ಪಿಎಂ ಸ್ವನಿಧಿ ಕ್ರೆಡಿಟ್ ಕಾರ್ಡ್: ಯಾವ ಭದ್ರತೆ ಇಲ್ಲದೇ 50,000 ದವರೆಗೆ ಸಿಗುತ್ತೆ ಸಾಲ
PM SVANidhi Credit Card: ಬೀದಿ ಬದಿ ವ್ಯಾಪಾರಿಗಳನ್ನು ಆರ್ಥಿಕವಾಗಿ ಸಬಲೀಕರಣಗೊಳಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಮತ್ತೊಂದು ಮಹತ್ವದ ಹೆಜ್ಜೆ ಇಟ್ಟಿದೆ. ಪಿಎಂ ಸ್ವನಿಧಿ ಯೋಜನೆಯ ಫಲಾನುಭವಿಗಳಿಗೆ ಈಗ ವಿಶೇಷ ‘ಕ್ರೆಡಿಟ್ ಕಾರ್ಡ್’ ಸೌಲಭ್ಯವನ್ನು ನೀಡಲಾಗುತ್ತಿದ್ದು, ಇದು ಅವರ ದೈನಂದಿನ ವ್ಯಾಪಾರ ಮತ್ತು ತುರ್ತು ಅಗತ್ಯಗಳಿಗೆ ನೆರವಾಗಲಿದೆ.
ಈ ಕುರಿತು ಸಾಮಾಜಿಕ ಜಾಲತಾಣ ಎಕ್ಸ್ (X) ನಲ್ಲಿ ಮಾಹಿತಿ ಹಂಚಿಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ ಅವರು, “ಕ್ರೆಡಿಟ್ ಕಾರ್ಡ್ಗಳ ವಿತರಣೆ ಮತ್ತು ಸಾಲದ ಸೌಲಭ್ಯವು ಜನರ ಜೀವನಮಟ್ಟವನ್ನು ಸುಧಾರಿಸುವ ಮತ್ತು ಅವರನ್ನು ಸಶಕ್ತಗೊಳಿಸುವ ನಮ್ಮ ಪ್ರಯತ್ನಕ್ಕೆ ಹೆಚ್ಚಿನ ವೇಗವನ್ನು ನೀಡಲಿದೆ” ಎಂದು ತಿಳಿಸಿದ್ದಾರೆ.
ಏನಿದು ಪಿಎಂ ಸ್ವನಿಧಿ ಕ್ರೆಡಿಟ್ ಕಾರ್ಡ್?
ಸರ್ಕಾರವು ಯುಪಿಐ (UPI) ಲಿಂಕ್ ಮಾಡಲಾದ ‘ರೂಪೇ’ (RuPay) ಕ್ರೆಡಿಟ್ ಕಾರ್ಡ್ಗಳನ್ನು ಅರ್ಹ ವ್ಯಾಪಾರಿಗಳಿಗೆ ನೀಡುತ್ತಿದೆ. ಪ್ರಮುಖವಾಗಿ ಎರಡನೇ ಹಂತದ ಸಾಲವನ್ನು ಯಶಸ್ವಿಯಾಗಿ ಮರುಪಾವತಿಸಿದ ವ್ಯಾಪಾರಿಗಳು ಈ ಕಾರ್ಡ್ ಪಡೆಯಲು ಅರ್ಹರಾಗಿರುತ್ತಾರೆ. ಬ್ಯಾಂಕ್ ಆಫ್ ಬರೋಡಾ (BOB) ಈಗಾಗಲೇ ‘ಲೈಫ್ ಟೈಮ್ ಫ್ರೀ’ ಪಿಎಂ ಸ್ವನಿಧಿ ಕ್ರೆಡಿಟ್ ಕಾರ್ಡ್ಗಳನ್ನು ವಿತರಿಸಲು ಆರಂಭಿಸಿದೆ.
