ಮಗನ ಪ್ರಾಣ ಉಳಿಸಲು ಹೋರಾಡಿ ಚಿರತೆಯನ್ನು ಕೊಂದ 60 ವರ್ಷದ ವೃದ್ಧ!

Gujarat man killed leopard: ಗಿರ್ ಸೋಮನಾಥ್ (ಗುಜರಾತ್): ಸ್ವಂತ ಮಗನ ಪ್ರಾಣ ಉಳಿಸಲು 60 ವರ್ಷದ ತಂದೆಯೊಬ್ಬರು ಚಿರತೆಯೊಂದಿಗೆ ಸಾಹಸಮಯ ಹೋರಾಟ ನಡೆಸಿ, ಅದನ್ನು ಹತ್ಯೆ ಮಾಡಿರುವ ರೋಮಾಂಚಕ ಘಟನೆ ಗುಜರಾತ್‌ನ ಗಿರ್ ಸೋಮನಾಥ್ ಜಿಲ್ಲೆಯಲ್ಲಿ ನಡೆದಿದೆ.

ಘಟನೆಯ ವಿವರ:
ಜಿಲ್ಲೆಯ ಉನಾ ಪ್ರದೇಶದ ನಿವಾಸಿ ಬಾಬುಭಾಯಿ ನಾರಣ್‌ಭಾಯಿ ವಾಜಾ (60) ಅವರು ಬುಧವಾರ ಸಂಜೆ ತಮ್ಮ ಮನೆಯ ಹೊರಗಿನ ಶೆಡ್‌ನಲ್ಲಿ ಕುಳಿತಿದ್ದಾಗ ಈ ಘಟನೆ ಸಂಭವಿಸಿದೆ. ಕತ್ತಲಲ್ಲಿ ಹೊಂಚು ಹಾಕಿದ್ದ ಚಿರತೆಯು ದಿಢೀರನೆ ಬಾಬುಭಾಯಿ ಅವರ ಮೇಲೆ ದಾಳಿ ನಡೆಸಿ, ಗಂಟಲನ್ನು ಕಚ್ಚಿ ಹಿಡಿದಿದೆ.

ತಂದೆಯ ಕಿರುಚಾಟ ಕೇಳಿ ಅವರ 27 ವರ್ಷದ ಮಗ ಶಾರ್ದೂಲ್ ತಕ್ಷಣ ರಕ್ಷಣೆಗೆ ಧಾವಿಸಿದ್ದಾರೆ. ಈ ವೇಳೆ ಚಿರತೆಯು ಬಾಬುಭಾಯಿಯನ್ನು ಬಿಟ್ಟು ಮಗನ ಮೇಲೆರಗಿ ಆತನನ್ನು ಕೊಲ್ಲಲು ಯತ್ನಿಸಿದೆ. ಮಗನು ಚಿರತೆಯ ದವಡೆಗೆ ಸಿಲುಕಿದ್ದನ್ನು ಕಂಡ ಬಾಬುಭಾಯಿ ಅವರು ಎದೆಗುಂದದೆ, ಸಮೀಪದಲ್ಲೇ ಇದ್ದ ಕೊಡಲಿ ಮತ್ತು ಈಟಿಯಿಂದ ಚಿರತೆಯ ಮೇಲೆ ತೀವ್ರವಾಗಿ ದಾಳಿ ನಡೆಸಿದ್ದಾರೆ. ತಂದೆಯ ಸತತ ಹೊಡೆತಗಳಿಗೆ ಸಿಲುಕಿದ ಚಿರತೆಯು ಸ್ಥಳದಲ್ಲೇ ಮೃತಪಟ್ಟಿದೆ.

ಗಂಭೀರ ಗಾಯ, ಚಿಕಿತ್ಸೆ:
ಈ ಭೀಕರ ಕಾಳಗದಲ್ಲಿ ತಂದೆ ಮತ್ತು ಮಗ ಇಬ್ಬರೂ ತೀವ್ರವಾಗಿ ಗಾಯಗೊಂಡಿದ್ದಾರೆ. ಇಬ್ಬರನ್ನೂ ಮೊದಲು ಉನಾದ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಹೆಚ್ಚಿನ ಚಿಕಿತ್ಸೆಗಾಗಿ ನಂತರ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ.

ಜಾರಿಯಾಗದ ಕಾನೂನಿನಡಿ ಹಿಂದೂ ಕಾರ್ಯಕರ್ತರಿಗೆ ನೋಟಿಸ್: ಸರ್ಕಾರದ ವಿರುದ್ಧ ಸುನಿಲ್ ಕುಮಾರ್ ಕಿಡಿ

ಅರಣ್ಯ ಇಲಾಖೆಯಿಂದ ಪ್ರಕರಣ ದಾಖಲು:
ಘಟನೆಯ ನಂತರ ಅರಣ್ಯ ಇಲಾಖೆಗೆ ಮಾಹಿತಿ ನೀಡಲಾಗಿದ್ದು, ಅಧಿಕಾರಿಗಳು ಸ್ಥಳಕ್ಕೆ ಆಗಮಿಸಿ ಚಿರತೆಯ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ. ವನ್ಯಜೀವಿ ಸಂರಕ್ಷಣಾ ಕಾಯ್ದೆಯಡಿ ವನ್ಯಜೀವಿಯನ್ನು ಕೊಂದ ಆರೋಪದ ಮೇಲೆ ಬಾಬುಭಾಯಿ ಮತ್ತು ಶಾರ್ದೂಲ್ ವಿರುದ್ಧ ಅರಣ್ಯ ಇಲಾಖೆ ದೂರು ದಾಖಲಿಸಿಕೊಂಡಿದ್ದು, ಮುಂದಿನ ತನಿಖೆ ಕೈಗೊಂಡಿದೆ. ಆದರೆ, ಮಗನ ಪ್ರಾಣ ಉಳಿಸಲು ತಂದೆ ತೋರಿದ ಈ ಅಪ್ರತಿಮ ಧೈರ್ಯಕ್ಕೆ ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.