ಮೀನಿನ ಸುಂಕ ವಿನಾಯಿತಿ; ವಿಮೆ ಪರಿಹಾರಕ್ಕಿಲ್ಲ ತೆರಿಗೆ
ನವದೆಹಲಿ: ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಇಂದು ಮಂಡಿಸಿದ ಬಜೆಟ್ನಲ್ಲಿ ವಾಹನ ಸವಾರರು ಮತ್ತು ವಿದೇಶಿ ಪ್ರವಾಸಿಗರಿಗೆ ಕೆಲವು ಮಹತ್ವದ ರಿಯಾಯಿತಿಗಳನ್ನು ಘೋಷಿಸಿದ್ದಾರೆ. ಪ್ರಮುಖವಾಗಿ ವಿಮೆ ಮತ್ತು ತೆರಿಗೆ ಸಲ್ಲಿಕೆಯ ನಿಯಮಗಳಲ್ಲಿ ಬದಲಾವಣೆ ತರುವ ಮೂಲಕ ಜನಸಾಮಾನ್ಯರ ಆರ್ಥಿಕ ಹೊರೆ ತಗ್ಗಿಸಲು ಪ್ರಯತ್ನಿಸಲಾಗಿದೆ.
ವಾಹನ ಅಪಘಾತ ವಿಮೆ ಹಣಕ್ಕಿಲ್ಲ ತೆರಿಗೆ
ವಾಹನ ಅಪಘಾತಕ್ಕೀಡಾದ ಸಂತ್ರಸ್ತರಿಗೆ ಸರ್ಕಾರ ದೊಡ್ಡ ಮಟ್ಟದ ನೆಮ್ಮದಿ ನೀಡಿದೆ. ಇನ್ನು ಮುಂದೆ ದ್ವಿಚಕ್ರ ಅಥವಾ ಯಾವುದೇ ವಾಹನ ಅಪಘಾತದ ನಂತರ ವಿಮಾ ಕಂಪನಿಗಳಿಂದ ಬರುವ ಪರಿಹಾರದ ಮೊತ್ತಕ್ಕೆ (Insurance Claims) ಯಾವುದೇ ತೆರಿಗೆ ಇರುವುದಿಲ್ಲ. ಇದು ಅಪಘಾತ ಸಂತ್ರಸ್ತ ಕುಟುಂಬಗಳಿಗೆ ಆರ್ಥಿಕವಾಗಿ ಬಲ ತುಂಬಲಿದೆ.
ಐಟಿ ರಿಟರ್ನ್ಸ್ ಮತ್ತು ವಿದೇಶಿ ಪ್ರಯಾಣದ ದರ ಕಡಿತ
- ಐಟಿಆರ್ ಅವಧಿ ವಿಸ್ತರಣೆ: ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸಲು ಈಗ ಜುಲೈ 31ರವರೆಗೆ ಕಾಲಾವಕಾಶ ನೀಡಲಾಗಿದೆ.
- ವಿದೇಶ ಪ್ರವಾಸ: ವಿದೇಶಿ ಪ್ರಯಾಣದ ಮೇಲಿನ ಟಿಸಿಎಸ್ (TCS) ದರವನ್ನು ಪ್ರಸ್ತುತ ಇರುವ ದರದಿಂದ ಶೇ. 5ಕ್ಕೆ ಇಳಿಕೆ ಮಾಡಲಾಗಿದೆ. ವಿದೇಶಿ ಶಿಕ್ಷಣ ಮತ್ತು ಆರೋಗ್ಯ ಸೇವೆಗಳ ಮೇಲಿನ ಟಿಸಿಎಸ್ ದರದಲ್ಲೂ ಶೇ. 2ರಷ್ಟು ಕಡಿತ ಘೋಷಿಸಲಾಗಿದೆ.
ನೂತನ ಐಟಿ ಕಾಯ್ದೆ ಮತ್ತು ದಂಡದ ನಿಯಮಗಳು
ಏಪ್ರಿಲ್ 1ರಿಂದ ಹೊಸ ಆದಾಯ ತೆರಿಗೆ ಕಾಯ್ದೆ ಜಾರಿಗೆ ಬರಲಿದೆ. ತೆರಿಗೆ ಪಾವತಿಯಲ್ಲಿ ಸಣ್ಣಪುಟ್ಟ ತಪ್ಪುಗಳಾದರೆ ಇನ್ನು ಮುಂದೆ ಕಠಿಣ ಶಿಕ್ಷೆ ಇರುವುದಿಲ್ಲ.
- ದಂಡ ಮಾತ್ರ: ಸಣ್ಣ ತೆರಿಗೆ ಅಪರಾಧಗಳಿಗೆ ಕೇವಲ ದಂಡ ವಿಧಿಸಲಾಗುವುದು. ಆದರೆ ದೊಡ್ಡ ಮಟ್ಟದ ತೆರಿಗೆ ವಂಚನೆ ಅಥವಾ ಅಪರಾಧಗಳ ಬಗ್ಗೆ ನ್ಯಾಯಾಲಯಗಳು ತೀರ್ಮಾನಿಸಲಿವೆ.
- ಅಘೋಷಿತ ಆದಾಯ: ಅಘೋಷಿತ ಆದಾಯವನ್ನು ಒಂದು ಕೋಟಿ ರೂಪಾಯಿಗಳಿಗೆ ಮಿತಿಗೊಳಿಸಲು ಪ್ರಸ್ತಾಪಿಸಲಾಗಿದೆ.
ಕಾರ್ಪೊರೇಟ್ ಮತ್ತು ತಂತ್ರಜ್ಞಾನ ವಲಯಕ್ಕೆ ಬೆಂಬಲ
- ಡೇಟಾ ಸೆಂಟರ್ ಮತ್ತು ಕ್ಲೌಡ್ ಸೇವೆ: ಭಾರತದ ಡೇಟಾ ಸೆಂಟರ್ ಮೂಲಕ ಜಾಗತಿಕ ಸೇವೆ ನೀಡುವ ಕಂಪನಿಗಳಿಗೆ 2047ರವರೆಗೆ ತೆರಿಗೆ ರಜೆ (Tax Holiday) ಘೋಷಿಸಲಾಗಿದೆ.
- ಸೇಫ್ ಹಾರ್ಬರ್ ಮಿತಿ: ಐಟಿ ಸೇವೆಗಳಿಗಾಗಿ ಇದ್ದ ‘ಸೇಫ್ ಹಾರ್ಬರ್’ ಮಿತಿಯನ್ನು 300 ಕೋಟಿ ರೂ.ಗಳಿಂದ 2,000 ಕೋಟಿ ರೂ.ಗಳಿಗೆ ಭಾರಿ ಏರಿಕೆ ಮಾಡಲಾಗಿದೆ.
- ಮುನ್ಸಿಪಲ್ ಬಾಂಡ್ಗಳು: ಸ್ಥಳೀಯ ಸಂಸ್ಥೆಗಳು ಬಾಂಡ್ಗಳ ಮೂಲಕ ಹಣ ಸಂಗ್ರಹಿಸಲು ಉತ್ತೇಜಿಸಲು 100 ಕೋಟಿ ರೂ. ಪ್ರೋತ್ಸಾಹಧನ ನೀಡಲಾಗುವುದು.
ಮೀನುಗಾರಿಕೆ ಮತ್ತು ಷೇರು ಮಾರುಕಟ್ಟೆ
- ಎಕ್ಸ್ಕ್ಲೂಸಿವ್ ಎಕನಾಮಿಕ್ ಝೋನ್ನಲ್ಲಿ ಹಿಡಿಯುವ ಮೀನಿನ ಮೇಲೆ ಸುಂಕ ವಿನಾಯಿತಿ ನೀಡಲಾಗಿದೆ.
- ಷೇರು ಮಾರುಕಟ್ಟೆಯ ಫ್ಯೂಚರ್ಸ್ ವಹಿವಾಟಿನ ಮೇಲಿನ ಎಸ್ಟಿಟಿ (STT) ದರವನ್ನು ಶೇ. 0.02 ರಿಂದ ಶೇ. 0.05ಕ್ಕೆ ಹೆಚ್ಚಿಸಲಾಗಿದೆ.
