ಆಸ್ತಿ ತೆರಿಗೆ ಪಾವತಿದಾರರಿಗೆ ಬಿಗ್ ರಿಲೀಫ್ – ಇಂದು ರಾತ್ರಿ 10ರವರೆಗೂ ಪಾಲಿಕೆ ಕಚೇರಿ ಓಪನ್ – ಜಿಬಿಎ ಕಂದಾಯ ವಿಭಾಗ ವಿಶೇಷ ಆಯುಕ್ತರಿಂದ ಮಾಹಿತಿ
ರಾಜಧಾನಿ ಬೆಂಗಳೂರಿನಲ್ಲಿ ಆಸ್ತಿ ತೆರಿಗೆ ಪಾವತಿ ಮಾಡದೇ ಬಾಕಿ ಉಳಿಸಿಕೊಂಡವರಿಂದ ಆಸ್ತಿ ತೆರಿಗೆ ಪಾವತಿ (Bengaluru Property Tax) ಮಾಡಿಸಲು ಜಿಬಿಎ ನಾನಾ ಹರಸಾಹಸ ಪಡುತ್ತಿದೆ. ಸದ್ಯ ಪಾಲಿಕೆಯು ಡಿಡಿ ಮೂಲಕ ಆಸ್ತಿ ತೆರಿಗೆ ಸ್ವೀಕಾರ ಮಾಡುತ್ತಿದೆ. ಇಂದಿಗೆ ಆಸ್ತಿ ತೆರಿಗೆ ಸ್ವೀಕಾರದ ಕೊನೆಯ ದಿನದ ಗಡುವು ಅಂತ್ಯಗೊಳ್ಳುತ್ತಿದೆ. ಈ ಹಿನ್ನೆಲೆಯಲ್ಲಿ ಇಂದು ಆಸ್ತಿ ತೆರಿಗೆ ಪಾವತಿ ಮಾಡುವವರ ಸಂಖ್ಯೆ ಹೆಚ್ಚಿರುವ ಸಾಧ್ಯತೆ ಹಿನ್ನೆಲೆಯಲ್ಲಿ ರಾತ್ರಿ 10 ಗಂಟೆಯವರೆಗೂ ಪಾಲಿಕೆ ಕಚೇರಿಗಳು ಕಾರ್ಯನಿರ್ವಹಿಸಲಿವೆ ಎನ್ನಲಾಗಿದೆ.
ಆಸ್ತಿ ತೆರಿಗೆ ಪಾವತಿದಾರರಿಗೆ ಅನುಕೂಲವಾಗುವಂತೆ ಈ ನಿರ್ಧಾರ ಕೈಗೊಂಡಿರುವುದಾಗಿ ಜಿಬಿಎ ಕಂದಾಯ ವಿಭಾಗದ ವಿಶೇಷ ಆಯುಕ್ತ ಮುನೀಷ್ ಮೌದ್ಗಿಲ್ ಮಾಹಿತಿ ನೀಡಿದ್ದಾರೆ. ಎಸ್ಎಎಸ್ ಆಸ್ತಿ ತೆರಿಗೆ ಹೊಂದಿರುವ ಐಡಿ ಹೊಂದಿರುವ ಆಸ್ತಿಗಳ ತೆರಿಗೆಯನ್ನು ಇಂದು ರಾತ್ರಿ 10 ಗಂಟೆಯವರೆಗೂ ಎಲ್ಲಾ ನಗರ ಪಾಲಿಕೆಗಳು ಡಿಮ್ಯಾಂಡ್ ಡ್ರಾಫ್ಟ್ ಮೂಲಕ ಸ್ವೀಕರಿಸಲಿವೆ.
ಇದನ್ನೂ ಓದಿ: ಶ್ರೀಗಂಧಕಾವಲ್ ವಾಯುಪಡೆ ವಶದಲ್ಲಿರುವ ಜಾಗ ಶೀಘ್ರದಲ್ಲೇ ಮರುವಶ: ಸಚಿವ ಈಶ್ವರ ಖಂಡ್ರೆ
ಆನ್ಲೈನ್ ಮೂಲಕವೂ ಆಸ್ತಿ ತೆರಿಗೆ ಪಾವತಿ ಮಾಡಲು ಸಾಧ್ಯವಿದೆ. ಆದರೆ ತಾಂತ್ರಿಕ ಕಾರಣಗಳಿಂದಾಗಿ ಪಾವತಿಯಲ್ಲಿ ದೋಷ ಕಂಡುಬಂದಲ್ಲಿ, ಆಸ್ತಿ ತೆರಿಗೆಯನ್ನು ಆನ್ಲೈನ್ಲ್ಲಿ ಪಾವತಿ ಮಾಡಲು ಸಾಧ್ಯವಾಗದೇ ಹೋದಲ್ಲಿ ಡಿಡಿ ಮೂಲಕ ಹಸ್ತಚಾಲಿತ ತೆರಿಗೆ ವಿಧಾನವನ್ನು ಗ್ರಾಹಕರು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ. ಹಸ್ತಚಾಲಿತ ಡಿಡಿ ಮೂಲಕ ಆಸ್ತಿ ತೆರಿಗೆಯನ್ನು ವಿವಿಧ ನಗರ ಪಾಲಿಕೆಗಳ ಕಚೇರಿಯಲ್ಲಿ ಇಂದು ರಾತ್ರಿ 10 ಗಂಟೆಯವರೆಗೂ ಸ್ವೀಕಾರ ಮಾಡಲಾಗುತ್ತದೆ. ಅದೇ ರೀತಿ ಆನ್ಲೈನ್ ಮೂಲಕ ತೆರಿಗೆ ಪಾವತಿಗೆ ಇಚ್ಛಿಸುವವರಿಗೆ ಇಂದು ರಾತ್ರಿ 11:59ರವರೆಗೂ ಅವಕಾಶ ನೀಡಲಾಗಿದೆ. ನಿಗದಿತ ಸಮಯದಲ್ಲಿ ಆಸ್ತಿ ತೆರಿಗೆ ಪಾವತಿ ಮಾಡಿದಲ್ಲಿ ಯಾವುದೇ ದಂಡಗಳಿಂದ ಬಚಾವಾಗಲು ಸಾಧ್ಯವಿದೆ.
