ಸಾಮಾನ್ಯ ಪೆಟ್ರೋಲ್ vs ಪ್ರೀಮಿಯಂ ಪೆಟ್ರೋಲ್ ವ್ಯತ್ಯಾಸ ಏನು ಗೊತ್ತ
ಇಂಧನ ದರ ಏರಿಕೆಯ ನಡುವೆಯೇ ಸಾಮಾನ್ಯ ಮತ್ತು ಪ್ರೀಮಿಯಂ ಪೆಟ್ರೋಲ್ ಬಗ್ಗೆ ವಾಹನ ಸವಾರರಲ್ಲಿ ಚರ್ಚೆ ಹೆಚ್ಚಾಗಿದೆ. ಯಾವ ಪೆಟ್ರೋಲ್ ಯಾವ ವಾಹನಕ್ಕೆ ಸೂಕ್ತ? ಬೆಲೆ, ಮೈಲೇಜ್ ಹಾಗೂ ಎಂಜಿನ್ ಕಾರ್ಯಕ್ಷಮತೆಯಲ್ಲಿ ಏನು ವ್ಯತ್ಯಾಸ ಇದೆ ಎಂಬ ಮಾಹಿತಿ ಇಲ್ಲಿದೆ.
ದೇಶದಲ್ಲಿ ಇತ್ತೀಚೆಗೆ ಪೆಟ್ರೋಲ್ ಮತ್ತು ಡೀಸೆಲ್ ದರ ಏರಿಕೆಯಾಗಿರುವ ಹಿನ್ನೆಲೆ ವಾಹನ ಸವಾರರ ಗಮನ ಮತ್ತೆ ಇಂಧನದ ಗುಣಮಟ್ಟದ ಕಡೆ ತಿರುಗಿದೆ. ವಿಶೇಷವಾಗಿ ಸಾಮಾನ್ಯ ಪೆಟ್ರೋಲ್ ಮತ್ತು ಪ್ರೀಮಿಯಂ ಪೆಟ್ರೋಲ್ ನಡುವಿನ ವ್ಯತ್ಯಾಸ ಏನು ಎಂಬ ಪ್ರಶ್ನೆ ಹೆಚ್ಚಾಗಿದೆ. ಹಲವು ಮಂದಿ ಬೆಲೆ ಹೆಚ್ಚು ಕೊಟ್ಟರೆ ಮೈಲೇಜ್ ಹೆಚ್ಚಾಗುತ್ತದೆಯೇ ಎಂಬ ಕುತೂಹಲದಲ್ಲಿದ್ದಾರೆ.
ಸಾಮಾನ್ಯವಾಗಿ ಪ್ರತಿದಿನ ಬಳಕೆಯ ಬೈಕ್, ಸ್ಕೂಟರ್, ಕಾರುಗಳಲ್ಲಿ ಬಳಸುವ ಇಂಧನವೇ ರೆగ్యುಲರ್ ಅಥವಾ ಸಾಮಾನ್ಯ ಪೆಟ್ರೋಲ್. ಭಾರತದಲ್ಲಿ ಇದಕ್ಕೆ ಸಾಮಾನ್ಯವಾಗಿ 91 ಆಕ್ಟೇನ್ ಮಟ್ಟ ಇರುತ್ತದೆ. ಸಾಮಾನ್ಯ ಎಂಜಿನ್ ಹೊಂದಿರುವ ವಾಹನಗಳಿಗೆ ಇದು ಸಾಕಷ್ಟು ಪರಿಣಾಮಕಾರಿ ಎಂದು ವಾಹನ ತಯಾರಕರು ಸೂಚಿಸುತ್ತಾರೆ.
