ಸಿರಿಯಾ ಮೇಲೆ ಅಮೇರಿಕಾದಿಂದ ಭೀಕರ ದಾಳಿ; ಸಿರಿಯಾದಿಂದಲೇ ಬೆಂಬಲ!

ಸಿರಿಯಾದಲ್ಲಿ ಐಸಿಸ್ ಭಯೋತ್ಪಾದಕರು ನಡೆಸಿದ ದಾಳಿಯಲ್ಲಿ ಅಮೆರಿಕದ ಮೂವರು ನಾಗರಿಕರು ಸಾವನ್ನಪ್ಪಿದ ಬೆನ್ನಲ್ಲೇ, ಅಮೆರಿಕ ಸೇನೆಯು ಸಿರಿಯಾದ ಮೇಲೆ ‘ಆಪರೇಷನ್ ಹಾಕಿ ಸ್ಟ್ರೈಕ್’ (Operation Hawkeye Strike) ಹೆಸರಿನಲ್ಲಿ ಬೃಹತ್ ಪ್ರತಿದಾಳಿ ಆರಂಭಿಸಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನೇರ ಆದೇಶದ ಮೇರೆಗೆ ಈ ಕಾರ್ಯಾಚರಣೆ ನಡೆದಿದೆ.

ಕಳೆದ ಡಿಸೆಂಬರ್ 13ರಂದು ಸಿರಿಯಾದ ಪಾಲ್ಮಿರಾ ನಗರದ ಬಳಿ ಐಸಿಸ್ ಉಗ್ರರು ನಡೆಸಿದ ಅಂಬುಷ್ ದಾಳಿಯಲ್ಲಿ ಅಮೆರಿಕದ ಇಬ್ಬರು ಸೈನಿಕರು (ಸಾರ್ಜೆಂಟ್ ವಿಲಿಯಂ ಹಾವರ್ಡ್ ಮತ್ತು ಸಾರ್ಜೆಂಟ್ ಎಡ್ಗರ್ ಟೊರೆಸ್ ತೋವರ್) ಹಾಗೂ ಒಬ್ಬ ನಾಗರಿಕ ಭಾಷಾಂತರಕಾರ ಮೃತಪಟ್ಟಿದ್ದರು. ಈ ಘಟನೆಯನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ ಅಮೆರಿಕ, ವಾರದೊಳಗೆ ಐಸಿಸ್ ಅಡಗುದಾಣಗಳನ್ನು ಧ್ವಂಸಗೊಳಿಸಲು ಸಜ್ಜಾಯಿತು.

ಶುಕ್ರವಾರ (ಡಿಸೆಂಬರ್ 19, 2025) ರಾತ್ರಿ ಅಮೆರಿಕದ ಸೆಂಟ್ರಲ್ ಕಮಾಂಡ್ ಸಿರಿಯಾದಾದ್ಯಂತ ಇರುವ ಐಸಿಸ್ ನೆಲೆಗಳ ಮೇಲೆ ಸರಣಿ ವೈಮಾನಿಕ ದಾಳಿಗಳನ್ನು ನಡೆಸಿದೆ. ಎಫ್-15 ಯುದ್ಧ ವಿಮಾನಗಳು ಮತ್ತು ಅಪಾಚೆ ಹೆಲಿಕಾಪ್ಟರ್‌ಗಳನ್ನು ಬಳಸಿ ಉಗ್ರರ 70ಕ್ಕೂ ಹೆಚ್ಚು ಅಡಗುದಾಣಗಳ ಮೇಲೆ 100ಕ್ಕೂ ಅಧಿಕ ನಿಖರ ಕ್ಷಿಪಣಿಗಳನ್ನು ಪ್ರಯೋಗಿಸಲಾಗಿದೆ. ಈ ದಾಳಿಯಲ್ಲಿ ನೂರಾರು ಉಗ್ರರು ಸಾವನ್ನಪ್ಪಿರುವ ಸಾಧ್ಯತೆಯಿದ್ದು, ಉಗ್ರರ ಶಸ್ತ್ರಾಸ್ತ್ರ ಸಂಗ್ರಹಾಗಾರಗಳು ಸಂಪೂರ್ಣವಾಗಿ ಸುಟ್ಟು ಭಸ್ಮವಾಗಿವೆ.

ಈ ಕಾರ್ಯಾಚರಣೆಯ ಬಗ್ಗೆ ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಪ್ರತಿಕ್ರಿಯಿಸಿದ್ದು, “ಇದು ಯಾವುದೇ ದೇಶದ ವಿರುದ್ಧದ ಯುದ್ಧದ ಆರಂಭವಲ್ಲ, ಬದಲಿಗೆ ಅಮೆರಿಕನ್ನರನ್ನು ಕೊಂದವರಿಗೆ ನೀಡಿದ ಸೇಡಿನ ಉತ್ತರ” ಎಂದು ಹೇಳಿದ್ದಾರೆ. ವಿಶೇಷವೆಂದರೆ, ಸಿರಿಯಾದ ಹೊಸ ಸರ್ಕಾರವೂ ಈ ದಾಳಿಗೆ ಬೆಂಬಲ ಸೂಚಿಸಿದ್ದು, ದೇಶದಲ್ಲಿ ಐಸಿಸ್ ಉಗ್ರರನ್ನು ಸಂಪೂರ್ಣವಾಗಿ ತೊಡೆದುಹಾಕಲು ಅಮೆರಿಕದ ಜೊತೆ ಕೈಜೋಡಿಸಿದೆ.

ಇದನ್ನೂ ಓದಿ: ಕೊಲ್ಲೂರು ದೇಗುಲದಲ್ಲಿ ಆನುವಂಶಿಕವಲ್ಲದ ಅರ್ಚಕರಿಗೆ ಹೋಮ ನಡೆಸಲು ಅವಕಾಶ : ಕೋರ್ಟ್ ಮೇಟ್ಟಿಲೇರಿದ ತಂತ್ರಿಗಳು

ಸಾಮಾಜಿಕ ಜಾಲತಾಣಗಳಲ್ಲಿ ಇದು ‘ಮೂರನೇ ಮಹಾಯುದ್ಧ’ದ ಮುನ್ಸೂಚನೆ ಎಂಬ ಆತಂಕ ಹರಡುತ್ತಿದ್ದರೂ, ಸದ್ಯದ ಮಟ್ಟಿಗೆ ಇದು ಕೇವಲ ಭಯೋತ್ಪಾದನೆಯನ್ನು ಹತ್ತಿಕ್ಕುವ ಮಿಲಿಟರಿ ಕಾರ್ಯಾಚರಣೆಯಾಗಿದೆ. ಯಾವುದೇ ಬಲಾಢ್ಯ ದೇಶಗಳ ನಡುವಿನ ನೇರ ಸಂಘರ್ಷ ಇದಲ್ಲ ಎಂಬುದು ಸ್ಪಷ್ಟವಾಗಿದೆ.