SSLC ರಿಸಲ್ಟ್ 2026: ಫಲಿತಾಂಶದ ಮೇಲೆ ಹೈಕೋರ್ಟ್ ತೂಗುಗತ್ತಿ? ಇಂದೇ ಮಹತ್ವದ ವಿಚಾರಣೆ; ವಿದ್ಯಾರ್ಥಿಗಳಲ್ಲಿ ಹೆಚ್ಚಿದ ಆತಂಕ
ತೃತೀಯ ಭಾಷೆ ಹಿಂದಿ ಪರೀಕ್ಷೆಯ ಮೌಲ್ಯಮಾಪನ ನಿಯಮ ಬದಲಾವಣೆಗೆ ಸಂಬಂಧಿಸಿದಂತೆ ರಾಜ್ಯ ಸರ್ಕಾರ ಸಲ್ಲಿಸಿರುವ ಪುನರ್ ಪರಿಶೀಲನಾ ಅರ್ಜಿ (Review Petition) ಇಂದು, ಅಂದರೆ ಏಪ್ರಿಲ್ 21, 2026 ರಂದು ಹೈಕೋರ್ಟ್ನಲ್ಲಿ ವಿಚಾರಣೆಗೆ ಬರಲಿದೆ.
ಬೆಂಗಳೂರು: ಕರ್ನಾಟಕದ ಸುಮಾರು 8.65 ಲಕ್ಷಕ್ಕೂ ಹೆಚ್ಚು ಎಸ್ಎಸ್ಎಲ್ಸಿ ವಿದ್ಯಾರ್ಥಿಗಳು ಫಲಿತಾಂಶಕ್ಕಾಗಿ ಕಾತರದಿಂದ ಕಾಯುತ್ತಿದ್ದಾರೆ. ಆದರೆ, ಈ ಬಾರಿ ಫಲಿತಾಂಶವು ಕೇವಲ ಮೌಲ್ಯಮಾಪನದ ಮೇಲೆ ಮಾತ್ರವಲ್ಲದೆ, ಹೈಕೋರ್ಟ್ನ ತೀರ್ಪಿನ ಮೇಲೂ ಅವಲಂಬಿತವಾಗಿದೆ. ಮೂರನೇ ಭಾಷೆಯ ಪರೀಕ್ಷೆಗೆ ಅಂಕ ನೀಡುವ ಬದಲು ‘ಗ್ರೇಡಿಂಗ್’ ವ್ಯವಸ್ಥೆ ಜಾರಿಗೆ ತರಲು ಮುಂದಾಗಿದ್ದ ಸರ್ಕಾರದ ನಿರ್ಧಾರ ಈಗ ಕಾನೂನು ಸಂಘರ್ಷಕ್ಕೆ ಕಾರಣವಾಗಿದೆ.
ಇಂದು ಹೈಕೋರ್ಟ್ನಲ್ಲಿ ಹೈವೋಲ್ಟೇಜ್ ವಿಚಾರಣೆ
ತೃತೀಯ ಭಾಷೆ ಹಿಂದಿ ಪರೀಕ್ಷೆಯ ಮೌಲ್ಯಮಾಪನ ನಿಯಮ ಬದಲಾವಣೆಗೆ ಸಂಬಂಧಿಸಿದಂತೆ ರಾಜ್ಯ ಸರ್ಕಾರ ಸಲ್ಲಿಸಿರುವ ಪುನರ್ ಪರಿಶೀಲನಾ ಅರ್ಜಿ (Review Petition) ಇಂದು, ಅಂದರೆ ಏಪ್ರಿಲ್ 21, 2026 ರಂದು ಹೈಕೋರ್ಟ್ನಲ್ಲಿ ವಿಚಾರಣೆಗೆ ಬರಲಿದೆ.
ಪರೀಕ್ಷೆ ನಡೆದ ನಂತರ ‘ಅಂಕ’ ನೀಡುವ ಬದಲು ‘ಗ್ರೇಡ್’ ನೀಡುತ್ತೇವೆ ಎನ್ನುವುದು ಕಾನೂನುಬಾಹಿರ ಎಂದು ಹೈಕೋರ್ಟ್ ಈ ಹಿಂದೆ (ಏಪ್ರಿಲ್ 15) ಆದೇಶಿಸಿತ್ತು. “ಪಂದ್ಯ ಆರಂಭವಾದ ಮೇಲೆ ನಿಯಮ ಬದಲಿಸುವಂತಿಲ್ಲ” (Rules of the game cannot be changed midway) ಎಂದು ಕೋರ್ಟ್ ಖಡಕ್ ಆಗಿ ಹೇಳಿತ್ತು.
ಸರ್ಕಾರದ ವಾದ: ನ್ಯಾಷನಲ್ ಸ್ಕಿಲ್ ಕ್ವಾಲಿಫಿಕೇಶನ್ ಫ್ರೇಮ್ವರ್ಕ್ (NSQF) ಅಡಿಯಲ್ಲಿ ಬರುವ ವಿಷಯಗಳಿಗೂ ಅನ್ವಯವಾಗುವಂತೆ ಗ್ರೇಡಿಂಗ್ ಜಾರಿಗೆ ತರಲು ಅನುಮತಿ ನೀಡಬೇಕೆಂದು ಸರ್ಕಾರ ಮನವಿ ಮಾಡಿದೆ.
SSLC ಫಲಿತಾಂಶ ಯಾವಾಗ ಪ್ರಕಟವಾಗಬಹುದು ?
ಸದ್ಯದ ಮಾಹಿತಿಯ ಪ್ರಕಾರ, ಮೌಲ್ಯಮಾಪನ ಪ್ರಕ್ರಿಯೆಯು ಪ್ರಗತಿಯಲ್ಲಿದೆ. ಕಳೆದ ವರ್ಷಗಳ ಟ್ರೆಂಡ್ ಗಮನಿಸಿದರೆ, ಮೇ ಮೊದಲ ವಾರ ಅಥವಾ ಎರಡನೇ ವಾರದಲ್ಲಿ (ಅಂದಾಜು ಮೇ 7 ರಿಂದ 10ರ ಒಳಗೆ) ಫಲಿತಾಂಶ ಪ್ರಕಟವಾಗುವ ಸಾಧ್ಯತೆಯಿದೆ.
ಇಂದಿನ ವಿಚಾರಣೆಯಲ್ಲಿ ಕೋರ್ಟ್ ನೀಡುವ ನಿರ್ದೇಶನದ ಆಧಾರದ ಮೇಲೆ ಅಂಕಪಟ್ಟಿ (Marks Card) ಸಿದ್ಧಪಡಿಸಬೇಕಾಗುತ್ತದೆ. ಒಂದು ವೇಳೆ ಕೋರ್ಟ್ ಅಂಕಗಳನ್ನೇ ನೀಡಲು ಸೂಚಿಸಿದರೆ, ಸಾಫ್ಟ್ವೇರ್ ಅಪ್ಡೇಟ್ ಮಾಡಲು ಸ್ವಲ್ಪ ಸಮಯ ಬೇಕಾಗಬಹುದು, ಇದರಿಂದ ಫಲಿತಾಂಶ ಕೆಲವು ದಿನ ಮುಂದೂಡಿಕೆಯಾಗುವ ಸಾಧ್ಯತೆಯನ್ನೂ ತಳ್ಳಿಹಾಕುವಂತಿಲ್ಲ.
SSLC ಫಲಿತಾಂಶ : ವಿದ್ಯಾರ್ಥಿಗಳು, ಪೋಷಕರಲ್ಲಿ ಹೆಚ್ಚಿದ ಗೊಂದಲ
ಪರೀಕ್ಷೆ ಮುಗಿದು ಫಲಿತಾಂಶಕ್ಕಾಗಿ ಕಾಯುತ್ತಿರುವ ವಿದ್ಯಾರ್ಥಿಗಳಿಗೆ ಈ ಕಾನೂನು ಸಮರ ನುಂಗಲಾರದ ತುತ್ತಾಗಿದೆ.
ಅಂಕವೋ ಅಥವಾ ಗ್ರೇಡೋ?: ಮೂರನೇ ಭಾಷೆಯಲ್ಲಿ ಬರುವ ಅಂಕಗಳು ಒಟ್ಟು ಮೊತ್ತಕ್ಕೆ ಸೇರ್ಪಡೆಯಾಗುತ್ತದೆಯೇ ಎಂಬ ಗೊಂದಲ ಪೋಷಕರಲ್ಲಿ ಮನೆ ಮಾಡಿದೆ.
ಗ್ರೇಡಿಂಗ್ ಎಫೆಕ್ಟ್: ಒಂದು ವೇಳೆ ಕೇವಲ ಗ್ರೇಡ್ ನೀಡಿದರೆ, ಪ್ರತಿಷ್ಠಿತ ಕಾಲೇಜುಗಳ ಪ್ರವೇಶಾತಿಯಲ್ಲಿ (Cut-off) ತೊಂದರೆಯಾಗಬಹುದು ಎಂಬುದು ವಿದ್ಯಾರ್ಥಿಗಳ ಆತಂಕ.
SSLC ಫಲಿತಾಂಶ : ಫಲಿತಾಂಶ ಚೆಕ್ ಮಾಡುವುದು ಹೇಗೆ ?
ಫಲಿತಾಂಶ ಪ್ರಕಟವಾದ ತಕ್ಷಣ ಈ ಕೆಳಗಿನ ಅಧಿಕೃತ ವೆಬ್ಸೈಟ್ಗಳಲ್ಲಿ ವೀಕ್ಷಿಸಬಹುದು:
ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅವರು ವಿದ್ಯಾರ್ಥಿಗಳಿಗೆ ಧೈರ್ಯ ತುಂಬಿದ್ದು, ಫಲಿತಾಂಶ ಪ್ರಕ್ರಿಯೆಯಲ್ಲಿ ದೊಡ್ಡ ವ್ಯತ್ಯಾಸವಾಗದಂತೆ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ. ಆದರೂ ಇಂದಿನ ಹೈಕೋರ್ಟ್ ತೀರ್ಪು ಮಾತ್ರ ಅತ್ಯಂತ ನಿರ್ಣಾಯಕವಾಗಿದೆ.