ಇದಕ್ಕೆ ವಿರುದ್ಧವಾಗಿ, ಪ್ರೀಮಿಯಂ ಪೆಟ್ರೋಲ್ನಲ್ಲಿ ಹೆಚ್ಚು ಆಕ್ಟೇನ್ ಪ್ರಮಾಣವಿದ್ದು, ಸಾಮಾನ್ಯ ಪೆಟ್ರೋಲ್ಗಿಂತ ಉತ್ತಮ ಗುಣಮಟ್ಟದ ಕೆಲವು ವಿಶೇಷ ಅಡಿಟಿವ್ಗಳನ್ನು ಸೇರಿಸಲಾಗುತ್ತದೆ. ಇದರ ಪರಿಣಾಮ ಎಂಜಿನ್ ಒಳಭಾಗ ಸ್ವಚ್ಛವಾಗಿರಲು ಸಹಾಯವಾಗುತ್ತದೆ. ಜೊತೆಗೆ ಕಾರ್ಬನ್ ಜಮಾವಣೆ ಕಡಿಮೆಯಾಗುವ ಮೂಲಕ ಎಂಜಿನ್ ಕಾರ್ಯಕ್ಷಮತೆ ಸುಧಾರಿಸಬಹುದು.
ಹೈ-ಪರ್ಫಾರ್ಮೆನ್ಸ್ ವಾಹನಗಳು, ಸ್ಪೋರ್ಟ್ಸ್ ಬೈಕ್ಗಳು, ಟರ್ಬೋ ಎಂಜಿನ್ ಹೊಂದಿರುವ ಕಾರುಗಳಿಗೆ ಸಾಮಾನ್ಯವಾಗಿ ಕಂಪನಿಗಳು ಪ್ರೀಮಿಯಂ ಪೆಟ್ರೋಲ್ ಬಳಸುವಂತೆ ಸಲಹೆ ನೀಡುತ್ತವೆ. ಈ ರೀತಿಯ ವಾಹನಗಳಲ್ಲಿ ಎಂಜಿನ್ ನಾಕಿಂಗ್ ಅಥವಾ ಶಬ್ದ ಸಮಸ್ಯೆ ಕಡಿಮೆಯಾಗಲು ಹೆಚ್ಚು ಆಕ್ಟೇನ್ ಇಂಧನ ನೆರವಾಗುತ್ತದೆ.
ಆದರೆ ಸಾಮಾನ್ಯ ವಾಹನಗಳಲ್ಲಿ ಕೇವಲ ದುಬಾರಿ ಎಂದು ಪ್ರೀಮಿಯಂ ಪೆಟ್ರೋಲ್ ಬಳಸಬೇಕೆಂದಿಲ್ಲ. ವಾಹನ ತಯಾರಕ ಕಂಪನಿ ಯಾವ ಇಂಧನವನ್ನು ಶಿಫಾರಸು ಮಾಡಿತೋ ಅದನ್ನೇ ಬಳಸುವುದು ಉತ್ತಮ. ಇಲ್ಲದಿದ್ದರೆ ಹೆಚ್ಚುವರಿ ವೆಚ್ಚ ಮಾತ್ರ ಆಗಬಹುದು.
ಬೆಲೆಯ ವಿಚಾರದಲ್ಲಿಯೂ ದೊಡ್ಡ ವ್ಯತ್ಯಾಸ ಇದೆ. ಸಾಮಾನ್ಯ ಪೆಟ್ರೋಲ್ಗೆ ಹೋಲಿಸಿದರೆ ಪ್ರೀಮಿಯಂ ಪೆಟ್ರೋಲ್ ಪ್ರತಿ ಲೀಟರ್ಗೆ ಸುಮಾರು 8 ರಿಂದ 15 ರೂಪಾಯಿ ಹೆಚ್ಚು ದುಬಾರಿಯಾಗಿರುತ್ತದೆ. ಈ ದರ ನಗರ ಮತ್ತು ಕಂಪನಿಗಳ ಪ್ರಕಾರ ಬದಲಾಗುತ್ತದೆ.
ಇಂಧನ ಆಯ್ಕೆ ಮಾಡುವಾಗ ಕೇವಲ ಜಾಹೀರಾತು ನೋಡದೇ, ನಿಮ್ಮ ವಾಹನದ ಎಂಜಿನ್ ಅಗತ್ಯವೇನು ಎಂಬುದನ್ನು ಗಮನಿಸುವುದು ಮುಖ್ಯ. ಸರಿಯಾದ ಪೆಟ್ರೋಲ್ ಬಳಸಿದರೆ ಎಂಜಿನ್ ಆಯುಷ್ಯ ಹಾಗೂ ಕಾರ್ಯಕ್ಷಮತೆ ಎರಡೂ ಉತ್ತಮವಾಗಿರುತ್ತದೆ.
