ಶೂಟಿಂಗ್‌ನಲ್ಲೇ ಲವ್;‌ ಅಮೃತಧಾರೆ ‘ಜೆಡಿ’ ಹಾಗೂ ‘ಭಾರ್ಗವಿ’ ಈಗ ರಿಯಲ್ ಲೈಫ್ ಜೋಡಿ!

Amruthadhare serial JD and Bhargavi engagement: ಕಿರುತೆರೆಯ ಜನಪ್ರಿಯ ನಟ ರಾಣವ್ ಗೌಡ ಮತ್ತು ನಟಿ ರಾಧಾ ಭಗವತಿ ವೈವಾಹಿಕ ಜೀವನಕ್ಕೆ ಅಡಿಯಿಡಲು ಸಜ್ಜಾಗಿದ್ದಾರೆ. ಸದ್ದಿಲ್ಲದೆ ನಿಶ್ಚಿತಾರ್ಥ ಮಾಡಿಕೊಂಡಿರುವ ಈ ಜೋಡಿ, ಸೋಶಿಯಲ್ ಮೀಡಿಯಾದಲ್ಲಿ ಫೋಟೋ ಹಂಚಿಕೊಳ್ಳುವ ಮೂಲಕ ಅಭಿಮಾನಿಗಳಿಗೆ ಸಿಹಿ ಸುದ್ದಿ ನೀಡಿದ್ದಾರೆ.

ಪ್ರೀತಿ ಶುರುವಾಗಿದ್ದು ಎಲ್ಲಿ?

ಇವರಿಬ್ಬರ ಪ್ರೇಮ ಪುರಾಣ ಆರಂಭವಾಗಿದ್ದು ಜೀ ಕನ್ನಡದ ಸೂಪರ್ ಹಿಟ್ ಧಾರಾವಾಹಿ ‘ಅಮೃತಧಾರೆ’ ಸೆಟ್‌ನಲ್ಲಿ. ಈ ಸೀರಿಯಲ್‌ನಲ್ಲಿ ರಾಣವ್ ಅವರು ‘ಜೆಡಿ’ ಎಂಬ ನೆಗೆಟಿವ್ ಶೇಡ್ ಇರುವ ಪಾತ್ರ ಮಾಡುತ್ತಿದ್ದರೆ, ರಾಧಾ ಭಗವತಿ ಅವರು ಜೆಡಿಯ ಪತ್ನಿ ‘ಮಲ್ಲಿ’ ಪಾತ್ರದಲ್ಲಿ ನಟಿಸಿದ್ದರು. ತೆರೆಮೇಲೆ ದಂಪತಿಗಳಾಗಿ ನಟಿಸುತ್ತಿದ್ದ ಈ ಕಲಾವಿದರು, ಶೂಟಿಂಗ್ ಹಂತದಲ್ಲೇ ಒಬ್ಬರಿಗೊಬ್ಬರು ಇಷ್ಟವಾಗಿ ಪ್ರೀತಿಯಲ್ಲಿ ಬಿದ್ದಿದ್ದರು ಎನ್ನಲಾಗಿದೆ.

ಸಪ್ರೈಸ್ ನೀಡಿದ ನಿಶ್ಚಿತಾರ್ಥ

ರಾಧಾ ಅವರು ಸದ್ಯ ಕಲರ್ಸ್ ಕನ್ನಡದ ‘ಭಾರ್ಗವಿ ಎಲ್‌ಎಲ್‌ಬಿ’ ಧಾರಾವಾಹಿಯಲ್ಲಿ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿದ್ದಾರೆ. ಇಬ್ಬರೂ ಬೇರೆ ಬೇರೆ ವಾಹಿನಿಗಳ ಸೀರಿಯಲ್‌ನಲ್ಲಿ ಬ್ಯುಸಿಯಾಗಿದ್ದರೂ, ತಮ್ಮ ಸಂಬಂಧವನ್ನು ಮುಂದಿನ ಹಂತಕ್ಕೆ ಕೊಂಡೊಯ್ದಿದ್ದಾರೆ. ರಾಣವ್ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಇಬ್ಬರೂ ಹಾರ ಬದಲಾಯಿಸಿಕೊಂಡಿರುವ ಫೋಟೋವನ್ನು “ಫೈನಲಿ” ಎಂದು ಕ್ಯಾಪ್ಷನ್ ನೀಡಿ ಹಂಚಿಕೊಂಡಿದ್ದಾರೆ. ಈ ಫೋಟೋ ನೋಡಿದ ಅಭಿಮಾನಿಗಳು ಇವರು ಮದುವೆಯಾದರೇ ಎಂದು ಗೊಂದಲಕ್ಕೀಡಾಗಿದ್ದರು, ಆದರೆ ಇದು ಕೇವಲ ನಿಶ್ಚಿತಾರ್ಥದ ಸಂಭ್ರಮ ಎಂದು ಸ್ಪಷ್ಟವಾಗಿದೆ.

ವೃತ್ತಿಜೀವನದ ಹಾದಿ:

• ರಾಣವ್ ಗೌಡ: ‘ಅಮೃತಧಾರೆ’ಯ ಜೆಡಿ ಪಾತ್ರದ ಮೂಲಕ ಫೇಮಸ್ ಆಗಿರುವ ಇವರು, ಪ್ರಸ್ತುತ ಜೀ ಪವರ್ ವಾಹಿನಿಯ ‘ಶುಭಸ್ಯ ಶೀಘ್ರಂ’ ನಲ್ಲೂ ನಟಿಸುತ್ತಿದ್ದಾರೆ.
• ರಾಧಾ ಭಗವತಿ: ‘ಮಲ್ಲಿ’ ಪಾತ್ರದ ಮೂಲಕ ಮನೆಮಾತಾಗಿದ್ದ ಇವರು ಈಗ ‘ಭಾರ್ಗವಿ’ಯಾಗಿ ಕನ್ನಡಿಗರ ಮನ ಗೆದ್ದಿದ್ದಾರೆ.

ನೆಚ್ಚಿನ ಜೋಡಿ ಹಸೆಮಣೆ ಏರಲು ಸಿದ್ಧವಾಗಿರುವುದಕ್ಕೆ ಕಿರುತೆರೆಯ ತಾರೆಯರು ಹಾಗೂ ಅಭಿಮಾನಿಗಳು ಶುಭಾಶಯಗಳ ಸುರಿಮಳೆಗರೆಯುತ್ತಿದ್ದಾರೆ.