ಲಂಚ ಕೊಡದ್ದಕ್ಕೆ ಯುವಕನ್ನು ವಿವಸ್ತ್ರಗೊಳಿಸಿ ಪೊಲೀಸರಿಂದ ಹತ್ಯೆ

Crime News: ಇಂಜಿನಿಯರಿಂಗ್​ ಪದವಿ ಮುಗಿಸಿ ಸಂಭ್ರಮಿಸುತ್ತಿದ್ದ ಯುವಕ ಪೊಲೀಸರ ಕುಕೃತ್ಯಕ್ಕೆ ಸಾವನ್ನಪ್ಪಿದ ಅಮಾನವೀಯ ಘಟನೆಯು ಮಧ್ಯಪ್ರದೇಶದ ಭೋಪಾಲ್​ನಲ್ಲಿ ಸಂಭವಿಸಿದೆ.

ಬಿಯರ್​ ಪಾರ್ಟಿಯಲ್ಲಿ ಮಧ್ಯಪ್ರವೇಶಿಸಿದ ಇಬ್ಬರು ಖಾಕಿ ಪಡೆ 22 ವರ್ಷದ ಇಂಜಿನಿಯರ್​ ಬಟ್ಟೆ ಬಚ್ಚಿ 10 ಸಾವಿರ ರೂಪಾಯಿ ಲಂಚಕ್ಕೆ ಬೇಡಿಕೆ ಇಟ್ಟಿದ್ದು ಹಣ ಸಿಗದ ಕಾರಣಕ್ಕೆ ಆತನನ್ನು ಹೊಡೆದು ಸಾಯಿಸಿದ್ದಾರೆ.

ಭೋಪಾಲ್​ನ ಇಂದ್ರಪುರಿ ಎಂಬ ಪ್ರದೇಶದಲ್ಲಿ ಗುರುವಾರದಂದು ಈ ಘಟನೆ ಸಂಭವಿಸಿದೆ. ಆರೋಪಿಗಳು ಸದ್ಯ ತಲೆಮರೆಸಿಕೊಂಡಿದ್ದು ಮೃತ ಯುವಕನ ಕುಟುಂಬಸ್ಥರು ನ್ಯಾಯಕ್ಕೆ ಆಗ್ರಹಿಸುತ್ತಿದ್ದಾರೆ.

ಇಂಜಿನಿಯರಿಂಗ್​ ಪದವಿ ಪೂರೈಸಿದ ಯುವ ಉದಿತ್​ ಭೋಪಾಲ್​ಗೆ ಮರಳಿದ್ದ. ಕಂಪನಿಯಲ್ಲಿ ಕೆಲಸ ಕೂಡ ದೊರಕಿದ್ದರಿಂದ ಕಾಲೇಜಿಗೆ ತೆರಳಿ ಪದವಿ ಪ್ರಮಾಣಪತ್ರವನ್ನು ಪಡೆಯಲು ಸ್ನೇಹಿತರೊಂದಿಗೆ ಸೆಹೋರ್​ನಲ್ಲಿರುವ ತನ್ನ ಇಂಜಿನಿಯರಿಂಗ್​ ಕಾಲೇಜಿಗೆ ತೆರಳಿದ್ದ .

Also Read: ಮನೆಗೆ ಬಾರಲು ಒಪ್ಪದ ಪತ್ನಿ : ಹೆತ್ತ ಮಕ್ಕಳ ಕತ್ತು ಸೀಳಿ ಕೊಂದ ಪಾಪಿ ತಂದೆ

ಆದರೆ ಸ್ನೇಹಿತರೊಂದಿಗಿನ ಆತನ ಈ ಪಯಣ ಆತನ ಜೀವನದ ಕೊನೆಯ ಪಯಣವಾಗಬಹುದು ಎಂಬ ಊಹೆ ಯಾರಿಗೂ ಇರಲಿಲ್ಲ. ಹೊಸ ಕೆಲಸ ದೊರಕಿದ್ದ ಹಿನ್ನೆಲೆಯಲ್ಲಿ ಸ್ನೇಹಿತರೊಂದಿಗೆ ಮೋಜು ಮಸ್ತಿ ಮಾಡಲು ಉದಿತ್​ ಮುಂದಾಗಿದ್ದ ಎನ್ನಲಾಗಿದೆ.

ಬಿಯರ್​ ಪಾರ್ಟಿ ಮಾಡುತ್ತಿದ್ದ ಸಂದರ್ಭದಲ್ಲಿ ಎಂಟ್ರಿ ಕೊಟ್ಟ ಪೊಲೀಸರು 10 ಸಾವಿರ ರೂಪಾಯಿ ಲಂಚಕ್ಕೆ ಪೀಡಿಸಿದ್ದಾರೆ ಎನ್ನಲಾಗಿದೆ. ಹಣಕೊಡಲು ನಿರಾಕರಿಸಿದಾಗ ಉದಿತ್​ನನ್ನು ವಿವಸ್ತ್ರಗೊಳಿಸಿ ದೊಣ್ಣೆಯಿಂದ ಮಾರಣಾಂತಿಕ ಹಲ್ಲೆ ನಡೆಸಿ ಪೊಲೀಸರು ಪರಾರಿಯಾಗಿದ್ದಾರೆ.

