Kamanna: ಗ್ರಹಣ ಕಾಲದಲ್ಲಿ ಕಾಮಣ್ಣನ ದರ್ಶನ ಇರುತ್ತಾ? ನವಲಗುಂದಕ್ಕೆ ಬರೋ ಭಕ್ತಾದಿಗಳಿಗೆ ವಿಶೇಷ ಸೂಚನೆ!

Navalagunda Kamanna : ಧಾರವಾಡ ಜಿಲ್ಲೆಯ ಐತಿಹಾಸಿಕ ಪಟ್ಟಣವಾದ ನವಲಗುಂದದಲ್ಲಿ ವಿಶ್ವ ಪ್ರಸಿದ್ಧ ‘ಶ್ರೀ ರಾಮಲಿಂಗೇಶ್ವರ ಕಾಮಣ್ಣನ’ ದರ್ಶನೋತ್ಸವವು ಇನ್ನೇನು ಪ್ರಾರಂಭವಾಗಲಿದೆ. ಪ್ರತೀ ವರ್ಷದಂತೆ ಈ ವರ್ಷವೂ ಹೋಳಿ ಹಬ್ಬದ ಪ್ರಯುಕ್ತ 28 ನೇ ತಾರೀಕು ಶನಿವಾರದ ದ್ವಾದಶಿಯಂದು ಬೆಳಿಗ್ಗೆ  ರಾಮಲಿಂಗ ಓಣಿಯಲ್ಲಿ ಕಾಮದೇವನ ಭವ್ಯ ವಿಗ್ರಹವನ್ನು ಪ್ರತಿಷ್ಠಾಪನೆ ಮಾಡಲಾಗುತ್ತದೆ, ಆ ದಿನ ರಾತ್ರಿಯಿಂದಲೇ ದೇವರ ದರ್ಶನ ಪ್ರಾರಂಭವಾಗಲಿದೆ.

ಗ್ರಹಣ ಕಾಲದಲ್ಲಿಯೂ ದರ್ಶನ ಮಾಡಬಹುದು !

ಎಲ್ಲರಿಗೂ ಎದುರಾಗಿರುವ ಪ್ರಶ್ನೆ ಗ್ರಹಣದ ದಿನ ದರ್ಶನ ಪಡೆಯಬಹುದಾ? ಎಂದು, ಆದರೆ ಇಲ್ಲಿ ಗ್ರಹಣದ ಆಚರಣೆಯ ಸಮಯದಲ್ಲಿ ಯಾವುದೇ ಬದಲಾವಣೆ ಮಾಡಲು ಬರೋದಿಲ್ಲ, ನಾವೂ ಮಾಡಿಯೂ ಇಲ್ಲ, ನಮ್ಮಲ್ಲಿ ಆ ಆಚರಣೆ ಇಲ್ಲ ಧಾರಾಳವಾಗಿ ಆ ದಿನವೂ ಭಕ್ತಾದಿಗಳು ಬಂದು ದರ್ಶನ ಪಡೆಯಬಹುದು ಎಂದು ಸ್ಥಳೀಯರು ಮಾಹಿತಿ ನೀಡಿದ್ದಾರೆ.

Also Read : ಚಿಕ್ಕಮಗಳೂರು: ದೇವಸ್ಥಾನದ ಭಜನೆ, ಜಾಗಟೆ ಶಬ್ದದಿಂದ ಕಿರಿಕಿರಿ : ಪೊಲೀಸ್​ ಠಾಣೆ ಮೆಟ್ಟಿಲೇರಿದ ಅನ್ಯಕೋಮಿನ ವ್ಯಕ್ತಿ:

