“ಮಿಸ್ಟರ್ ಪ್ರೆಸಿಡೆಂಟ್, ಫ* ಆಫ್”: ಟ್ರಂಪ್ ವಿರುದ್ಧ ಕಿಡಿಕಾರಿದ ಡೆನ್ಮಾರ್ಕ್ ಸಂಸದ; ವಿಡಿಯೋ ವೈರಲ್!

US President Donald Trump | Denmark MP: ಬ್ರಸೆಲ್ಸ್ (ಯುರೋಪ್): ಗ್ರೀನ್‌ಲ್ಯಾಂಡ್ ದ್ವೀಪವನ್ನು ಖರೀದಿಸುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಹಠಾತ್ ಹಠದ ವಿರುದ್ಧ ಡೆನ್ಮಾರ್ಕ್ ಸಂಸದರೊಬ್ಬರು ಅತ್ಯಂತ ತೀಕ್ಷ್ಣವಾಗಿ ಮತ್ತು ಅಸಭ್ಯ ಪದ ಬಳಸುವ ಮೂಲಕ ಆಕ್ರೋಶ ಹೊರಹಾಕಿದ್ದಾರೆ. ಯುರೋಪಿಯನ್ ಯೂನಿಯನ್ ಸಂಸತ್ತಿನಲ್ಲಿ ನಡೆದ ಚರ್ಚೆಯ ವೇಳೆ ಈ ಘಟನೆ ನಡೆದಿದ್ದು, ಈಗ ಜಾಗತಿಕ ಮಟ್ಟದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.

ಘಟನೆಯ ವಿವರ:
ಅತಿ ಹೆಚ್ಚು ಖನಿಜ ಸಂಪತ್ತು ಹೊಂದಿರುವ ‘ಗ್ರೀನ್‌ಲ್ಯಾಂಡ್’ ಮೇಲೆ ಕಣ್ಣಿಟ್ಟಿರುವ ಟ್ರಂಪ್, ರಷ್ಯಾ ಮತ್ತು ಚೀನಾದ ಭದ್ರತಾ ಸವಾಲುಗಳನ್ನು ಎದುರಿಸಲು ಅಮೆರಿಕಕ್ಕೆ ಈ ಪ್ರದೇಶ ಅತಿ ಮುಖ್ಯ ಎಂದು ಪ್ರತಿಪಾದಿಸುತ್ತಿದ್ದಾರೆ. ಇದರ ಬಗ್ಗೆ ಯುರೋಪಿಯನ್ ಪಾರ್ಲಿಮೆಂಟ್‌ನಲ್ಲಿ ಚರ್ಚೆ ನಡೆಯುತ್ತಿದ್ದಾಗ, ಡೆನ್ಮಾರ್ಕ್‌ನ ಸಂಸದ ಆಂಡರ್ಸ್ ವಿಸ್ಟಿಸನ್ (38) ಅವರು ಟ್ರಂಪ್ ನಡೆಯನ್ನು ಕಟುವಾಗಿ ಟೀಕಿಸಿದರು.

ಸಂಸದ ಹೇಳಿದ್ದೇನು?
“ಗೌರವಾನ್ವಿತ ಅಧ್ಯಕ್ಷ ಟ್ರಂಪ್ ಅವರೇ, ಗಮನವಿಟ್ಟು ಕೇಳಿ. ಗ್ರೀನ್‌ಲ್ಯಾಂಡ್ ಕಳೆದ 800 ವರ್ಷಗಳಿಂದ ಡೆನ್ಮಾರ್ಕ್ ಸಾಮ್ರಾಜ್ಯದ ಅವಿಭಾಜ್ಯ ಅಂಗವಾಗಿದೆ. ಇದು ಮಾರಾಟಕ್ಕಿಲ್ಲ,” ಎಂದು ವಿಸ್ಟಿಸನ್ ಮೊದಲು ಇಂಗ್ಲಿಷ್‌ನಲ್ಲಿ ಹೇಳಿದರು.

