತ್ತಡವನ್ನು ಸೂಚಿಸುತ್ತದೆ.

ವಿವರಿಸಲಾಗದ ದೈಹಿಕ ನೋವುಗಳು

ಖಿನ್ನತೆಯು ಕೇವಲ ಮನಸ್ಸಿಗೆ ಸೀಮಿತವಾಗಿಲ್ಲ. ಇದು ದೇಹದ ಮೇಲೂ ಪರಿಣಾಮ ಬೀರುತ್ತದೆ. ಯಾವುದೇ ವೈದ್ಯಕೀಯ ಕಾರಣವಿಲ್ಲದೆ ಪದೇ ಪದೇ ತಲೆನೋವು, ಹೊಟ್ಟೆನೋವು, ಸುಸ್ತು ಅಥವಾ ನಿದ್ರೆಯ ವ್ಯತ್ಯಾಸಗಳು ಕಂಡುಬಂದರೆ ಅದು ಮಾನಸಿಕ ಆರೋಗ್ಯದ ಏರುಪೇರಾಗಿರಬಹುದು.

ಶೈಕ್ಷಣಿಕ ಪ್ರಗತಿಯಲ್ಲಿ ಕುಸಿತ

ಏಕಾಗ್ರತೆಯ ಕೊರತೆ ಮತ್ತು ಮರೆವು ಖಿನ್ನತೆಯ ನೇರ ಪರಿಣಾಮಗಳು. ಓದಿನಲ್ಲಿ ಆಸಕ್ತಿ ಕಳೆದುಕೊಳ್ಳುವುದು ಅಥವಾ ಇದ್ದಕ್ಕಿದ್ದಂತೆ ಪರೀಕ್ಷೆಯ ಅಂಕಗಳು ಕುಸಿಯುವುದು ಕೇವಲ ಸೋಮಾರಿತನವಲ್ಲ, ಬದಲಾಗಿ ಆತಂಕದ ಲಕ್ಷಣವಾಗಿರಬಹುದು.

‘ಯಾವುದೂ ಬೇಡ’ ಎನ್ನುವ ಅಸಡ್ಡೆ

ಕೆಲವೊಮ್ಮೆ ಹದಿಹರೆಯದವರು ತಮ್ಮ ನೋವನ್ನು ಮುಚ್ಚಿಡಲು ‘ನನಗೆ ಯಾವುದರ ಬಗ್ಗೆಯೂ ಕಾಳಜಿಯಿಲ್ಲ’ ಎನ್ನುವಂತೆ ನಟಿಸುತ್ತಾರೆ. ಎಲ್ಲದಕ್ಕೂ ‘ಏನಾದ್ರೂ ಆಗ್ಲಿ’, ‘ನನಗೇನು’ ಎಂಬ ಉತ್ತರಗಳು ಅವರ ಒಳಗಿನ ಅಸಹಾಯಕತೆಯನ್ನು ತೋರಿಸುತ್ತವೆ.

ಕಡಿಮೆ ಆತ್ಮಗೌರವ

ತಮ್ಮನ್ನು ತಾವು ಟೀಕಿಸಿಕೊಳ್ಳುವುದು, ಸದಾ ಅಪರಾಧ ಪ್ರಜ್ಞೆ ಅನುಭವಿಸುವುದು ಮತ್ತು “ನನ್ನಿಂದ ಏನು ಸಾಧ್ಯವಿಲ್ಲ” ಎಂಬ ನಿರಾಶಾವಾದಿ ಮಾತುಗಳು ಅವರಲ್ಲಿನ ಆತ್ಮವಿಶ್ವಾಸ ಕುಸಿದಿರುವುದಕ್ಕೆ ಸಾಕ್ಷಿ.

ಕರಾವಳಿಯತ್ತ ಬೆರಳು ಮಾಡುವ ಮುನ್ನ ಕಲಬುರ್ಗಿಯ ದಯನೀಯ ಸ್ಥಿತಿ ನೋಡಿ: ಸಚಿವ ಪ್ರಿಯಾಂಕ್ ಖರ್ಗೆಗೆ ಸುನೀಲ್ ಕುಮಾರ್ ತಪರಾಕಿ

ಪೋಷಕರು ಏನು ಮಾಡಬಹುದು?

ಮನೋವೈದ್ಯರಾದ ಜೀರಕ್ ಮಾರ್ಕರ್ ಅವರ ಪ್ರಕಾರ, “ನಿಮ್ಮ ಮಗು ಅಸಹಜವಾಗಿ ವರ್ತಿಸುತ್ತಿದೆ ಎನಿಸಿದರೆ ಅದನ್ನು ಶಿಕ್ಷಿಸುವ ಬದಲು ಪ್ರೀತಿಯಿಂದ ವಿಚಾರಿಸಿ.”

• ಮುಕ್ತ ಸಂಭಾಷಣೆ: ಅವರು ಮಾತನಾಡುವಾಗ ಮಧ್ಯಪ್ರವೇಶಿಸದೆ ಕೇಳಿಸಿಕೊಳ್ಳಿ.
• ತೀರ್ಪು ನೀಡಬೇಡಿ: ಅವರ ತಪ್ಪುಗಳನ್ನು ಎಣಿಸುವ ಬದಲು ಅವರ ಭಾವನೆಗಳಿಗೆ ಬೆಲೆ ಕೊಡಿ.
• ವೃತ್ತಿಪರ ಸಹಾಯ: ಲಕ್ಷಣಗಳು ಎರಡು ವಾರಗಳಿಗಿಂತ ಹೆಚ್ಚು ಕಾಲ ಮುಂದುವರಿದರೆ ತಜ್ಞ ವೈದ್ಯರ ಸಲಹೆ ಪಡೆಯುವುದು ಉತ್ತಮ.