ಐಪಿಎಲ್‌ನಲ್ಲಿ ಹನಿ ಟ್ರ್ಯಾಪ್ ಭೀತಿ: ಬಿಸಿಸಿಐ ಹೊಸ ರೂಲ್ಸ್, ಆಟಗಾರರ ಆಲಿಂಗನಕ್ಕೂ ಬಿತ್ತು ಬ್ರೇಕ್‌

ಮುಂಬೈ/ಬೆಂಗಳೂರು: ವಿಶ್ವದ ಶ್ರೀಮಂತ ಕ್ರಿಕೆಟ್ ಲೀಗ್ ಐಪಿಎಲ್ (IPL 2026) ಇದೀಗ ಮೈದಾನದ ಆಟಕ್ಕಿಂತ ಹೆಚ್ಚಾಗಿ ಹೊರಗಿನ ವಿವಾದಗಳಿಂದಲೇ ಸುದ್ದಿಯಾಗುತ್ತಿದೆ. ಸರಣಿ ವಿವಾದಗಳಿಂದ ಎಚ್ಚೆತ್ತಿರುವ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI), ಎಲ್ಲಾ ಫ್ರಾಂಚೈಸಿಗಳಿಗೆ 8 ಪುಟಗಳ ಸುದೀರ್ಘ ಎಚ್ಚರಿಕೆ ಪತ್ರವನ್ನು ರವಾನಿಸಿದೆ. ಈ ಪತ್ರದಲ್ಲಿ ಆಟಗಾರರ ಸುರಕ್ಷತೆ ಮತ್ತು ಲೀಗ್‌ನ ಘನತೆಗೆ ಸಂಬಂಧಿಸಿದಂತೆ ಹಲವು ಕಠಿಣ ನಿಯಮಗಳನ್ನು ಜಾರಿಗೆ ತರಲಾಗಿದೆ.

ಐಪಿಎಲ್‌ನಲ್ಲಿ ಏನಿದು ಹನಿ ಟ್ರ್ಯಾಪ್ ಭೀತಿ?

ಐಪಿಎಲ್ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ‘ಹನಿ ಟ್ರ್ಯಾಪಿಂಗ್’ (Honey Trapping) ಬಗ್ಗೆ ಬಿಸಿಸಿಐ ಗಂಭೀರ ಕಳವಳ ವ್ಯಕ್ತಪಡಿಸಿದೆ. ಆಟಗಾರರನ್ನು ಪ್ರಲೋಭನೆಗೆ ಒಳಪಡಿಸಿ ತಂಡದ ರಹಸ್ಯ ಮಾಹಿತಿ ಪಡೆಯುವ ಅಥವಾ ಮ್ಯಾಚ್ ಫಿಕ್ಸಿಂಗ್‌ಗೆ ಪ್ರೇರೇಪಿಸುವ ಜಾಲಗಳು ಸಕ್ರಿಯವಾಗಿರುವ ಶಂಕೆ ವ್ಯಕ್ತವಾಗಿದೆ. ಈ ಹಿನ್ನೆಲೆಯಲ್ಲಿ ಹೋಟೆಲ್ ರೂಮ್‌ಗಳಿಗೆ ಅಪರಿಚಿತ ಅಥವಾ ಅನಧಿಕೃತ ವ್ಯಕ್ತಿಗಳ ಪ್ರವೇಶವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.

ಆಟಗಾರರು ತಂಗಿರುವ ಹೋಟೆಲ್ ರೂಮ್‌ಗಳಿಗೆ ನೋ ಎಂಟ್ರಿ!

ಬಿಸಿಸಿಐನ ಹೊಸ ಮಾರ್ಗಸೂಚಿಯ ಪ್ರಕಾರ, ತಂಡದ ಮ್ಯಾನೇಜರ್ ಅವರ ಲಿಖಿತ ಅನುಮತಿ ಇಲ್ಲದೆ ಯಾವುದೇ ಅತಿಥಿಗಳು ಆಟಗಾರರ ಕೊಠಡಿಗೆ ಹೋಗುವಂತಿಲ್ಲ. ಅತಿಥಿಗಳನ್ನು ಭೇಟಿ ಮಾಡಬೇಕಿದ್ದರೆ ಕೇವಲ ಹೋಟೆಲ್ ಲಾಬಿ ಅಥವಾ ಸಾರ್ವಜನಿಕ ಸ್ಥಳಗಳನ್ನು ಮಾತ್ರ ಬಳಸಿಕೊಳ್ಳಬೇಕು. ಒಂದು ವೇಳೆ ಆಟಗಾರರು ಹೋಟೆಲ್ ಬಿಟ್ಟು ಹೊರಹೋಗಬೇಕಿದ್ದಲ್ಲಿ ಭದ್ರತಾ ಅಧಿಕಾರಿಗಳ (SLO) ಪೂರ್ವಾನುಮತಿ ಪಡೆಯುವುದು ಕಡ್ಡಾಯವಾಗಿದೆ.

