ಕ್ರೆಡಿಟ್ ಕಾರ್ಡ್ ಬಿಲ್ ತಡವಾದರೆ ಸಿಬಿಲ್ ಸ್ಕೋರ್ ಕುಸಿಯುತ್ತದೆಯೇ?
ಕ್ರೆಡಿಟ್ ಕಾರ್ಡ್ ಬಿಲ್ ಪಾವತಿಯಲ್ಲಿ ಒಂದು ಅಥವಾ ಎರಡು ದಿನ ತಡವಾದರೆ ಸಿಬಿಲ್ ಸ್ಕೋರ್ ಮೇಲೆ ತಕ್ಷಣ ಪರಿಣಾಮ ಬೀಳುವುದಿಲ್ಲ. ಆದರೆ ನಿರಂತರ ವಿಳಂಬ ಮಾಡಿದರೆ ಭವಿಷ್ಯದ ಸಾಲ ಅವಕಾಶಗಳಿಗೆ ತೊಂದರೆ ಉಂಟಾಗಬಹುದು.
ಇತ್ತೀಚಿನ ದಿನಗಳಲ್ಲಿ ಕ್ರೆಡಿಟ್ ಕಾರ್ಡ್ ಬಳಕೆ ಸಾಮಾನ್ಯವಾಗಿದೆ. ಆನ್ಲೈನ್ ಖರೀದಿ, ತುರ್ತು ವೆಚ್ಚಗಳು ಹಾಗೂ ದೈನಂದಿನ ವ್ಯವಹಾರಗಳಿಗೆ ಅನೇಕರು ಇದನ್ನು ಬಳಸುತ್ತಿದ್ದಾರೆ. ಆದರೆ ಕೆಲವೊಮ್ಮೆ ಹಣಕಾಸಿನ ಒತ್ತಡದಿಂದ ಬಿಲ್ ಪಾವತಿ ಕೆಲವು ದಿನ ತಡವಾಗುವುದು ಸಹಜ.
ಹಲವಾರು ಕಾರ್ಡ್ದಾರರು ಒಂದು ದಿನ ಬಿಲ್ ತಡವಾಗಿ ಪಾವತಿಸಿದರೆ ಸಿಬಿಲ್ ಸ್ಕೋರ್ (CIBIL Score) ತಕ್ಷಣ ಕುಸಿಯುತ್ತದೆ ಎಂದು ಆತಂಕಪಡುತ್ತಾರೆ. ಆದರೆ ಹಣಕಾಸು ತಜ್ಞರ ಪ್ರಕಾರ, ಕೇವಲ ಒಂದು ದಿನ ಅಥವಾ ಎರಡು ದಿನ ತಡವಾದ ಕಾರಣಕ್ಕೆ ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೆ ತಕ್ಷಣದ ಪರಿಣಾಮ ಬೀಳುವುದಿಲ್ಲ.
ಸಾಮಾನ್ಯವಾಗಿ ಬ್ಯಾಂಕುಗಳು ಪ್ರತಿಯೊಂದು ಸಣ್ಣ ವಿಳಂಬವನ್ನು ತಕ್ಷಣ ಕ್ರೆಡಿಟ್ ಬ್ಯೂರೋಗಳಿಗೆ ವರದಿ ಮಾಡುವುದಿಲ್ಲ. ಒಂದು ಅಥವಾ ಎರಡು ಬಾರಿ ಸಣ್ಣ ಮಟ್ಟಿನ ವಿಳಂಬವಾದರೆ ಹೆಚ್ಚಿನ ಸಂದರ್ಭಗಳಲ್ಲಿ ಸಿಬಿಲ್ ದಾಖಲೆಗಳಲ್ಲಿ ಅದು ಪ್ರತಿಫಲಿಸುವುದಿಲ್ಲ. ಆದರೆ ಇದೇ ಅಭ್ಯಾಸ ಪದೇ ಪದೇ ಮುಂದುವರಿದರೆ ಪರಿಸ್ಥಿತಿ ಬದಲಾಗಬಹುದು.
ವಾಸ್ತವವಾಗಿ, ಪಾವತಿಸಬೇಕಾದ ಮೊತ್ತವು ಸುಮಾರು 30 ದಿನಗಳಿಗಿಂತ ಹೆಚ್ಚು ಬಾಕಿ ಉಳಿದರೆ ಮಾತ್ರ ಅದು ಕ್ರೆಡಿಟ್ ವರದಿಯಲ್ಲಿ ನಕಾರಾತ್ಮಕ ದಾಖಲೆಯಾಗಿ ಕಾಣಿಸಿಕೊಳ್ಳುವ ಸಾಧ್ಯತೆ ಇರುತ್ತದೆ. ಆಗ ಸಿಬಿಲ್ ಸ್ಕೋರ್ ಕುಸಿಯಬಹುದು ಮತ್ತು ಮುಂದಿನ ದಿನಗಳಲ್ಲಿ ಸಾಲ ಅಥವಾ ಕ್ರೆಡಿಟ್ ಕಾರ್ಡ್ ಪಡೆಯುವುದು ಕಷ್ಟವಾಗಬಹುದು.
ಆದರೆ ಒಂದು ವಿಷಯ ಗಮನಿಸಬೇಕು. ಸಿಬಿಲ್ ಸ್ಕೋರ್ಗೆ ತಕ್ಷಣ ಹೊಡೆತ ಬೀಳದಿದ್ದರೂ, ತಡವಾದ ಪ್ರತಿಯೊಂದು ದಿನಕ್ಕೂ ಬ್ಯಾಂಕ್ಗಳು ಲೇಟ್ ಫೀ ಹಾಗೂ ಬಡ್ಡಿ ವಿಧಿಸಬಹುದು. ಇದರಿಂದ ಒಟ್ಟು ಬಿಲ್ ಮೊತ್ತ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.
ಆದ್ದರಿಂದ ಕ್ರೆಡಿಟ್ ಕಾರ್ಡ್ ಬಳಕೆದಾರರು ಡ್ಯೂ ಡೇಟ್ಗೂ ಮುನ್ನವೇ ಕನಿಷ್ಠ ಬಾಕಿ ಮೊತ್ತವಾದರೂ ಪಾವತಿಸುವ ಅಭ್ಯಾಸ ರೂಢಿಸಿಕೊಳ್ಳುವುದು ಉತ್ತಮ. ಸಮಯಕ್ಕೆ ಸರಿಯಾಗಿ ಪಾವತಿಸಿದರೆ ಉತ್ತಮ ಕ್ರೆಡಿಟ್ ಇತಿಹಾಸ ಉಳಿಯುತ್ತದೆ ಮತ್ತು ಭವಿಷ್ಯದಲ್ಲಿ ಸಾಲ ಪಡೆಯುವ ಅವಕಾಶಗಳೂ ಸುಲಭವಾಗುತ್ತವೆ.