ಇದು ದಕ್ಷಿಣ ಭಾರತದಲ್ಲೇ ಅತ್ಯಂತ ಸುಂದರ ಕಾಮಣ್ಣ

ದಕ್ಷಿಣ ಭಾರತದಲ್ಲೇ ಅತ್ಯಂತ ಸುಂದರ ಕಾಮಣ್ಣ ಎಂದು ಹೆಸರುವಾಸಿಯಾದ ಇಲ್ಲಿನ ಕಾಮದೇವನ ದರ್ಶನವು ಇದೇ ತಿಂಗಳ 28 ರಿಂದ 3 ರವರೆಗೆ ಲಭ್ಯವಿರಲಿದೆ. ಈ 5 ದಿನಗಳ ಕಾಲ ಭಕ್ತಾದಿಗಳು ಹರಕೆ ಸಲ್ಲಿಸಲು ಮತ್ತು ವಿಶೇಷ ಪೂಜೆ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ. ನವಲಗುಂದದ ಈ ಕಾಮಣ್ಣನು ಇಷ್ಟಾರ್ಥ ಸಿದ್ಧಿಸುವ ದೇವರು ಎಂಬ ಅಚಲ ನಂಬಿಕೆ ಇರುವುದರಿಂದ, ನೆರೆರಾಜ್ಯಗಳಾದ ಮಹಾರಾಷ್ಟ್ರ, ಗೋವಾ ಹಾಗೂ ಆಂಧ್ರಪ್ರದೇಶಗಳಿಂದಲೂ ಸಾವಿರಾರು ಭಕ್ತರು ಆಗಮಿಸುತ್ತಿದ್ದಾರೆ.

ನವಲಗುಂದ ಕಾಮಣ್ಣನ ರಹಸ್ಯಗಳಿವು

ನವಲಗುಂದದ ಶ್ರೀ ರಾಮಲಿಂಗೇಶ್ವರ ಕಾಮಣ್ಣನ ಇತಿಹಾಸವು ಶತಮಾನಗಳಷ್ಟು ಹಳೆಯದಾಗಿದ್ದು, ಈ ವಿಗ್ರಹವನ್ನು ಸಾಕ್ಷಾತ್ ಮನ್ಮಥನ ಅವತಾರವೆಂದೇ ಪೂಜಿಸಲಾಗುತ್ತದೆ. ಈ ಕಾಮಣ್ಣನ ವಿಗ್ರಹದ ಕಣ್ಣುಗಳು ಅತ್ಯಂತ ಆಕರ್ಷಕವಾಗಿದ್ದು, ನಾವು ಎತ್ತ ಹೋದರೂ ನಮ್ಮನ್ನೇ ನೋಡುತ್ತಿರುವಂತೆ ಭಾಸವಾಗುವುದು ಇಲ್ಲಿನ ವೈಶಿಷ್ಟ್ಯ. ಮದುವೆ ವಿಳಂಬ, ಸಂತಾನ ಭಾಗ್ಯ ಹಾಗೂ ಕೌಟುಂಬಿಕ ಸಮಸ್ಯೆಗಳಿಂದ ಬಳಲುವ ಭಕ್ತರು ಇಲ್ಲಿ ಹರಕೆ ಹೊತ್ತರೆ ಅವರ ಇಷ್ಟಾರ್ಥಗಳು ಸಿದ್ಧಿಸುತ್ತವೆ ಎಂಬ ಅಚಲ ನಂಬಿಕೆ ಇದೆ.

ಬೆಳ್ಳಿ ಆಭರಣಗಳ ಹರಕೆ ಇಲ್ಲಿ ಪ್ರಸಿದ್ಧ

ಕಾರ್ಯ ಸಿದ್ಧಿಯಾದ ಭಕ್ತರು ಬೆಳ್ಳಿ ಆಭರಣಗಳನ್ನು ಅರ್ಪಿಸುವುದು ಇಲ್ಲಿನ ಪರಂಪರೆ. ಪ್ರತಿವರ್ಷ ಕಾಮದಹನದ ನಂತರ ಅದರ ಬೂದಿಯನ್ನು ಭಕ್ತರು ಪವಿತ್ರ ಪ್ರಸಾದವಾಗಿ ಮನೆಗೆ ಕೊಂಡೊಯ್ಯುತ್ತಾರೆ. ಇಲ್ಲಿ ಕಾಮದಹನವಾಗುವ ಮುನ್ನ ಭಕ್ತರು ತಮ್ಮ ಕಷ್ಟಗಳನ್ನು ಕಾಮಣ್ಣನ ಕಿವಿಯಲ್ಲಿ ಹೇಳಿಕೊಳ್ಳುವ ಸಂಪ್ರದಾಯವಿದೆ. ದಹನದ ನಂತರ ಬೂದಿಯನ್ನು ಪ್ರಸಾದವಾಗಿ ಮನೆಗೆ ಕೊಂಡೊಯ್ಯುತ್ತಾರೆ, ಇದು ಮನೆಯಲ್ಲಿ ಸುಖ-ಶಾಂತಿ ತರುತ್ತದೆ ಎಂಬ ಭಾವನೆಯಿದೆ.

