ಕೆನರಾ ಬ್ಯಾಂಕ್ ಕಟ್ಟಡ ಕುಸಿತ: ಅವಶೇಷಗಳಡಿ ಸಿಲುಕಿದ ಕೋಟ್ಯಂತರ ರೂಪಾಯಿ ನಗದು, ಚಿನ್ನ!

ಕೆನರಾ ಬ್ಯಾಂಕ್‌ನ ಕಟ್ಟಡ ಕುಸಿದು (Canara bank building collapse) ಕೋಟ್ಯಂತರ ರೂಪಾಯಿ ನಗದು ಮತ್ತು ಚಿನ್ನ ಕಟ್ಟಡದ ಅವಶೇಷಗಳ ಅಡಿ ಸಿಲುಕಿದ ಭೀಕರ ಘಟನೆ ನಡೆದಿದೆ.  ಆಗ್ರಾದ ಬೆಲಂಗಂಜ್ ಪ್ರದೇಶದಲ್ಲಿ ಕೆನರಾ ಬ್ಯಾಂಕ್‌ನ ಹಳೆಯ ಕಟ್ಟಡವೊಂದು ಕುಸಿದು ಬಿದ್ದಿದ್ದು, ಅವಶೇಷಗಳ ಅಡಿಯಲ್ಲಿ ಕೋಟ್ಯಂತರ ರೂಪಾಯಿ ಮೌಲ್ಯದ ನಗದು, ಆಭರಣಗಳು ಮತ್ತು ಪ್ರಮುಖ ದಾಖಲೆಗಳು ಸಿಲುಕಿಕೊಂಡಿವೆ. ಈ ಘಟನೆಯ ಬೆನ್ನಲ್ಲೇ ಹಣದ ಆಸೆಗೆ ಜನರು ಅವಶೇಷಗಳ ಮೇಲೆ ಮುಗಿಬಿದ್ದ ಪ್ರಸಂಗ ನಡೆದಿದ್ದು, ಪೊಲೀಸರು ಪರಿಸ್ಥಿತಿಯನ್ನು ಹತೋಟಿಗೆ ತರಲು ಹರಸಾಹಸ ಪಡಬೇಕಾಯಿತು.

ಘಟನೆ ನಡೆದಿದ್ದು ಹೇಗೆ?

ಬ್ಯಾಂಕ್ ಕಟ್ಟಡದ ಪಕ್ಕದಲ್ಲೇ ಮಾಲ್ ಒಂದರ ನಿರ್ಮಾಣಕ್ಕಾಗಿ ಸುಮಾರು 40 ಅಡಿ ಆಳದವರೆಗೆ ಉತ್ಖನನ ಕಾರ್ಯ ನಡೆಯುತ್ತಿತ್ತು. ಈ ಕಾಮಗಾರಿಯ ಒತ್ತಡಕ್ಕೆ ಸಿಲುಕಿ ಗುರುವಾರ ಮಧ್ಯಾಹ್ನ ಬ್ಯಾಂಕ್ ಕಟ್ಟಡದ ಅರ್ಧ ಭಾಗ ಕುಸಿದು ಬಿತ್ತು. ಘಟನೆಯ ಸಮಯದಲ್ಲಿ ನಾಲ್ವರು ಗ್ರಾಹಕರು ಮತ್ತು ಸಿಬ್ಬಂದಿಗಳು ಬ್ಯಾಂಕ್ ಒಳಗಿದ್ದರೂ, ಅದೃಷ್ಟವಶಾತ್ ಯಾರಿಗೂ ಪ್ರಾಣಾಪಾಯ ಸಂಭವಿಸಿಲ್ಲ.

ಹಣಕ್ಕಾಗಿ ಜನರ ಮುಗಿಬಿದ್ದ ಪ್ರಸಂಗ:

ಕಟ್ಟಡ ಕುಸಿಯುತ್ತಿದ್ದಂತೆ “ಅವಶೇಷಗಳಡಿ ಕೋಟಿ ಕೋಟಿ ಹಣ ಬಿದ್ದಿದೆ” ಎಂಬ ವದಂತಿ ಹರಡಿತು. ಇದನ್ನು ಕೇಳಿದ ಸ್ಥಳೀಯರು ಚೀಲಗಳು ಮತ್ತು ಬ್ಯಾಗ್‌ಗಳೊಂದಿಗೆ ಧಾವಿಸಿ ಬಂದು ಮಣ್ಣಿನಡಿ ಹಣಕ್ಕಾಗಿ ಹುಡುಕಾಟ ನಡೆಸಲಾರಂಭಿಸಿದರು. ತಕ್ಷಣವೇ ಕಾರ್ಯಪ್ರವೃತ್ತರಾದ ಬ್ಯಾಂಕ್ ಅಧಿಕಾರಿಗಳು ಪೊಲೀಸರಿಗೆ ಮಾಹಿತಿ ನೀಡಿದರು. ನಂತರ ಸ್ಥಳಕ್ಕೆ ಆಗಮಿಸಿದ ಪಿಎಸಿ (PAC) ಪಡೆ ಮತ್ತು ಪೊಲೀಸರು ಇಡೀ ಪ್ರದೇಶವನ್ನು ಸುತ್ತುವರಿದು ಜನರನ್ನು ಚದುರಿಸಿದರು.

