ಪೋಸ್ಟ್ ಆಫೀಸ್ ಹಣಕಾಸು ವ್ಯವಹಾರಕ್ಕೆ ಹೊಸ ನಿಯಮ.. ಈಗ PAN ಕಾರ್ಡ್ ಕಡ್ಡಾಯ!
ಪೋಸ್ಟ್ ಆಫೀಸ್ನಲ್ಲಿ ಹಣಕಾಸು ವ್ಯವಹಾರ ನಡೆಸುವವರಿಗೆ ಕೇಂದ್ರ ಸರ್ಕಾರ ಹೊಸ ನಿಯಮ ಜಾರಿಗೆ ತಂದಿದೆ. ಸೇವಿಂಗ್ಸ್ ಖಾತೆ, ಡಿಪಾಸಿಟ್ ಹಾಗೂ ಹಣ ವರ್ಗಾವಣೆ ಸೇರಿದಂತೆ ಹಲವು ಸೇವೆಗಳಿಗೆ PAN ಕಡ್ಡಾಯವಾಗಿದೆ.
ದೇಶದಾದ್ಯಂತ ಗ್ರಾಮದಿಂದ ನಗರವರೆಗೆ ವ್ಯಾಪಕ ಸೇವೆ ನೀಡುತ್ತಿರುವ ಪೋಸ್ಟ್ ಆಫೀಸ್ಗಳಲ್ಲಿ ಈಗ ಹೊಸ ನಿಯಮ ಜಾರಿಯಾಗುತ್ತಿದೆ. ಹಣಕಾಸು ವ್ಯವಹಾರಗಳಲ್ಲಿ ಪಾರದರ್ಶಕತೆ ಹೆಚ್ಚಿಸಲು ಕೇಂದ್ರ ಸರ್ಕಾರ ಮಹತ್ವದ ಆದೇಶ ಹೊರಡಿಸಿದ್ದು, ಇನ್ನು ಮುಂದೆ ಹಲವು ಬ್ಯಾಂಕಿಂಗ್ ಸೇವೆಗಳಿಗೆ PAN ಕಾರ್ಡ್ ಸಲ್ಲಿಕೆ ಕಡ್ಡಾಯವಾಗಲಿದೆ.
ಇತ್ತೀಚಿನ ವರ್ಷಗಳಲ್ಲಿ ಪೋಸ್ಟ್ ಆಫೀಸ್ ಸೇವೆಗಳು ಕೇವಲ ಅಂಚೆ ವಿತರಣೆಗೆ ಸೀಮಿತವಾಗದೇ, ಗ್ರಾಮೀಣ ಪ್ರದೇಶಗಳಲ್ಲಿ ಬ್ಯಾಂಕಿಂಗ್ ಸೇವೆಗಳ ಪ್ರಮುಖ ಕೇಂದ್ರಗಳಾಗಿವೆ. ಸೇವಿಂಗ್ಸ್ ಖಾತೆ, ಫಿಕ್ಸ್ಡ್ ಡಿಪಾಸಿಟ್, ಸಣ್ಣ ಉಳಿತಾಯ ಯೋಜನೆಗಳು ಹಾಗೂ ಹಣ ವರ್ಗಾವಣೆ ಸೇವೆಗಳಿಗೆ ಜನರು ಹೆಚ್ಚಿನ ಪ್ರಮಾಣದಲ್ಲಿ ಪೋಸ್ಟ್ ಆಫೀಸ್ ಅವಲಂಬಿಸುತ್ತಿದ್ದಾರೆ.
ಯಾವ ಸೇವೆಗಳಿಗೆ PAN ಕಡ್ಡಾಯ?
ಹೊಸ ಆದೇಶದ ಪ್ರಕಾರ, ಸೇವಿಂಗ್ಸ್ ಖಾತೆ ತೆರೆಯುವುದು, ಡಿಪಾಸಿಟ್ ಯೋಜನೆಗಳಲ್ಲಿ ಹಣ ಹೂಡುವುದು, ನಗದು ಠೇವಣಿ, ಹಣ ವಿತ್ಡ್ರಾ, ಟೈಮ್ ಡಿಪಾಸಿಟ್ ಹಾಗೂ ಇತರ ಹಣಕಾಸು ಚಟುವಟಿಕೆಗಳಿಗೆ PAN ವಿವರ ನೀಡಬೇಕು. ಇನ್ಕಮ್ ಟ್ಯಾಕ್ಸ್ ನಿಯಮಾವಳಿಗಳ ಅನ್ವಯ ಈ ಕ್ರಮ ಜಾರಿಯಾಗುತ್ತಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಪೋಸ್ಟ್ ಆಫೀಸ್ ಆರ್ಡರ್ ನಂ. 02/2026 ಆಧಾರವಾಗಿ ಹೊಸ ಮಾರ್ಗಸೂಚಿಗಳನ್ನು ಜಾರಿಗೆ ತರಲಾಗುತ್ತಿದೆ. ಗ್ರಾಮೀಣ ಭಾಗಗಳಲ್ಲಿ ಬ್ಯಾಂಕಿಂಗ್ ಸೇವೆಗಳ ಬಳಕೆ ಹೆಚ್ಚುತ್ತಿರುವ ಹಿನ್ನೆಲೆ, ಹಣಕಾಸು ವ್ಯವಹಾರಗಳ ಮೇಲ್ವಿಚಾರಣೆಯನ್ನು ಗಟ್ಟಿಗೊಳಿಸುವ ಉದ್ದೇಶವೂ ಇದರಲ್ಲಿ ಇದೆ.
