ಬುರ್ಜ್ ಖಲೀಫಾದಲ್ಲಿ ರಾರಾಜಿಸೋ ಕಿಚ್ಚನ 3 ನಿಮಿಷದ ಲೇಸರ್ ಟೀಸರ್ ಗೆ ವೆಚ್ಚ ಮಾಡಿದ್ದು ಎಷ್ಟು ಗೊತ್ತಾ ..?

• ಅನಿತಾ ಬ್ರಹ್ಮಾವರ ( ದುಬೈ ಪ್ರತಿನಿಧಿ)

ದುಬೈ : ಸ್ಯಾಂಡಲ್ ವುಡ್ ನ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಟನೆಯ ವಿಕ್ರಾಂತ್ ರೋಣಾ ಅಬ್ಬರ ಜೋರಾಗಿದೆ. ದುಬೈನ ಬುರ್ಜ್ ಖಲೀಫಾದಲ್ಲಿಂದು ವಿಕ್ರಾಂತ್ ರೋಣಾನ ಟೀಸರ್ ರಾರಾಜಿಸಲಿದ್ದು, ಹೊಸ ದಾಖಲೆ ಬರೆಯಲು ಸಜ್ಜಾಗಿದೆ.

ಕಿಚ್ಚ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟು 25 ವರ್ಷ ಕಳೆದಿದೆ. ಈ ಹಿನ್ನೆಲೆಯಲ್ಲಿ ಕಿಚ್ಚನ ಬೆಳ್ಳಿ ಹಬ್ಬವನ್ನು ದಬೈನಲ್ಲಿ ಅದ್ದೂರಿಯಾಗಿ ಆಚರಿಸಲಾಗುತ್ತಿದೆ. ವಿಕ್ರಾಂತ್ ರೋಣಾ ಸಿನಿಮಾ ತಂಡ ಕಿಚ್ಚನ ಬೆಳ್ಳಿಹಬ್ಬಕ್ಕೆ ವಿಶೇಷ ಕೊಡುಗೆಯನ್ನು ನೀಡಲು ಸಜ್ಜಾಗಿದೆ. ಇಂದು ಸುದೀಪ್ ನಟನೆಯ ಬಹು ನಿರೀಕ್ಷಿತ ಸಿನಿಮಾ ವಿಕ್ರಾಂತ್ ರೋಣಾದ ಹೆಸರು ಬಿಡುಗಡೆಯಾಗಲಿದ್ದು, 3 ನಿಮಿಷಗಳ ಲೇಸರ್ ಟೀಸರ್ ಕೂಡ ಬಿಡುಗಡೆಯಾಗಲಿದೆ.

ಕಿಚ್ಚನ ಬೆಳ್ಳಿ ಹಬ್ಬದ ಆಚರಣೆ ಕಾರ್ಯಕ್ರಮವು ಬುರ್ಜ್ ಖಲೀಫಾದಲ್ಲಿ ಸುಮಾರು 45 ನಿಮಿಷಗಳ ಕಾಲ ನಡೆಯಲಿದ್ದು, 3 ನಿಮಿಷಗಳ ಲೇಸರ್ ಟೀಸರ್ ಗೆ ಚಿತ್ರತಂಡ ಬರೋಬ್ಬರಿ 70 ಲಕ್ಷ ರೂಪಾಯಿಗಳನ್ನು ವಿನಿಯೋಗಿಸುತ್ತಿದೆ.

ಬುರ್ಜ್ ಖಲೀಫಾದಲ್ಲಿ ರಾರಾಜಿಸಲಿರುವ ಟೀಸರ್ ನ್ನು ಸುಮಾರು ಒಂದೂವರೆ ಕಿಲೋ ಮೀಟರ್ ದೂರದಿಂದಲೇ ಶೂಟಿಂಗ್ ಮಾಡಲಾಗುತ್ತಿದ್ದು, 6 ಕ್ಯಾಮರಾ ಯೂನಿಟ್ ಗಳನ್ನು ಬಳಕೆ ಮಾಡಲಾಗುತ್ತಿದೆ.

ಕಿಚ್ಚಿನ ಬೆಳ್ಳಿಹಬ್ಬ ಕಾರ್ಯಕ್ರಮದಲ್ಲಿ ಸುದೀಪ್ ಪತ್ನಿ ಪ್ರಿಯ ಹಾಗೂ ಪುತ್ರಿ ಭಾಗಿಯಾಗಲಿದ್ದಾರೆ. ಕಿಚ್ಚನ ಬೆಳ್ಳಿ ಹಬ್ಬದ ಸಂಭ್ರಮವನ್ನು ಕಣ್ತುಂಬಿಕೊಳ್ಳಲು ಕೇವಲ ಕಿಚ್ಚ ಅಭಿಮಾನಿಗಳಷ್ಟೇ ಅಲ್ಲಾ ದುಬೈನಲ್ಲಿ ನೆಲೆಸಿರುವ ಕನ್ನಡಗಿಗರು ಕೂಡ ತುದಿಗಾಲಿನಲ್ಲಿ ನಿಂತಿದ್ದಾರೆ.