ಉಡುಪಿ : ಕಳುವಾಗಿದ್ದ ಬರೋಬ್ಬರಿ 60 ಮೊಬೈಲ್ ಪತ್ತೆ ಮಾಡುವಲ್ಲಿ ಖಾಕಿ ಯಶಸ್ವಿ : ಮೊಬೈಲ್ ಮಾಲೀಕರ ಮೊಗದಲ್ಲಿ ಮಂದಹಾಸ
ಈಗಿನ ಜಮಾನದಲ್ಲಿ ಚಿನ್ನ – ಬೆಳ್ಳಿಗೆ ಮಾತ್ರವಲ್ಲದೇ, ಮೊಬೈಲ್ಗಾಗಿಯೂ ಲಕ್ಷಾಂತರ ರೂಪಾಯಿ ಖಾಲಿ ಮಾಡುವುದು ಟ್ರೆಂಡ್ ಆಗಿದೆ. ಇಎಂಐ ಸೌಲಭ್ಯ ಲಭ್ಯವಿರೋದ್ರಿಂದ ಅಂದುಕೊಂಡ ಮೊಬೈಲ್ ಖರೀದಿ ಮಾಡುವುದು ಈಗ ಸುಲಭ..! ಆದರೆ ನಾವು ಇಷ್ಟ ಪಟ್ಟು ಕಷ್ಟ ಪಟ್ಟು ಖರೀದಿ ಮಾಡಿದ ಮೊಬೈಲ್ ಕಳುವಾದರೆ ? ಆಕಾಶವೇ ತಲೆ ಮೇಲೆ ಕಳಚಿ ಬಿದ್ದಂತೆ ಆಗಬಹುದು ಅಲ್ಲವೇ ? ಇದೇ ರೀತಿ ಉಡುಪಿ ಠಾಣೆಯಾದ್ಯಂತ ಮೊಬೈಲ್ ಕಳೆದುಕೊಂಡಿದ್ದ ಅನೇಕರ ಮೊಗದಲ್ಲಿ ಇದೀಗ ಮಂದಹಾಸ ಮೂಡಿದೆ.
ಉಡುಪಿ ನಗರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಮೊಬೈಲ್ ಕಳೆದುಕೊಂಡಿದ್ದ 60 ಮಂದಿಯ ಮೊಬೈಲ್ ವಾಪಸ್ ನೀಡುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಒಟ್ಟೂ 6 ಲಕ್ಷದ 83 ಸಾವಿರದ 400 ರೂಪಾಯಿ ಮೌಲ್ಯದ ಮೊಬೈಲ್ಗಳನ್ನು ಪತ್ತೆ ಮಾಡುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಕಳೆದುಕೊಂಡ ಮೊಬೈಲ್ಗಳನ್ನು ವಾಪಾಸ್ ಪಡೆದುಕೊಂಡವರ ಖುಷಿ ಮುಗಿಲು ಮುಟ್ಟಿತ್ತು.
ಮೊಬೈಲ್ ಕಳೆದುಕೊಂಡ ಬಳಿಕ ಸಿಐಆರ್ ಪೋರ್ಟಲ್ನಲ್ಲಿ ದೂರು ದಾಖಲಿಸಿದ್ದ 60 ಮಂದಿಯ ಮೊಬೈಲ್ಗಳನ್ನು 3 ತಿಂಗಳ ಅಂತರದಲ್ಲಿ ಪೊಲೀಸರು ಪತ್ತೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.
ಇದನ್ನೂ ಓದಿ: ನಲ್ಲೂರು ಅಕ್ರಮ ಕಸಾಯಿಖಾನೆ ಪ್ರಕರಣಕ್ಕೆ ಹೊಸ ಟ್ವಿಸ್ಟ್: ದನ-ಕರು ಮಾರಾಟ ಮಾಡಿದ್ದ ಸಂಘ ಪರಿವಾರದ ಕಾರ್ಯಕರ್ತ ಬಂಧನ
ಕಷ್ಟಪಟ್ಟು ಸಾಲ ಮಾಡಿ ಮೊಬೈಲ್ ತೆಗೆದುಕೊಂಡು ಕಳೆದುಹೋದ ಬಳಿಕ ನಿರಾಶೆಯಲ್ಲಿಯೇ ಇಎಂಐ ಕಟ್ಟುತ್ತಿದ್ದ ಅನೇಕರು ಇಂದು ಸಖತ್ ಖುಷಿ ಆಗಿದ್ದರು. ಉಡುಪಿ ನಗರ ಠಾಣಾ ಪೊಲೀಸರಿಗೆ ಧನ್ಯವಾದ ಅರ್ಪಿಸಿದ್ದಾರೆ.
ಈ ವಿಚಾರವಾಗಿ ಸಾರ್ವಜನಿಕರನ್ನುದ್ದೇಶಿಸಿ ಮಾತನಾಡಿದ ಡಿವೈಎಸ್ಪಿ ಡಿ.ಟಿ ಪ್ರಭು, ಮೊಬೈಲ್ ಕಳೆದುಕೊಂಡರೆ ಗಾಬರಿಯಾಗದೇ ಸಿಐಆರ್ ಪೋರ್ಟಲ್ನಲ್ಲಿ ದೂರು ದಾಖಲಿಸಿ. ಈ ವರ್ಷ ಸಿಐಆರ್ ಪೋರ್ಟಲ್ನಲ್ಲಿ ಮೊಬೈಲ್ ಕಳುವು ಪ್ರಕರಣ ಹೆಚ್ಚಿನ ಸಂಖ್ಯೆಯಲ್ಲಿ ದಾಖಲಾಗಿತ್ತು. ಇದೀಗ ಅನೇಕರ ಮೊಬೈಲ್ ವಾಪಸ್ ದೊರಕಿಸಿಕೊಟ್ಟಿದ್ದೇವೆ. ಹೀಗಾಗಿ ನಿರ್ಲಕ್ಷ್ಯ ಬೇಡ ಹಾಗಂತ ಮೊಬೈಲ್ ಕಳೆದು ಹೋದರೆ ತೀರಾ ಆತಂಕಕ್ಕೆ ಒಳಗಾಗುವ ಅಗತ್ಯವೂ ಇಲ್ಲ ಎಂದು ಸಲಹೆ ನೀಡಿದ್ದಾರೆ.
