ವಲವಾರ ಸಿನಿಮಾದಲ್ಲಿ ಸಕಲೇಶಪುರದ ಹಳ್ಳಿಯ ಚಿತ್ರಣ: ಸ್ಟಾರ್ಗಳ ಅಬ್ಬರವಿಲ್ಲದೆ ಗೆಲ್ಲುತ್ತಿದೆ ಕನ್ನಡಿಗರ ಮನ
Valavaara Film: ಸಾಮಾನ್ಯವಾಗಿ ನಾವು ಮಲಯಾಳಂನ ‘ಹೋಮ್’ ಅಥವಾ ‘ಕುಂಬಳಂಗಿ ನೈಟ್ಸ್’ ಅಂತಹ ಸಿನಿಮಾಗಳನ್ನು ನೋಡಿದಾಗ, ಅಲ್ಲಿನ ಕಥೆ ಹೇಳುವ ರೀತಿಗೆ ಮಾರುಹೋಗುತ್ತೇವೆ. ನಮ್ಮಲ್ಲಿಯೂ ಇಂತಹ ಸರಳ ಮತ್ತು ಸುಂದರ ಕಥೆಗಳು ಬರಬಾರದೇ ಎಂಬ ಹಂಬಲ ಪ್ರೇಕ್ಷಕರಲ್ಲಿ ಸದಾ ಇರುತ್ತದೆ. ಅಬ್ಬರದ ಸಾಹಸ ದೃಶ್ಯಗಳು, ಅದ್ದೂರಿ ಸೆಟ್ಗಳ ಹಂಗಿಲ್ಲದೆ ಬರಿ ಮಣ್ಣಿನ ವಾಸನೆಯ ಕಥೆಯನ್ನೇ ನಂಬಿ ಬರುವ ಸಿನಿಮಾಗಳು ಕನ್ನಡದಲ್ಲಿ ಅಪರೂಪ ಎನ್ನುವವರಿಗೆ ಈಗ ‘ವಲವಾರ’ ಎಂಬ ಸಿನಿಮಾ ತಕ್ಕ ಉತ್ತರ ನೀಡಿದೆ. ಸಕಲೇಶಪುರದ ಮಲೆನಾಡಿನ ಹಸಿರಿನ ಮಡಿಲಲ್ಲಿ ಅರಳಿರುವ ಈ ಸಿನಿಮಾ, ಇಬ್ಬರು ಮಕ್ಕಳು, ಒಂದು ಹಸು ಮತ್ತು ನಾಲ್ಕು ಜನರ ಪುಟ್ಟ ಸಂಸಾರದ ಸುತ್ತ ಸೊಗಸಾಗಿ ಸಾಗುತ್ತದೆ. ಇಲ್ಲಿ ಹಿರೋ-ಹಿರೋಯಿನ್ಗಳ ಅಬ್ಬರವಿಲ್ಲ, ಬದಲಾಗಿ ಬದುಕಿನ ನೈಜತೆಯೇ ಈ ಚಿತ್ರದ ಅಸಲಿ ನಾಯಕ.
ನಿರ್ದೇಶಕ ಸೂತನ್ ಗೌಡ ಅವರು ಸಕಲೇಶಪುರದ ಹಳ್ಳಿಯ ಬದುಕನ್ನು ಅತೀ ಸಹಜವಾಗಿ ಚಿತ್ರಿಸಿದ್ದಾರೆ. ಎಲ್ಲೂ ನಾಟಕೀಯತೆ ಸುಳಿಯದಂತೆ, ರಿಯಾಲಿಟಿಗೆ ತೀರಾ ಹತ್ತಿರವಾಗುವಂತೆ ಚಿತ್ರಕಥೆಯನ್ನು ಹೆಣೆದಿದ್ದಾರೆ. ಸಿನಿಮಾದಲ್ಲಿ ನಟಿಸಿರುವ ಪ್ರತಿಯೊಬ್ಬ ಕಲಾವಿದರೂ ಪಾತ್ರಗಳಾಗಿ ಜೀವಿಸಿರುವುದು ಈ ಚಿತ್ರದ ದೊಡ್ಡ ಶಕ್ತಿ. ಮಲಯಾಳಂ ಅಥವಾ ತಮಿಳಿನ ಸಣ್ಣ ಬಜೆಟ್ನ ಹೃದಯಸ್ಪರ್ಶಿ ಸಿನಿಮಾಗಳನ್ನು ಮೆಚ್ಚುವವರು ‘ವಲವಾರ’ ಚಿತ್ರವನ್ನು ತಪ್ಪದೇ ನೋಡಲೇಬೇಕು. ಇದು ಕೇವಲ ಒಂದು ಸಿನಿಮಾವಲ್ಲ, ಬದಲಾಗಿ ಬಡತನದ ಬೇಗೆಯಲ್ಲೂ ಅರಳುವ ಪ್ರೀತಿ ಮತ್ತು ಹಳ್ಳಿಯ ಬದುಕಿನ ಸುಂದರ ದರ್ಶನ.
ಸಾಹಸಸಿಂಹ ಡಾ. ವಿಷ್ಣುವರ್ಧನ್ ಬ್ಯಾನರ್ಗೆ ವಿದ್ಯಾರ್ಥಿಗಳಿಂದ ಅವಮಾನ; ಕೈಮುಗಿದು ಕ್ಷಮೆ ಕೋರಿದ ಪಾಲಕರು
ಗ್ರಾಮೀಣ ಪರಿಸರದಲ್ಲಿ ಬೆಳೆದವರಿಗೆ ಮತ್ತು ಜೀವನದ ಸಣ್ಣ ಪುಟ್ಟ ಕಷ್ಟ-ಸುಖಗಳನ್ನು ಅನುಭವಿಸಿದವರಿಗೆ ಈ ಸಿನಿಮಾ ನೇರವಾಗಿ ಹೃದಯಕ್ಕೆ ಮುಟ್ಟುತ್ತದೆ. ಮನೆಯವರೆಲ್ಲರೂ ಒಟ್ಟಾಗಿ ಕುಳಿತು ಆನಂದಿಸಬಹುದಾದ ಇಂತಹ ಸಿನಿಮಾಗಳು ಕನ್ನಡ ಚಿತ್ರರಂಗಕ್ಕೆ ಇಂದು ಅತೀ ಅವಶ್ಯಕವಾಗಿವೆ. “ಕನ್ನಡದಲ್ಲಿ ಒಳ್ಳೆ ಕಥೆಗಳು ಬರೋದಿಲ್ಲ” ಎಂದು ಬೇಸರ ಪಡುವವರಿಗೆ ಈ ಸಿನಿಮಾ ಒಂದು ಹೊಸ ಭರವಸೆ ನೀಡಿದೆ. ಚಿತ್ರದ ಪ್ರತಿ ಫ್ರೇಮ್ನಲ್ಲೂ ಮಲೆನಾಡಿನ ಸೊಬಗು ಮತ್ತು ಅಲ್ಲಿನ ಜನರ ಮುಗ್ಧತೆ ಎದ್ದು ಕಾಣುತ್ತಿದ್ದು, ಪ್ರೇಕ್ಷಕರ ಮನಸ್ಸಿನಲ್ಲಿ ಈ ಸಿನಿಮಾ ದೀರ್ಘಕಾಲ ಉಳಿಯುವುದರಲ್ಲಿ ಸಂಶಯವಿಲ್ಲ.
ಬರಹ: ಸುಮಾ ಕಂಚೀಪಾಲ್
