ಹೊಸ ಮಾಲೀಕರಿಗೆ ಹಸ್ತಾಂತರ ಮತ್ತಷ್ಟು ವಿಳಂಬ: ರಾಜಸ್ಥಾನ ರಾಯಲ್ಸ್ ಪಾಲಿಗೆ ಮುಗಿಯದ ಸಂಕಷ್ಟ

ಈ ಬಾರಿ ರಾಯಲ್ಸ್​ ಚಾಲೆಂಜರ್ಸ್ ಹೊರತುಪಡಿಸಿದರೆ ಅತ್ಯಂತ ದುಬಾರಿ ಮೊತ್ತಕ್ಕೆ ಮಾರಾಟವಾದ ತಂಡ ರಾಜಸ್ಥಾನ ರಾಯಲ್ಸ್​. ಐಪಿಎಲ್​ ಇತಿಹಾಸದಲ್ಲಿಯೇ 2ನೇ ದುಬಾರಿ ತಂಡ ಎಂದು ಕರೆಯಿಸಿಕೊಳ್ಳಲು ಮುಂದಾಗಿದ್ದ, ರಾಜಸ್ಥಾನ ರಾಯಲ್ಸ್​ ತಂಡದ ಖರೀದಿ ಪ್ರಕ್ರಿಯೆಗೆ ಕಾನೂನು ತೊಡಕು ಎದುರಾಗಿದೆ. ಆರ್​ಆರ್​ ಫ್ರಾಂಚೈಸಿಯನ್ನು ಭಾನುವಾರವಷ್ಟೇ ಉದ್ಯಮಿಗಳಾದ ಲಕ್ಷ್ಮೀ ಮಿತ್ತಲ್​ ಮತ್ತು ಅದಾರ್​ ಪೂನಾವಾಲಾ ಒಳಗೊಂಡ ಒಕ್ಕೂಟಕ್ಕೆ 15,660 ಕೋಟಿ ರೂ.ಗೆ ಮಾರಾಟ ಮಾಡಲಾಗಿತ್ತು.

ಆದರೆ ಈ ಹಿಂದೆ ರಾಜಸ್ಥಾನ ರಾಯಲ್ಸ್​ ತಂಡದೊಂದಿಗೆ 15,290 ಕೋಟಿ ರೂಪಾಯಿ ಮೊತ್ತಕ್ಕೆ ಖರೀದಿ ಪ್ರಕ್ರಿಯೆಗೆ ಮುಂದಾಗಲು ಇಚ್ಛಿಸಿದ್ದ ಅಮೆರಿಕದ ಉದ್ಯಮಿ ಕಲ್​ ಸೋಮಾನಿ ಒಳಗೊಂಡ ಒಕ್ಕೂಟವು ಇದೀಗ ಕಾನೂನು ಸಮರಕ್ಕೆ ಮುಂದಾಗಿದೆ. ಸೋಮಾನಿ ಒಕ್ಕೂಟದ ಜತೆಗಿನ ಮಾರಾಟ ಒಪ್ಪಂದ ವಿವಿಧ ಕಾರಣಗಳಿಂದಾಗಿ ಮುಂದುವರಿಯುತ್ತಿಲ್ಲ ಎಂದು ಆರ್​ಆರ್ ಫ್ರಾಂಚೈಸಿ ತಿಳಿಸಿತ್ತು. ಆದರೆ ಇದನ್ನು ಒಪ್ಪದ ಸೋಮಾನಿ ಒಕ್ಕೂಟ, ಆರ್​ಆರ್ ಫ್ರಾಂಚೈಸಿಗೆ ಕಾನೂನು ನೋಟಿಸ್​ ಕಳುಹಿಸಿದೆ.

ಇದನ್ನೂ ಓದಿ : ರಾಜ್ಯದಲ್ಲಿ ಮುಂದಿನ 3 ದಿನ ವರುಣನ ಆರ್ಭಟ: ಕರಾವಳಿಯಲ್ಲಿ ಗಾಳಿ ಸಹಿತ ಮಳೆಯ ಎಚ್ಚರಿಕೆ!

ಇದರಿಂದಾಗಿ ಆರ್​ಆರ್ ಫ್ರಾಂಚೈಸಿಯನ್ನು ಹೊಸ ಮಾಲೀಕರಿಗೆ ಹಸ್ತಾಂತರಿಸುವ ಪ್ರಕ್ರಿಯೆ ವಿಳಂಬವಾಗಬಹುದು ಎಂದು ಅಂದಾಜಿಸಲಾಗಿದೆ.ಸೋಮಾನಿ ಜತೆಗಿನ ಒಪ್ಪಂದ ಹಣದ ವಿಚಾರಕ್ಕೆ ಮುರಿದು ಬಿದ್ದಿಲ್ಲ. ಬದಲಾಗಿ ಹಾಲಿ ಮಾಲೀಕ ಮನೋಜ್​ ಬದಾಲೆ ಹೊಸ ಮಾಲೀಕರ ಬಳಗದಲ್ಲೂ ಸ್ಥಾನ ಪಡೆಯಲು ಬಯಸಿದ್ದು ಕಾರಣ ಎನ್ನಲಾಗಿದೆ. ಆದರೆ ಇದನ್ನು ಸೋಮಾನಿ ಒಕ್ಕೂಟ ನಿರಾಕರಿಸಿದೆ. ಕಾನೂನು ಸಮರದ ಬಳಿಕ ರಾಜಸ್ಥಾನ ರಾಯಲ್ಸ್​ ತಂಡದ ಭವಿಷ್ಯ ಏನಾಗಲಿದೆ ಎಂದು ಕಾದು ನೋಡಬೇಕಿದೆ.