ಸುರಕ್ಷಿತವಾಗಿ ಸ್ಥಳಾಂತರಗೊಂಡ ನಗದು:

ಪೊಲೀಸರ ಬಿಗಿ ಬಂದೋಬಸ್ತ್ ನಡುವೆ ಅವಶೇಷಗಳಲ್ಲಿದ್ದ ಸುಮಾರು 25 ಲಕ್ಷ ರೂಪಾಯಿ ನಗದು ಮತ್ತು ಪ್ರಮುಖ ಚಿಲ್ಲರೆ ಹಣವನ್ನು ಹೊರತೆಗೆದು ಬೇರೆ ಶಾಖೆಗೆ ಸ್ಥಳಾಂತರಿಸಲಾಗಿದೆ. ಈ ಶಾಖೆಯು ಸುಮಾರು 300 ಕೋಟಿ ರೂಪಾಯಿಗಳ ವಹಿವಾಟು ನಡೆಸುತ್ತಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪತಿ ಎಸಿ ಕೊಡಿಸಲ್ಲ ಅಂದಿದ್ದಕ್ಕೆ ಪತ್ನಿ ಆತ್ಮಹತ್ಯೆ..!

ಇನ್ನೂ ಸಿಗದ ಲಾಕರ್ ಕೀಗಳು:

ಕಟ್ಟಡದ ಹಿಂಭಾಗದಲ್ಲಿದ್ದ ಲಾಕರ್‌ಗಳಲ್ಲಿ ಗ್ರಾಹಕರ ಕೋಟ್ಯಂತರ ರೂಪಾಯಿ ಮೌಲ್ಯದ ಚಿನ್ನಾಭರಣಗಳು ಮತ್ತು ಸಾಲಕ್ಕಾಗಿ ಒತ್ತೆ ಇಟ್ಟಿದ್ದ ಚಿನ್ನ ಇವೆ. ಸದ್ಯಕ್ಕೆ ಈ ಲಾಕರ್ ಕೊಠಡಿಗಳಿಗೆ ಹೋಗುವ ದಾರಿ ಬಂದ್ ಆಗಿದೆ. ಕಟ್ಟಡದ ಮೇಲ್ಛಾವಣಿಯನ್ನು ಒಡೆದು ಲಾಕರ್‌ಗಳನ್ನು ತಲುಪಲು ಪ್ರಯತ್ನಿಸಲಾಗುತ್ತಿದೆ. ಆದರೆ, ಬ್ಯಾಂಕ್‌ನ ಲಾಕರ್ ಕೀಗಳು ಇನ್ನೂ ಪತ್ತೆಯಾಗಿಲ್ಲ, ಅವು ಅವಶೇಷಗಳಲ್ಲೇ ಹೂತುಹೋಗಿವೆ ಎಂದು ಶಂಕಿಸಲಾಗಿದೆ.

ಗ್ರಾಹಕರಿಗೆ ಭರವಸೆ:

ಬ್ಯಾಂಕ್ ಅಧಿಕಾರಿಗಳು ಗ್ರಾಹಕರಿಗೆ ಗಾಬರಿಯಾಗದಂತೆ ಮನವಿ ಮಾಡಿದ್ದಾರೆ. ಮುಂದಿನ ಏಳು ದಿನಗಳ ಒಳಗಾಗಿ ಲಾಕರ್‌ಗಳನ್ನು ಸುರಕ್ಷಿತವಾಗಿ ಹೊರತೆಗೆದು ಗ್ರಾಹಕರಿಗೆ ತಮ್ಮ ವಸ್ತುಗಳನ್ನು ಪಡೆಯಲು ವ್ಯವಸ್ಥೆ ಮಾಡಲಾಗುವುದು ಎಂದು ಭರವಸೆ ನೀಡಿದ್ದಾರೆ. ಸದ್ಯಕ್ಕೆ ಈ ಶಾಖೆಯ ಕಾರ್ಯಕಲಾಪಗಳನ್ನು ತಾತ್ಕಾಲಿಕವಾಗಿ ಮತ್ತೊಂದು ಶಾಖೆಗೆ ವರ್ಗಾಯಿಸಲಾಗಿದೆ.