ಯೂಟ್ಯೂಬ್ ಆದಾಯಕ್ಕೆ ತೆರಿಗೆ ಇದೆಯೇ? ಕಂಟೆಂಟ್ ಕ್ರಿಯೇಟರ್ಗಳು ತಿಳಿಯಲೇಬೇಕಾದ ಮಾಹಿತಿ
ಯೂಟ್ಯೂಬ್, ಇನ್ಸ್ಟಾಗ್ರಾಂ ಮತ್ತು ಫ್ರೀಲಾನ್ಸಿಂಗ್ ಮೂಲಕ ಆದಾಯ ಗಳಿಸುವವರು ಆದಾಯ ತೆರಿಗೆ ನಿಯಮಗಳನ್ನು ಸರಿಯಾಗಿ ತಿಳಿದುಕೊಳ್ಳಬೇಕು. ಲಾಭದ ಲೆಕ್ಕ, ರಿಟರ್ನ್ಸ್ ಹಾಗೂ ಮುಂಗಡ ತೆರಿಗೆ ಪಾವತಿ ಕುರಿತು ತಜ್ಞರು ಸಲಹೆ ನೀಡಿದ್ದಾರೆ.
ಯೂಟ್ಯೂಬ್, ಇನ್ಸ್ಟಾಗ್ರಾಂ ಹಾಗೂ ಫ್ರೀಲಾನ್ಸಿಂಗ್ ಮೂಲಕ ಲಕ್ಷಾಂತರ ಮಂದಿ ಇಂದು ಆದಾಯ ಗಳಿಸುತ್ತಿದ್ದಾರೆ. ಡಿಜಿಟಲ್ ವಲಯದಲ್ಲಿ ಉದ್ಯೋಗಾವಕಾಶಗಳು ಹೆಚ್ಚಾಗುತ್ತಿದ್ದರೂ, ಆದಾಯದ ಜೊತೆಗೆ ತೆರಿಗೆ ನಿಯಮಗಳನ್ನು ಪಾಲಿಸುವ ಜವಾಬ್ದಾರಿಯೂ ಹೆಚ್ಚುತ್ತಿದೆ.
ತೆರಿಗೆ ತಜ್ಞರ ಪ್ರಕಾರ, ಕಂಟೆಂಟ್ ಕ್ರಿಯೇಟರ್ಗಳು ಅಥವಾ ಫ್ರೀಲಾನ್ಸರ್ಗಳ ಆದಾಯವನ್ನು ಸಾಮಾನ್ಯ ಉದ್ಯೋಗಿಗಳ ವೇತನವಾಗಿ ಪರಿಗಣಿಸುವುದಿಲ್ಲ. ಇದು ‘ವ್ಯವಹಾರ ಅಥವಾ ವೃತ್ತಿ ಆದಾಯ’ ವಿಭಾಗಕ್ಕೆ ಸೇರುತ್ತದೆ. ಆದ್ದರಿಂದ ವಾರ್ಷಿಕ ಆದಾಯ, ವೆಚ್ಚ ಹಾಗೂ ಲಾಭದ ಲೆಕ್ಕವನ್ನು ಸರಿಯಾಗಿ ನಿರ್ವಹಿಸುವುದು ಅಗತ್ಯ.
ಅನೇಕರು ಸಂಪೂರ್ಣ ಆದಾಯಕ್ಕೆ ತೆರಿಗೆ ಕಟ್ಟಬೇಕೆಂದು ಭಾವಿಸುತ್ತಾರೆ. ಆದರೆ ವಾಸ್ತವವಾಗಿ ತೆರಿಗೆ ವಿಧಿಸುವುದು ನಿವ್ವಳ ಲಾಭದ ಮೇಲೆ ಮಾತ್ರ. ಕೆಲಸಕ್ಕೆ ಬಳಸುವ ಲ್ಯಾಪ್ಟಾಪ್, ಕ್ಯಾಮೆರಾ, ಮೈಕ್ರೋಫೋನ್, ಎಡಿಟಿಂಗ್ ಸಾಫ್ಟ್ವೇರ್, ಇಂಟರ್ನೆಟ್, ಕಚೇರಿ ವೆಚ್ಚ ಸೇರಿದಂತೆ ಹಲವು ಖರ್ಚುಗಳನ್ನು ಕಾನೂನುಬದ್ಧವಾಗಿ ಕಡಿತಗೊಳಿಸಬಹುದು.
ಯೂಟ್ಯೂಬ್ ಜಾಹೀರಾತು ಆದಾಯ, ಬ್ರ್ಯಾಂಡ್ ಪ್ರಚಾರ, ಅಫಿಲಿಯೇಟ್ ಮಾರ್ಕೆಟಿಂಗ್ ಹಾಗೂ ಇನ್ಸ್ಟಾಗ್ರಾಂ ಪ್ರಚಾರದ ಹಣವನ್ನೂ ಆದಾಯ ತೆರಿಗೆ ರಿಟರ್ನ್ನಲ್ಲಿ ತೋರಿಸುವುದು ಕಡ್ಡಾಯ. ಕೆಲವು ಪಾವತಿಗಳಲ್ಲಿ ಮೂಲದಲ್ಲೇ ತೆರಿಗೆ (TDS) ಕಡಿತವಾಗುವ ಸಾಧ್ಯತೆಯೂ ಇರುತ್ತದೆ.
ವರ್ಷದ ಆದಾಯ ₹75 ಲಕ್ಷದೊಳಗಿದ್ದರೆ ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 44ADA ಹಲವು ವೃತ್ತಿಪರರಿಗೆ ಅನುಕೂಲಕರ ಆಯ್ಕೆಯಾಗಿದೆ. ಈ ವಿಧಾನದಲ್ಲಿ ಒಟ್ಟು ಆದಾಯದ ಶೇ.50ನ್ನು ಲಾಭ ಎಂದು ಪರಿಗಣಿಸಲಾಗುತ್ತದೆ. ಇದರಿಂದ ವಿವರವಾದ ವೆಚ್ಚದ ದಾಖಲೆಗಳನ್ನು ನೀಡುವ ಅಗತ್ಯ ಕಡಿಮೆಯಾಗುತ್ತದೆ.
ಇನ್ನೊಂದು ಪ್ರಮುಖ ಅಂಶವೆಂದರೆ ಮುಂಗಡ ತೆರಿಗೆ. ವರ್ಷದಲ್ಲಿ ಪಾವತಿಸಬೇಕಾದ ತೆರಿಗೆ ₹10,000 ಮೀರಿದರೆ, ಕಂತುಗಳಲ್ಲಿ ಮುಂಗಡ ತೆರಿಗೆ ಪಾವತಿಸಬೇಕು. ವಿಳಂಬವಾದರೆ ಬಡ್ಡಿ ಹಾಗೂ ದಂಡ ವಿಧಿಸುವ ಅವಕಾಶವಿದೆ.
ಡಿಜಿಟಲ್ ಆದಾಯ ಹೆಚ್ಚುತ್ತಿರುವ ಈ ಸಂದರ್ಭದಲ್ಲಿ ತೆರಿಗೆ ನಿಯಮಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡು ದಾಖಲೆಗಳನ್ನು ನಿರ್ವಹಿಸಿದರೆ, ಕಾನೂನುಬದ್ಧವಾಗಿ ತೆರಿಗೆ ಹೊರೆ ಕಡಿಮೆ ಮಾಡಿಕೊಳ್ಳಬಹುದು ಎಂದು ತಜ್ಞರು ಸಲಹೆ ನೀಡಿದ್ದಾರೆ.
