ಭಾರತೀಯ ರೈಲ್ವೆ ಇಲಾಖೆಯಲ್ಲಿ ಹೊಸ ಕ್ರಾಂತಿ : ಲೋಕಾರ್ಪಣೆಗೆ ಸಿದ್ಧಗೊಂಡ ವಂದೇ ಭಾರತ್ ಸ್ಲೀಪರ್ ರೈಲು
ಭಾರತೀಯ ರೈಲ್ವೆ ಇಲಾಖೆಯು ದಿನಕ್ಕೊಂದು ಹೊಸತನವನ್ನು ಅಳವಡಿಸಿಕೊಳ್ಳುತ್ತಲೇ ಇದೆ. ಇದೀಗ ರೈಲ್ವೆ ಇಲಾಖೆಯಲ್ಲಿ ಹೊಸ ಕ್ರಾಂತಿ ಎಂಬಂತೆ ಭಾರತದ ಪ್ರಪ್ರಥಮ ವಂದೇ ಭಾರತ್ ಸ್ಲೀಪರ್ ರೈಲು ಉದ್ಘಾಟನೆಗೆ ಸಿದ್ಧಗೊಂಡಿದೆ. ಜನವರಿ ಮೂರನೇ ವಾರದಲ್ಲಿ ಪ್ರಧಾನಿ ಮೋದಿ ವಂದೇ ಭಾರತ್ ಸ್ಲೀಪರ್ ರೈಲಿಗೆ ಚಾಲನೆ ನೀಡಲಿದ್ದಾರೆ. ಭಾರತದ ಮೊದಲ ವಂದೇ ಭಾರತ್ ಸ್ಲೀಪರ್ ರೈಲು ಗುವಾಹಟಿ ಹಾಗೂ ಕೋಲ್ಕತ್ತಾ ನಡುವೆ ಸಂಚರಿಸಲಿದೆ.
ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಮಹತ್ವದ ಮಾಹಿತಿ ನೀಡಿದ್ದು. ಈಗಾಗಲೇ ಪರೀಕ್ಷಾರ್ಥಗಳಲ್ಲಿ ವಂದೇ ಭಾರತ್ ಸ್ಲೀಪರ್ ಟ್ರೇನ್ ಯಶಸ್ವಿಯಾಗಿದೆ. ಜನವರಿ 18ರಂದು ರೈಲನ್ನು ಉದ್ಘಾಟಿಸುವ ಬಗ್ಗೆ ಯೋಚನೆ ನಡೆಸಿದೆ. ಮೊದಲ ಹಂತದಲ್ಲಿ 2 ರೈಲುಗಳು ಹಳಿಗೆ ಇಳಿಯಲಿವೆ ಎಂದು ಹೇಳಿದರು.
ಎಸಿ ಸ್ಲೀಪರ್ ಪ್ರಯಾಣದ ಅನುಭವ ಸಾಮಾನ್ಯರಿಗೂ ಲಭ್ಯವಾಗಬೇಕು ಎಂಬ ಉದ್ದೇಶದಿಂದ ಕಡಿಮೆ ಟಿಕೆಟ್ ದರ ನಿಗದಿಪಡಿಸಲಾಗಿದೆ. 3600ರೂಪಾಯಿ ಗರಿಷ್ಠ ದರದಿಂದ 2300 ರೂಪಾಯಿ ಕನಿಷ್ಠ ಟಿಕೆಟ್ ದರ ನಿಗದಿ ಪಡಿಸಲಾಗಿದೆ. ಆಹಾರ ಸೌಲಭ್ಯವನ್ನೂ ಈ ಟಿಕೆಟ್ ದರ ಒಳಗೊಂಡಿದೆ. 3ನೇ ಎಸಿಯಲ್ಲಿ ಆಹಾರ ಸೌಲಭ್ಯವನ್ನೂ ಒಳಗೊಂಡು 2300 ರೂಪಾಯಿ ಟಿಕೆಟ್ ದರ ನಿಗದಿಯಾಗಿದ್ದರೆ, 2ನೇ ಎಸಿಯಲ್ಲಿ 3 ಸಾವಿರ ರೂಪಾಯಿ ಹಾಗೂ 1ನೇ ಎಸಿಯಲ್ಲಿ 3600 ರೂಪಾಯಿ ನಿಗದಿಯಾಗಿದೆ.
ಇದೇ ಸೌಲಭ್ಯಗಳೊಂದಿಗೆ ಗುವಾಹಟಿಯಿಂದ ಕೋಲ್ಕತ್ತಾಗೆ ವಿಮಾನದಲ್ಲಿ ಪ್ರಯಾಣಿಸಲು ಪ್ರಯಾಣಿಕರು 8000 ರೂಪಾಯಿ ವ್ಯಯಿಸಬೇಕಿತ್ತು. ಆದರೆ ಇದೀಗ ಅತೀ ಕಡಿಮೆ ದರದಲ್ಲಿ ಪ್ರಯಾಣಿಕರು ಐಷಾರಾಮಿ ಸಂಚಾರದ ಅನುಭವ ಪಡೆಯಬಹುದಾಗಿದೆ.
ಇದನ್ನೂ ಓದಿ: ಕರಾವಳಿ ಭಾಗದ ಜನತೆಗೆ ಗುಡ್ನ್ಯೂಸ್.. ಶೀಘ್ರದಲ್ಲೇ ವಂದೇ ಭಾರತ್ ಎಕ್ಸ್ಪ್ರೆಸ್
ಈ ರೈಲು ರಾತ್ರಿ ವೇಳೆಯಲ್ಲಿಯೇ ಹೆಚ್ಚಾಗಿ ಸಂಚರಿಸಲಿದ್ದು ರಾತ್ರಿ ಭೋಜನ ಹಾಗೂ ಬೆಳಗ್ಗೆ ಚಹಾದ ವ್ಯವಸ್ಥೆ ಇರಲಿದೆ. ಈ ರೈಲು ಅತ್ಯಂತ ವೇಗವಾಗಿ ಸಂಚರಿಸುವ ಹಿನ್ನೆಲೆಯಲ್ಲಿ ಒಳಗೆ ಮಲಗಿರುವ ಪ್ರಯಾಣಿಕರಿಗೆ ಯಾವುದೇ ರೀತಿಯ ಅಡಚಣೆ ಉಂಟಾಗದಂತೆ ಅತ್ಯಾಧುನಿಕ ಸಸ್ಪೆನ್ಶನ್ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ.