ಬಣ್ಣದ ಓಕುಳಿ ಯಾವಾಗ?

ಈ ವರ್ಷ ಭಕ್ತರ ಅನುಕೂಲಕ್ಕಾಗಿ ವಿಶೇಷ ಕ್ಯೂ ಲೈನ್ ವ್ಯವಸ್ಥೆ ಮತ್ತು ಕುಡಿಯುವ ನೀರಿನ ಸೌಲಭ್ಯ ಮಾಡಲಾಗಿದೆ. ಮಾರ್ಚ್‌ 4ರಂದು ಕಾಮದಹನ, ಅದ್ಧೂರಿ ಬಣ್ಣದ ಓಕಳಿ ನಡೆಯಲಿದೆ ಎಂದು ಶ್ರೀ ರಾಮಲಿಂಗೇಶ್ವರ ದೇವಸ್ಥಾನ ಸಮಿತಿಯ ಪದಾಧಿಕಾರಿಗಳು ತಿಳಿಸಿದ್ದಾರೆ.

ನವಲಗುಂದ ಕಾಮಣ್ಣನ ಇತಿಹಾಸ

ನವಲಗುಂದದ ಶ್ರೀ ರಾಮಲಿಂಗೇಶ್ವರ ಕಾಮಣ್ಣನ ಇತಿಹಾಸವು ಶತಮಾನಗಳಷ್ಟು ಹಳೆಯದಾಗಿದ್ದು, ಇದು ಮೊದಲು ನವಲಗುಂದದ ದೇಶಗತಿ (Desai) ಆಡಳಿತದ ಕಾಲದಿಂದಲೂ ರಾಜಮರ್ಯಾದೆಯೊಂದಿಗೆ ನಡೆದುಕೊಂಡು ಬಂದಿದೆ. ಹಿಂದೆ ವಿಗ್ರಹಕ್ಕೆ ಕೇವಲ ನೈಸರ್ಗಿಕ ಗಿಡಮೂಲಿಕೆ ಮತ್ತು ಮಣ್ಣಿನ ಬಣ್ಣಗಳನ್ನು ಬಳಸಲಾಗುತ್ತಿತ್ತು.  ಉತ್ತರ ಕರ್ನಾಟಕದಾದ್ಯಂತ ಸಾವಿರಾರು ಕಾಮಣ್ಣನ ವಿಗ್ರಹಗಳನ್ನು ಕೂರಿಸಲಾಗುತ್ತದೆಯಾದರೂ, ಈ ಕಾಮಣ್ಣನಿಗೆ ‘ಜಗದ್ಗುರು ಕಾಮಣ್ಣ’ ಅಥವಾ ‘ದೊಡ್ಡ ಕಾಮಣ್ಣ’ ಎಂಬ ಗೌರವದ ಬಿರುದಿದೆ. ಈ ವಿಗ್ರಹಕ್ಕೆ ಬಳಸುವ ಪುರಾತನ ಆಭರಣಗಳು ಮತ್ತು ಪರಂಪರಾಗತವಾಗಿ ಬಂದ ವಿಗ್ರಹ ಕಲೆಯು ಇಂದಿಗೂ ಇಲ್ಲಿನ ಇತಿಹಾಸದ ಜೀವಂತಿಕೆಯನ್ನು ಎತ್ತಿ ಹಿಡಿಯುತ್ತವೆ.”