ಮಾತು ಮುಂದುವರಿಸಿದ ಅವರು, “ನಾನು ನಿಮಗೆ ಅರ್ಥವಾಗುವ ಭಾಷೆಯಲ್ಲೇ ಹೇಳುತ್ತೇನೆ ನೋಡಿ: ಮಿಸ್ಟರ್ ಪ್ರೆಸಿಡೆಂಟ್, ಫ ಆಫ್ (Mr. President, f** off)**” ಎಂದು ನೇರವಾಗಿ ನಿಂದಿಸಿದರು. ಅಮೆರಿಕದ ಅತಿರೇಕದ ರಾಜತಾಂತ್ರಿಕ ನಡೆಯನ್ನು ಸಹಿಸಲು ಸಾಧ್ಯವಿಲ್ಲ ಎಂಬ ಅರ್ಥದಲ್ಲಿ ಅವರು ಈ ಆಕ್ರೋಶ ವ್ಯಕ್ತಪಡಿಸಿದರು.

ಸಂಸತ್ತಿನಲ್ಲಿ ಗದ್ದಲ:
ವಿಸ್ಟಿಸನ್ ಅವರು ಅವಾಚ್ಯ ಶಬ್ದ ಬಳಸುತ್ತಿದ್ದಂತೆ ಎಚ್ಚೆತ್ತ ಸಂಸತ್ತಿನ ಉಪಾಧ್ಯಕ್ಷ ನಿಕೋಲೇ ಸ್ಟೆಫನುಟಾ ಅವರು ಮಧ್ಯಪ್ರವೇಶಿಸಿ ಸಂಸದರನ್ನು ತರಾಟೆಗೆ ತೆಗೆದುಕೊಂಡರು. “ಸಹೋದ್ಯೋಗಿಗಳೇ ಕ್ಷಮಿಸಿ, ಇದು ನಮ್ಮ ನಿಯಮಗಳಿಗೆ ವಿರುದ್ಧವಾಗಿದೆ. ರಾಜಕೀಯವಾಗಿ ಎಷ್ಟೇ ಭಿನ್ನಾಭಿಪ್ರಾಯವಿದ್ದರೂ ಇಂತಹ ಅಸಭ್ಯ ಪದಗಳನ್ನು ಬಳಸುವಂತಿಲ್ಲ. ಇದು ಸ್ವೀಕಾರಾರ್ಹವಲ್ಲ,” ಎಂದು ಎಚ್ಚರಿಕೆ ನೀಡಿದರು. ನಂತರ ವಿಸ್ಟಿಸನ್ ಅವರು ತಮ್ಮ ಭಾಷಣವನ್ನು ಡ್ಯಾನಿಶ್ ಭಾಷೆಯಲ್ಲಿ ಮುಂದುವರಿಸಿದರು.

‘ಭಾಗ್ಯಲಕ್ಷ್ಮಿ’ ಸುಷ್ಮಾ ರಾವ್ ರಹಸ್ಯ ಬಯಲು! ಪತಿ ಮತ್ತು ಮಗನನ್ನು ನೋಡಿ ಅಭಿಮಾನಿಗಳು ಅಚ್ಚರಿ

ಗ್ರೀನ್‌ಲ್ಯಾಂಡ್ ಅನ್ನು ಅಮೆರಿಕಕ್ಕೆ ನೀಡದಿದ್ದರೆ ನ್ಯಾಟೋ (NATO) ಮೈತ್ರಿಯಿಂದ ಸುಮಾರು 200 ಹುದ್ದೆಗಳನ್ನು ಕಡಿತಗೊಳಿಸುವುದಾಗಿ ಟ್ರಂಪ್ ಬೆದರಿಕೆ ಹಾಕಿದ್ದಾರೆ ಎಂಬ ವರದಿಗಳ ಬೆನ್ನಲ್ಲೇ ಈ ಘಟನೆ ನಡೆದಿದೆ. ಯುರೋಪ್ ರಾಷ್ಟ್ರಗಳು ಈಗ ಟ್ರಂಪ್ ಅವರ ‘ಡಿಪ್ಲೊಮಸಿ’ ಅಥವಾ ರಾಜತಾಂತ್ರಿಕತೆಯನ್ನು ಗಂಭೀರವಾಗಿ ವಿರೋಧಿಸಲು ಆರಂಭಿಸಿವೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿಯಾಗಿದೆ.