Uttara Kannada: ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಗಾಗಿ ರಕ್ತದಲ್ಲಿ ಸಿಎಂಗೆ ಪತ್ರ ಅಭಿಯಾನ

ಉತ್ತರ ಕನ್ನಡ ಜಿಲ್ಲೆಯ ಜನರಿಗೆ ತುರ್ತು ವೈದ್ಯಕೀಯ ಚಿಕಿತ್ಸೆ ಎಂದರೆ ಇಂದಿಗೂ ಒಂದು ದೊಡ್ಡ ಸವಾಲು. ಜಿಲ್ಲೆಯಲ್ಲಿ ಸೂಕ್ತವಾದ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಯ ಕೊರತೆಯಿಂದಾಗಿ, ಅಪಘಾತ ಅಥವಾ ಗಂಭೀರ ಆರೋಗ್ಯ ಸಮಸ್ಯೆ ಎದುರಾದಾಗ ಇಲ್ಲಿನ ನಾಗರಿಕರು ನೂರಾರು ಕಿಲೋಮೀಟರ್ ದೂರದ ನೆರೆಯ ಜಿಲ್ಲೆಗಳಾದ ಉಡುಪಿ, ಮಂಗಳೂರು ಅಥವಾ ಹುಬ್ಬಳ್ಳಿ ಆಸ್ಪತ್ರೆಗಳನ್ನು ಅವಲಂಬಿಸಬೇಕಾದ ದುಃಸ್ಥಿತಿ ಇದೆ. ಈ ದೀರ್ಘ ಪ್ರಯಾಣದ ನಡುವೆಯೇ ಹಲವು ಅಮೂಲ್ಯ ಜೀವಗಳು ದಾರಿ ಮಧ್ಯೆಯೇ ಕಳೆದುಹೋಗಿರುವ ಕರುಣಾಜನಕ ಉದಾಹರಣೆಗಳಿವೆ.

ಜಿಲ್ಲೆಯ ಗಾತ್ರ ದೊಡ್ಡದಾಗಿದ್ದರೂ, ಮತ್ತು ಅದು ಕಡಲ ತೀರವನ್ನು ಹೊಂದಿದ್ದರೂ, ಇಲ್ಲಿನ ಜನರಿಗೆ ಸುಸಜ್ಜಿತ ವೈದ್ಯಕೀಯ ಸೇವೆ ಮರೀಚಿಕೆಯಾಗಿದೆ. ಈ ಬಹುಕಾಲದ ಬೇಡಿಕೆ ಈಡೇರಿಸುವಂತೆ ಅನೇಕ ಹೋರಾಟಗಳು ನಡೆದಿದ್ದರೂ, ರಾಜ್ಯ ಸರ್ಕಾರ ಈವರೆಗೆ ಸ್ಪಂದಿಸಿಲ್ಲ.

ಇದರಿಂದ ಬೇಸತ್ತ ಜಿಲ್ಲೆಯ ಯುವಕರು ಈಗ ಸರ್ಕಾರದ ಗಮನ ಸೆಳೆಯಲು ವಿಭಿನ್ನ ಮತ್ತು ತೀವ್ರ ಸ್ವರೂಪದ ಆಂದೋಲನ ಆರಂಭಿಸಿದ್ದಾರೆ. ‘ನಮಗೆ ಆಸ್ಪತ್ರೆ ನೀಡಿ, ಇಲ್ಲವೇ ದಯಾಮರಣ ಕರುಣಿಸಿ’ ಎಂಬ ಒತ್ತಾಯದೊಂದಿಗೆ ಜಿಲ್ಲೆಯ ಮುಖ್ಯಮಂತ್ರಿಗಳಿಗೆ ರಕ್ತದಲ್ಲಿ ಪತ್ರ ಬರೆಯುವ ಅಭಿಯಾನವನ್ನು ಶುರುಮಾಡಿದ್ದಾರೆ.

ಇನ್ನು, ರಸ್ತೆ ಅಪಘಾತಗಳಂತಹ ತುರ್ತು ಪರಿಸ್ಥಿತಿಗಳಲ್ಲಿನ ಸಂಕಟವು ಹೇಳತೀರದಾಗಿದೆ. ಗಾಯಾಳುಗಳಿಗೆ ತಕ್ಷಣವೇ ಉನ್ನತ ಮಟ್ಟದ ಚಿಕಿತ್ಸೆ ದೊರೆಯದೇ ಇರುವುದರಿಂದ, ಅವರನ್ನು ದೂರದ ಆಸ್ಪತ್ರೆಗಳಿಗೆ ಸಾಗಿಸುವ ದಾರಿಯಲ್ಲೇ ಜೀವ ಕೈಚೆಲ್ಲುವ ಸ್ಥಿತಿ ನಿರ್ಮಾಣವಾಗಿದೆ.

ಇದನ್ನೂ ಓದಿ: ಖಜಾನೆಯ ಬಂಗಾರವನ್ನೇ ಮಾರಾಟ ಮಾಡುತ್ತಿದೆ ಈ ಬೃಹತ್‌ ದೇಶ!

ಭಟ್ಕಳ ಮೂಲದ ಮಸ್ತಾಪ್ಪ ನಾಯ್ಕ್ ಬೆಳಸೆ ನೇತೃತ್ವದಲ್ಲಿ ಈ ಚಳವಳಿಯನ್ನು ಹಮ್ಮಿಕೊಳ್ಳಲಾಗಿದ್ದು, ತುರ್ತು ಸಮಯದಲ್ಲಿ ವೈದ್ಯಕೀಯ ನೆರವು ಸಿಗದೆ ಪ್ರಾಣ ಕಳೆದುಕೊಳ್ಳುತ್ತಿರುವ ಜನರ ನೋವನ್ನು ಸರ್ಕಾರದ ಮುಂದಿಡುವುದು ಇದರ ಉದ್ದೇಶವಾಗಿದೆ. ಜಿಲ್ಲೆಯಾದ್ಯಂತ ಅನೇಕ ಮನೆಗಳ ಬೆಳಕು ಆರಿರುವುದಕ್ಕೆ ಈ ವೈದ್ಯಕೀಯ ಕೊರತೆಯೇ ಕಾರಣವಾಗಿದ್ದು, ಕೂಡಲೇ ಸರ್ಕಾರ ಇದರ ಬಗ್ಗೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಯುವಕರು ಆಗ್ರಹಿಸಿದ್ದಾರೆ.