ಆಟಗಾರನ್ನು ಮಾಲೀಕರು ತಬ್ಬಿಕೊಳ್ಳುವಂತಿಲ್ಲ

ಮೈದಾನದಲ್ಲಿ ತಂಡದ ಮಾಲೀಕರು ಆಟಗಾರರೊಂದಿಗೆ ಅತಿಯಾದ ಆಪ್ತತೆ ತೋರುವುದು ಅಥವಾ ಡ್ರೆಸ್ಸಿಂಗ್ ರೂಮ್ ವ್ಯವಹಾರಗಳಲ್ಲಿ ಹಸ್ತಕ್ಷೇಪ ಮಾಡುವುದಕ್ಕೆ ಬಿಸಿಸಿಐ ಬ್ರೇಕ್ ಹಾಕಿದೆ. ಪಂದ್ಯದ ವೇಳೆ ಮಾಲೀಕರು ಆಟಗಾರರನ್ನು ಅಪ್ಪಿಕೊಳ್ಳುವುದು ಅಥವಾ ಅನಗತ್ಯ ಸಂವಹನ ನಡೆಸುವುದು ಐಪಿಎಲ್ ಶಿಷ್ಟಾಚಾರದ ಉಲ್ಲಂಘನೆ ಎಂದು ಪರಿಗಣಿಸಲಾಗುತ್ತದೆ. ಆಟದ ಪಾವಿತ್ರ್ಯತೆ ಕಾಪಾಡಲು ಮಾಲೀಕರು ನಿಗದಿತ ಅಂತರ ಕಾಯ್ದುಕೊಳ್ಳಬೇಕು ಎಂದು ಪತ್ರದಲ್ಲಿ ಸ್ಪಷ್ಟಪಡಿಸಲಾಗಿದೆ.

Also Read : “ಬ್ಯಾಟ್‌ನಲ್ಲಿ ಚಿಪ್‌ ಇದೆ ಅಂದವರಿಗೆ ಬ್ಯಾಟ್‌ನಲ್ಲೇ ಉತ್ತರ ಕೊಟ್ಟ ವೈಭವ್​ ಸೂರ್ಯವಂಶಿ !

ಇ-ಸಿಗರೇಟ್ ಹಾಗೂ ಧೂಮಪಾನಕ್ಕೆ ಕಠಿಣ ಶಿಕ್ಷೆ

ಇತ್ತೀಚೆಗೆ ಮೈದಾನದಲ್ಲಿ ಆಟಗಾರರು ಇ-ಸಿಗರೇಟ್ ಅಥವಾ ‘ವೇಪಿಂಗ್’ ಮಾಡುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದವು. ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಬಿಸಿಸಿಐ, ಕ್ರೀಡಾಂಗಣ, ಹೋಟೆಲ್ ಮತ್ತು ಡ್ರೆಸ್ಸಿಂಗ್ ರೂಮ್‌ಗಳಲ್ಲಿ ಧೂಮಪಾನವನ್ನು ಕಟ್ಟುನಿಟ್ಟಾಗಿ ನಿಷೇಧಿಸಿದೆ. ಭಾರತೀಯ ಕಾನೂನಿನ ಪ್ರಕಾರ ಇ-ಸಿಗರೇಟ್ ಬಳಕೆಯು ಅಪರಾಧವಾಗಿದ್ದು, ನಿಯಮ ಮೀರಿದರೆ ಭಾರೀ ದಂಡದ ಜೊತೆಗೆ ಅಮಾನತು ಶಿಕ್ಷೆಯ ಎಚ್ಚರಿಕೆಯನ್ನೂ ನೀಡಲಾಗಿದೆ.

48 ಗಂಟೆಗಳ ಗಡುವು ಕೊಟ್ಟ ಬಿಸಿಸಿಐ

ಬಿಸಿಸಿಐ ನೀಡಿರುವ ಈ ಎಂಟು ಪುಟಗಳ ಮಾರ್ಗಸೂಚಿಯನ್ನು ಎಲ್ಲಾ ಆಟಗಾರರು ಮತ್ತು ಸಿಬ್ಬಂದಿಗೆ ತಲುಪಿಸಲು ಫ್ರಾಂಚೈಸಿಗಳಿಗೆ 48 ಗಂಟೆಗಳ ಕಾಲಾವಕಾಶ ನೀಡಲಾಗಿದೆ. ಪ್ರತಿಯೊಬ್ಬ ಆಟಗಾರನೂ ಈ ನಿಯಮಗಳನ್ನು ಓದಿ ಸಹಿ ಹಾಕಿದ ಪತ್ರವನ್ನು ಮಂಡಳಿಗೆ ಸಲ್ಲಿಸಬೇಕಿದೆ.

Also Read : ರಾಷ್ಟ್ರೀಯ ಮಟ್ಟದ ಸ್ಪೀಡ್​ ಸ್ಕೇಟಿಂಗ್​ ಚಾಂಪಿಯನ್​ಶಿಪ್​ : ಬ್ರಹ್ಮಾವರದ ಅದ್ವಿತ​ ಗುರುಪ್ರಸಾದ್​ ಶೆಟ್ಟಿಗಾರ್ ಗೆ ಚಿನ್ನದ ಪದಕ

ಒಟ್ಟಾರೆಯಾಗಿ, ಐಪಿಎಲ್‌ನ ಶಿಸ್ತು ಕಾಪಾಡಲು ಬಿಸಿಸಿಐ ಕಠಿಣ ನಿಲುವನ್ನು ತಳೆದಿದ್ದು, ನಿಯಮ ಉಲ್ಲಂಘಿಸುವವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಸಿದ್ಧವಾಗಿದೆ.

ipl 2026 honey trap threat bcci new rules player hug ban