PAN ಇಲ್ಲದಿದ್ದರೆ ಏನು ಮಾಡಬೇಕು?
ಯಾವುದೇ ಗ್ರಾಹಕರ ಬಳಿ PAN ಕಾರ್ಡ್ ಇಲ್ಲದಿದ್ದರೆ ಅಥವಾ ಮರೆತಿದ್ದರೆ Form 97 ಸಲ್ಲಿಸಬೇಕು ಎಂದು ಸೂಚಿಸಲಾಗಿದೆ. ಈ ಫಾರ್ಮ್ನಲ್ಲಿ ಹೆಸರು, ವಿಳಾಸ, ವ್ಯವಹಾರದ ವಿವರಗಳು ಹಾಗೂ ಸಂಬಂಧಿತ ದಾಖಲೆಗಳನ್ನು ನೀಡಬೇಕಾಗುತ್ತದೆ.
ಈ ದಾಖಲೆಗಳನ್ನು ಸುರಕ್ಷಿತವಾಗಿ ಸಂಗ್ರಹಿಸುವ ಜವಾಬ್ದಾರಿ ಪೋಸ್ಟ್ ಆಫೀಸ್ಗಳ ಮೇಲಿದೆ. ಡಿಜಿಟಲ್ ದಾಖಲೆ ವ್ಯವಸ್ಥೆ ಸಂಪೂರ್ಣವಾಗಿ ಜಾರಿಗೆ ಬರುವವರೆಗೆ ಈ ಪ್ರಕ್ರಿಯೆ ಮುಂದುವರಿಯಲಿದೆ ಎಂದು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ.
ಬಡ್ಡಿ ಆದಾಯಕ್ಕೂ ಹೊಸ ನಿಯಮ
ಪೋಸ್ಟ್ ಆಫೀಸ್ ಯೋಜನೆಗಳಿಂದ ಬರುವ ಬಡ್ಡಿ ಆದಾಯದ ಮೇಲೆ TDS ವಿನಾಯಿತಿ ಪಡೆಯಲು ಈಗ Form 121 ಸಲ್ಲಿಸಬೇಕಾಗಿದೆ. ಹಿಂದೆ ಬಳಸುತ್ತಿದ್ದ 15G ಮತ್ತು 15H ಫಾರ್ಮ್ಗಳಿಗೆ ಬದಲಾಗಿ ಈ ಹೊಸ ನಿಯಮ ತರಲಾಗಿದೆ.
ಪೋಸ್ಟ್ ಆಫೀಸ್ ಅಧಿಕಾರಿಗಳಿಗೆ ಈ ದಾಖಲೆಗಳನ್ನು ಕನಿಷ್ಠ ಏಳು ವರ್ಷಗಳವರೆಗೆ ಸಂಗ್ರಹಿಸಿಡುವ ಸೂಚನೆ ನೀಡಲಾಗಿದೆ. ದೇಶದ ಎಲ್ಲಾ ಅಂಚೆ ಕಚೇರಿಗಳೂ ಈ ಮಾರ್ಗಸೂಚಿಯನ್ನು ಕಡ್ಡಾಯವಾಗಿ ಪಾಲಿಸಬೇಕೆಂದು ಆದೇಶಿಸಲಾಗಿದೆ.
ಗ್ರಾಮೀಣ ಜನರಿಗೆ ಮಹತ್ವದ ಸೂಚನೆ
ಹಿಂದಿನ ದಿನಗಳಲ್ಲಿ ಪೋಸ್ಟ್ ಆಫೀಸ್ಗೆ ತೆರಳುವಾಗ PAN ತೆಗೆದುಕೊಂಡು ಹೋಗುವುದು ಸಾಮಾನ್ಯವಾಗಿರಲಿಲ್ಲ. ಆದರೆ ಈಗ ಹಣಕಾಸು ವ್ಯವಹಾರಕ್ಕೆ ಹೋಗುವವರು PAN ಕಾರ್ಡ್ ಕೊಂಡೊಯ್ಯುವುದನ್ನು ಮರೆಯಬಾರದು. ಇಲ್ಲವಾದರೆ ಸೇವೆಗಳಲ್ಲಿ ವಿಳಂಬ ಅಥವಾ ತೊಂದರೆ ಎದುರಾಗುವ ಸಾಧ್ಯತೆ ಇದೆ.
ವಿಶೇಷವಾಗಿ ಗ್ರಾಮೀಣ ಪ್ರದೇಶದ ಗ್ರಾಹಕರು ಹೊಸ ನಿಯಮಗಳ ಬಗ್ಗೆ ಮುಂಚಿತವಾಗಿ ತಿಳಿದುಕೊಳ್ಳುವುದು ಅಗತ್ಯವಾಗಿದೆ. ಇಲ್ಲದಿದ್ದರೆ ಖಾತೆ ತೆರೆಯುವುದು ಅಥವಾ ಹಣಕಾಸು ಸೇವೆ ಪಡೆಯುವ ವೇಳೆ ಅನಾವಶ್ಯಕ ತೊಂದರೆ ಉಂಟಾಗಬಹುದು.
