ದಿನದಿಂದ ದಿನಕ್ಕೆ ಕುಸಿಯುತ್ತಿದೆ ಕಾಫಿ ದರ… ಆತಂಕದಲ್ಲಿ ಬೆಳೆಗಾರರು

ಕಳೆದ ವರ್ಷ ದಾಖಲೆಯ ದರ ಏರಿಕೆ ಕಂಡಿದ್ದ ಕಾಫಿ ಬೆಳೆಗಾರರಿಗೆ ಈ ವರ್ಷದ ಮೊದಲ ತಿಂಗಳಲ್ಲೇ ನಿರಾಶೆ ಎದುರಾಗಿದೆ. ವರ್ಷದ ಆರಂಭದಲ್ಲಿ ಉತ್ತಮ ಬೆಲೆ ಹೊಂದಿದ್ದ ಕಾಫಿ ತಿಂಗಳಾಂತ್ಯದ ವೇಳೆಗೆ ದರ ಕುಸಿತದ ಅಪಾಯ ಎದುರಿಸುತ್ತಿದೆ. ಇದು ಕಾಫಿ ಬೆಳೆಗಾರರ ಆತಂಕಕ್ಕೆ ಕಾರಣವಾಗಿದೆ.
ಕಳೆದ ವರ್ಷ ಫೆಬ್ರವರಿ ತಿಂಗಳಲ್ಲಿ ಅರೇಬಿಕಾ ಹಾಗೂ ರೊಬಸ್ಟಾ ಪಾರ್ಚ್ಮೆಂಟ್​ ಕಾಫಿ ದರ 50 ಕೆಜಿ ಚೀಲಕ್ಕೆ ಕ್ರಮವಾಗಿ 29 ಸಾವಿರ ರೂ. ಮತ್ತು 24 ಸಾವಿರ ರೂಪಾಯಿ ಆಗಿತ್ತು. ಆದರೆ ಈ ವರ್ಷ ಈ ಕಾಫಿ ಬೆಳೆಗಳಲ್ಲಿ ಗಣನೀಯ ಇಳಿಕೆ ಕಂಡಿದೆ. ಕಳೆದ ವರ್ಷಕ್ಕಿಂತ ಈ ವರ್ಷ ಮತ್ತಷ್ಟು ಹೆಚ್ಚಿನ ದರ ದೊರಕಬಹುದು ಎಂಬ ನಿರೀಕ್ಷೆಯಲ್ಲಿ ಕಾಫಿ ಬೆಳೆ ಸಂಗ್ರಹಿಸಿ ಇಟ್ಟುಕೊಂಡಿದ್ದ ರೈತರಿಗೆ ಭಾರೀ ನಿರಾಶೆಯಾಗಿದೆ.
ಬ್ರೆಜಿಲ್‌, ವಿಯೆಟ್ನಾಂನಂತಹ ರಾಷ್ಟ್ರಗಳಲ್ಲಿ ಈ ಬಾರಿ ಗಣನೀಯ ಪ್ರಮಾಣದಲ್ಲಿ ಕಾಫಿ ಉತ್ಪಾದನೆ ಹೆಚ್ಚಿರುವುದರಿಂದ ಭಾರತದ ಕಾಫಿಗೆ ಡಿಮ್ಯಾಂಡ್ ಕಮ್ಮಿಯಾಗಿದೆ. ಯೂರೋಪ್‌ ಮತ್ತು ಅಮೆರಿಕದಂತಹ ಪ್ರಮುಖ ಕಾಫಿ ಬೇಡಿಕೆಯಿರುವ ಪ್ರದೇಶಗಳಲ್ಲಿ ಆರ್ಥಿಕ ಒತ್ತಡ, ಹಣದುಬ್ಬರ ಮತ್ತಿತರ ಕಾರಣಗಳಿಂದಾಗಿ ಕಾಫಿಗೆ ಬೇಡಿಕೆ ಕೂಡ ಕಮ್ಮಿಯಾಗಿದೆ. ಅಲ್ಲದೇ ಡಾಲರ್​ ಮತ್ತು ರೂಪಾಯಿ ದರದ ವಿನಿಮಯ ಅಸ್ಥಿರತೆ ಕೂಡ ಕಾಫಿ ದರ ಇಳಿಕೆಯಾಗಲು ಪ್ರಮುಖ ಕಾರಣ ಎನ್ನಲಾಗಿದೆ.

ಇದನ್ನೂ ಓದಿ: ಮಾವು ಬೆಳೆಗಾರರಿಗೆ ಕಂಟಕವಾಯ್ತು ಕೊರೆಯುವ ಚಳಿ : ಈ ಬಾರಿ ಇಳುವರಿ ಭಾರೀ ಕುಸಿತ

ಕಳೆದ ವರ್ಷ ಕಾಫಿಗೆ ದರ ಏರಿಕೆಯಾದ ಬಳಿಕ ಈ ವರ್ಷ ಮತ್ತಷ್ಟು ಹೆಚ್ಚಾಗಬಹುದು ಎಂಬ ನಿರೀಕ್ಷೆಯಲ್ಲಿ ಬಹುತೇಕ ಕಾಫಿ ಬೆಳೆಗಾರರು ಕಾಫಿ ಬೆಳೆಯನ್ನು ಹಾಗೆಯೇ ಸಂಗ್ರಹಿಸಿ ಇಟ್ಟಿದ್ದರು. ಇದರಿಂದಾಗಿ ಈ ವರ್ಷ ಮಾರುಕಟ್ಟೆಯಲ್ಲಿ ಬೇಡಿಕೆಗಿಂತ ಹೆಚ್ಚು ಕಾಫಿ ಪೂರೈಕೆ ಆಗುತ್ತಿದೆ. ಇದು ಕೂಡ ಕಾಫಿ ದರ ಕುಸಿತಕ್ಕೆ ಪ್ರಮುಖ ಕಾರಣವಾಗಿದೆ.