ಯೋಜನೆಯ ಪ್ರಮುಖ ಪ್ರಯೋಜನಗಳು:
- ಸಾಲದ ಸೌಲಭ್ಯ: ಮೊದಲ ಹಂತದಲ್ಲಿ ₹15,000 ವರೆಗೆ ಯಾವುದೇ ಭದ್ರತೆ ಇಲ್ಲದೆ (Collateral-free) ಸಾಲ ಸಿಗಲಿದೆ. ಇದನ್ನು ಸರಿಯಾಗಿ ಮರುಪಾವತಿಸಿದರೆ 2ನೇ ಹಂತದಲ್ಲಿ ₹25,000 ಮತ್ತು 3ನೇ ಹಂತದಲ್ಲಿ ₹50,000 ವರೆಗೆ ಸಾಲ ಪಡೆಯಬಹುದು.
- ರಿವಾರ್ಡ್ ಪಾಯಿಂಟ್ಸ್: ಪ್ರತಿ ₹100 ಖರ್ಚಿಗೆ 1 ರಿವಾರ್ಡ್ ಪಾಯಿಂಟ್ ದೊರೆಯಲಿದೆ.
- ಕ್ಯಾಶ್ಬ್ಯಾಕ್ ಸೌಲಭ್ಯ: ಡಿಜಿಟಲ್ ವ್ಯವಹಾರ ನಡೆಸುವ ವ್ಯಾಪಾರಿಗಳಿಗೆ ವರ್ಷಕ್ಕೆ ಒಟ್ಟು ₹1,200 ವರೆಗೆ ಕ್ಯಾಶ್ಬ್ಯಾಕ್ ಪಡೆಯುವ ಅವಕಾಶವಿದೆ.
- ಸಬ್ಸಿಡಿ: ಸಮಯಕ್ಕೆ ಸರಿಯಾಗಿ ಸಾಲ ಮರುಪಾವತಿಸುವವರಿಗೆ ಬಡ್ಡಿಯಲ್ಲಿ ರಿಯಾಯಿತಿ (Interest Subsidy) ನೀಡಲಾಗುತ್ತದೆ.
ಅರ್ಜಿ ಸಲ್ಲಿಸುವುದು ಹೇಗೆ?
ಅರ್ಹ ಬೀದಿ ಬದಿ ವ್ಯಾಪಾರಿಗಳು PM SVANidhi (PMS) ಅಧಿಕೃತ ಪೋರ್ಟಲ್ ಅಥವಾ ಪಿಎಂಎಸ್ ಮೊಬೈಲ್ ಆಪ್ ಮೂಲಕ ಈ ಕ್ರೆಡಿಟ್ ಕಾರ್ಡ್ಗೆ ಅರ್ಜಿ ಸಲ್ಲಿಸಬಹುದು.
ಕೋವಿಡ್ ಸಾಂಕ್ರಾಮಿಕದ ಸಮಯದಲ್ಲಿ ಸಂಕಷ್ಟಕ್ಕೆ ಸಿಲುಕಿದ್ದ ಬೀದಿ ಬದಿ ವ್ಯಾಪಾರಿಗಳಿಗೆ ನೆರವಾಗಲು 2020ರಲ್ಲಿ ಈ ಯೋಜನೆಯನ್ನು ಆರಂಭಿಸಲಾಗಿತ್ತು. ಇತ್ತೀಚೆಗೆ ಕೇಂದ್ರ ಸಚಿವ ಸಂಪುಟವು ಈ ಯೋಜನೆಯನ್ನು ಮಾರ್ಚ್ 31, 2030 ರವರೆಗೆ ವಿಸ್ತರಿಸಿದ್ದು, ಸುಮಾರು 1.15 ಕೋಟಿ ವ್ಯಾಪಾರಿಗಳಿಗೆ ಇದರ ಲಾಭ ತಲುಪಿಸುವ ಗುರಿ ಹೊಂದಿದೆ.