ಈ ಪ್ರಕರಣದ ಪ್ರತ್ಯಕ್ಷದರ್ಶಿಗಳು ನೀಡಿರುವ ಮಾಹಿತಿಯ ಪ್ರಕಾರ ಕಾನ್​ಸ್ಟೇಬಲ್​ಗಳು ಉದಿತ್​ನನ್ನು ವಿವಸ್ತ್ರಗೊಳಿಸಿ ಮನಬಂದಂತೆ ಥಳಿಸಿದ್ದರು ಎನ್ನಲಾಗಿದೆ. ಇದಾದ ಬಳಿಕ ಉದಿತ್​ ವಾಂತಿ ಮಾಡಿಕೊಂಡಿದ್ದಾನೆ.

ಕೂಡಲೇ ಸ್ನೇಹಿತರು ಆತನನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ. ವೈದ್ಯರು ಉದಿತ್​ನ್ನು ಏಮ್ಸ್​ಗೆ ಸ್ಥಳಾಂತರಿಸಿದ್ದರು. ಆದರೆ ಏಮ್ಸ್​ ವೈದ್ಯರು ಉದಿತ್​ ಆಸ್ಪತ್ರೆ ತಲುಪುವಷ್ಟರಲ್ಲಿ ಮೃತಪಟ್ಟಿದ್ದ ಎಂದು ಘೋಷಿಸಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ಕೂಡ ವೈರಲ್​ ಆಗಿದ್ದು. ದೊಣ್ಣೆ ಹಿಡಿದ ಪೊಲೀಸ್​ ಒಬ್ಬರು ಕಪ್ಪು ಕಾರಿನ ಸಮೀಪವಿರುವ ಪಾರ್ಕಿಂಗ್​ ಸ್ಥಳಕ್ಕೆ ಶರ್ಟ್ ಧರಿಸದೇ ಇರುವ ಉದಿತ್​ ಜೊತೆ ನಡೆದುಕೊಂಡು ಹೋಗಿದ್ದಾರೆ. ಕೂಡಲೇ ಅಲ್ಲಿಗೆ ಸ್ಕೂಟರ್​ ಬರುತ್ತದೆ . ಮತ್ತು ಇನ್ನೊಬ್ಬ ಪೊಲೀಸ್ ಅಧಿಕಾರಿ ತನ್ನ ಸ್ನೇಹಿತರೊಂದಿಗೆ ಬರುತ್ತಾನೆ. ಸ್ನೇಹಿತರು ಪೊಲೀಸರೊಂದಿಗೆ ಮಾತನಾಡುತ್ತಿರುವಾಗ, ಮೃತ ಉದಿತ್​ಗೆ ದೊಣ್ಣೆಯಿಂದ ಥಳಿಸಿದ್ದಾರೆ.

Also Read: ಬರ್ತಡೇ ಪಾರ್ಟಿ : 20 ವರ್ಷದ ಮಹಿಳೆ ಮೇಲೆ ಸಾಮೂಹಿಕ ಅತ್ಯಾಚಾರ

ಇನ್ನು ಈ ವಿಚಾರವಾಗಿ ಮೃತ ಉದಿತ್​ ತಂದೆ ಮಾತನಾಡಿದ್ದು, ನನ್ನ ಮಗನನ್ನು ಪೊಲೀಸರೇ ಕೊಂದಿರುವುದರಿಂದ ಅವರಿಂದ ನಾವು ನ್ಯಾಯಯುತ ತನಿಖೆ ನಿರೀಕ್ಷಿಸಲು ಸಾಧ್ಯವಿಲ್ಲ. ಹೀಗಾಗಿ ಈ ಪ್ರಕರಣದ ತನಿಖೆಯನ್ನು ಎಸ್​ಐಟಿ ಅಥವಾ ಸಿಬಿಐಗೆ ಸಲ್ಲಿಸಬೇಕು.ನಮ್ಮ ಮಗನ ಸಾವಿಗೆ ನ್ಯಾಯ ಸಿಗಬೇಕು ಎಂದು ಆಗ್ರಹಿಸಿದ್ದಾರೆ.

ಮಧ್ಯಪ್ರದೇಶ ಕಾಂಗ್ರೆಸ್​ ರಾಜ್ಯಾಧ್ಯಕ್ಷ ಜಿತು ಪಟ್ವಾರಿ ಕೂಡ ಈ ಪ್ರಕರಣ ಸಂಬಂಧ ಪ್ರತಿಕ್ರಿಯೆ ನೀಡಿದ್ದು, ಇದು ಪೊಲೀಸರೇ ನಡೆಸಿರುವ ಹತ್ಯೆ. ಆದರೆ ಮುಖ್ಯಮಂತ್ರಿಗಳಾಗಲಿ, ಗೃಹ ಮಂತ್ರಿಗಳಾಗಲಿ, ಸ್ಥಳೀಯ ಸಚಿವರು ಯಾರೊಬ್ಬರೂ ಮೃತರ ಕುಟುಂಬಸ್ಥರನ್ನು ಭೇಟಿ ಮಾಡಿ ಧೈರ್ಯ ತುಂಬುವ ಕಾರ್ಯ ಮಾಡಿಲ್ಲ. ಮಧ್ಯಪ್ರದೇಶ ಸರ್ಕಾರ ಸೂಕ್ಷ್ಮತೆ ಇಲ್ಲದ ಸರ್ಕಾರ ಎಂದು ಜರಿದಿದ್ದಾರೆ.